İsgəndər Həmidov: “Adama deyərlər ki, əgər sən prezident seçilmək istəmirsənsə, onda bura nəyə gəlmisən?”
Suallara sabiq daxili işlər naziri, Milli Şuranın üzvü, Milli Demokrat (Bozqurd) Partiyasının lideri İsgəndər Həmidov cavab verib. Sabiq nazir əsasən son günlər mətbuatda onun əleyhinə danışan şəxslərlə bağlı fikirlərini açıqlayıb, eləcədə Milli Şuranın addımlarını qiymətləndirib.
- İsgəndər bəy, son zamanlar sizin haqqınızda müəyyən fikirlər işlədirlər. Bəziləri sizi kəskin formada tənqid edir. Barənizdə deyilənlərə münasibətiniz necədir?
- Mənim haqqımda həqiqətən də son günlər bir çox insanlar danışıb və bəziləri danışmaqda davam edirlər. Mən bu insanların hamısına öz təşəkkürümü ifadə edirəm. Dünyada ən pis şey unudulmaq və biganəlikdir. Əgər onlar mənə qarşı lütf göstərib adımı çəkirlərsə, mənfi mənada səsləndirirlərsə, şübhəsiz ki, onlara minnətdaram. Çünki mənfi nəticənin özü də bir nəticədir. Deməli mən düz yoldayam ki, bu sayda insan məni, mənim hərəkətlərimi, fikirlərimi müzakirə edir, mənə qarşı danışırlar. Onlara çox sağol deyirəm. Yəqin adımı çəkməsələr, məni söyməsələr, barəmdə yazılar yazmasalar bəlkə də adım çoxunun yadından çıxar. Amma onlar qoymurlar ki, adım yaddan çıxsın, hər zaman diqqət mərkəzində saxlayırlar. Təşəkkür edirəm. Həmdə bu insanlar özlərinin ürəkdən gələn sözlərini deyirlərsə, çox əla. Yox kiminsə sözün deyirlərsə və buna görə evlərinə çörək aparırlarsa, allah qüvvət versin. Mən onların çörəyinə bais olmaq istəmirəm.
- Sizi söyərək evlərinə çörək aparan insanlar çoxdurmu?
- Bəy, siz bu insanların hamısını tanıyırsınız. Əlbəttə ki, mən sizin dediklərinizlə yüzə-yüz razıyam. Ancaq bu insanların öz sözünü və ya sifariş əsasında danışdıqlarını buraxıram özlərinin vicdanına.
- Bu gün daha çox söyülən Əli Kərimli, İsa Qəmbər, İsgəndər Həmidov, Cəmil Həsənli və digərləridir. Siz həm də Əbülfəz Elçibəyin komandasında təmsil olunmusunuz. Sizi söyməkdə məqsəd nədir?
- Biz seçkilər ilini yaşayırıq, həyatımızda Azərbaycanla bağlı olub. Mənə elə gəlir ki, bizi söyənlər, təhqir edənlər bunu sifariş əsasında yerinə yetirir və daha çox çörək pulu qazanmaq istəyirlər. Ancaq iş orasındadır ki, onlara pulu getdikcə daha az verirlər. Əgər onlar bu yolla balalarına çörək pulu qazanırlarsa, mən buna görə özümü xöşbəxt sayıram. Düz 20 ildir ki onların ailələrinə çörək pulu qazanmasına səbəb olmuşuq. Əlbəttə, bu yaxşı haldır. Bundan artıq onları tərif etməyə söz yoxdur.
- Bəs Rəsul Quliyevin sizinlə hansı ədavəti var, çünki son zamanlar Milli Şurada müttəfiqlik etdiyiniz bu şəxs də, sizə qarşı açıq-aşkar çıxışlar edir?
- Sözün açığını deyim ki, mənim Rəsul Quliyevlə heç bir ədavətim yoxdur. Ancaq iş ondadır ki, Rəsul Quliyev telefon danışığı zamanı yalnız mənim adımı çəkməyib. Əksinə, əksər şəxslərin adını çəkib və hərəyə də bir söz deyib. Mən neyləyim, Rəsul Quliyevdir də. Məncə, özü bu məsələlərə bir aydınlıq gətirər, izahat verər. Mənim onunla heç bir problemim yoxdur. Anaq görünən budur ki, Rəsul Quliyevin bizlərlə ciddi problemi var. Özü də, telefon danışığı zamanı mənimlə bərabər Eldar Namazovun, Əli Kərimlinin, İsa Qəmbərin adını çəkir.
- Axı bu adam Milli Şurada sizinlə bir yerdədir, müttəfiqinizdir...
- Nə deyim. Özüm də anlamram ki, Rəsul Quliyev niyə belə hərəkətlər edir, məqsədi nədir. Həm də, onun lideri olduğu partiya Milli Şurada təmsil olunur, onun yerinə müzakirələrə Sülhəddin Əkbər qatılır. Bizim də Sülhəddin Əkbərə böyük hörmətimiz var, daima onunla ünsiyyətdəyik. Məntiqli və ağıllı insandır. Rəsul Quliyevdir də. Yəqin ki, Milli Şuranın sessiyası keçirilsə, bu məsələlər müzakirə edilə və lazım gəlsə hansısa qərar qəbul oluna bilər. Ancaq hələlik heç bir qərar yoxdur deyə biz bir söz deyə bilmərik. İndi Rəsul Quliyev də, biz də Milli Şuranın üzvüyük. Mən də, onun haqqında mənfi danışmaq istəmirəm. Bircə onu deyirəm ki, insan danışığına fikir versə yaxşı olar.
- Rəsul Quliyevlə sizin kontaktlarınız varmı?
- Xeyr. Son illər onunla münasibətim olmayıb. Səhv etmirəmsə Rəsul Quliyevlə sonuncu dəfə görüşüm 1993-1994-cü ildə olub. Ondan sonra bizim aramızda nə telefon, nə də üzbəüz danışıq olmayıb.
- Son danışığınıza səbəb nə idi?
- Rəsul Quliyev mənim yaşadığım mənzilə gəlmişdi. Evdəki divanımızda əyləşdi və mənə dedi ki, onu Heydər Əliyev göndərib. Daha sonra əlavə elədi ki, Heydər Əliyev sizinlə işləmək niyyətindədir və əgər qəbul etsəniz sizə vəzifə təklif edir. Məndə qısa şəkildə dedim ki, bu təklifi qəbul etmirəm. Bundan sonra bizim əlaqəmiz olmayıb. Ancaq onun danışığından belə bəlli oldu ki, o mənim yanıma öz istəyi ilə deyil, Heydər Əliyevin istəyi əsasında gəlib.
- Rəsul Quliyevi Əbülfəz Elçibəyin komandasının üzvü hesab etmək olarmı?
-Rəsul Quliyev Əbülfəz Elçibəyin fərmanı ilə əvvəlcə Azərbaycan Dövlət Neft Şirkətində müavin oldu, daha sonra isə baş nazirin müavini vəzifəsinə gətirildi. Yəqin Əbülfəz Elçibəy onu özünün komanda üzvü kimi qəbul etmişdi və ona etimad göstərirdi. Çünki Quliyevin tutduğu vəzifələr kifayət qədər sanballı vəzifələr idi. Sonra Rəsul Quliyev 1993-cü ilin dövlət çevrilişində aktiv iştirak etdi, Heydər Əliyevin qatı tərəfdarlarına çevrildi. Az sonra isə Heydər Əliyevlə yollarını ayıraraq gəlib müxalifətə qoşuldu. İndi də belə açıqlamalar verir. Hər halda mən bu insan haqqında heç nə deyə bilmərəm. Milli Şura bu haqda qərar versə, bizdə mövqeyimizi ifadə edəcəyik.
- Milli Şuranın fəaliyyəti sizi qane edirmi?
- Milli Şuranın əsas işi namizədimiz Cəmil Həsənlinin təbliğatına yönəlib. Hazırda Milli Şura üzvləri rayolarda, kəndlərdə, şəhərlərdədir. Təbliğatın aparılması və Cəmil Həsənlinin xalqa tanıdılması işi məni qane edir. Bildiyiniz kimi həm seçki qərargahı fəaliyyətdədir, həm də namizədin özü strateji seçki komitəsi yaradıb. Seçki taktikası da bu qurumlarda müzakirə edilir. Hələ ki, bu işlər qanedici səviyyədə aparılır.
- Ancaq iddia edilir ki, artıq İlham Əliyev seçkiləri udub...
- Bilirsinizmi, əgər bir işin uğursuz olacağını düşünürsənsə, öncədən bu işə girişmə. Biz seçki prosesinə aktiv yanaşırıq, hesab edirik ki, məhz bizim namizədimiz qələbə çalacaq. Bizim namizədimiz qələbə çalacağı təqdirdə yəqin ki, rəqiblərdə bunu etiraf edərək sivil yolla hakimiyyəti təhvil verəcəklər.
- Hakimiyyətin iqtidarı sivil yolla seçkini udan tərəfə verəcəyinə inanırsınızmı?
- Azərbaycanda mən heç nəyə inanmıram, amma heç nəyin də mümkünsüzlüyünü istisna etmirəm. Azərbaycanda indiki hakimiyyət o qədər təzadlıdır ki, adam heç nəyə inanmaq istəmir.
- Dünən də teledebatda Cəmil Həsənliyə qarşı 7-8 prezidentliyə “namizəd” birləşmişdi. Teledebatlar haqda nə deyə bilərsiniz, Cəmil müəllim ümidləri doğruldurmu?
- Cəmil müəllim rəqiblərindən xeyli öndədir və bu açıq görünür. Cəmil müəllimin çıxışlarına münasibətdə ortadadır. Milli Şuranın namizədi məhz xalqın istədiyi üslubda danışır və ona mane olmağa da çalışırlar. Hesab editəm ki, namizədlərin içərisində Sərdar Cəlloğlu və İqbal Ağazadə də yaxşı danışır. Hiss olunur ki, teledebatlar tədricən məqsədə istiqamətlənir. Heç şübhəsiz ki, indi yaranan durum, vəziyyət, bunun səbəbkarının kimliyi haqqında da ancaq Cəmil Həsənli mövqe ifadə edir. Cəmil Həsənli alimdir, səlist danışır. Ancaq baxın, onun 1 dəqiqə 50 saniyəsini faktiki olaraq oğurladılar, onun çıxışına mane olmağa çalışırlar. Sanki ordakılar prokurorluğun müstəntiqləridir. Cəmil Həsənli çıxış edəndən sonra başlayırlar onun üzərinə gəlməyə, sorğu-sual etməyə. Amma xalqda kənardan bütün bunları görür. Adama deyərlər ki, əgər sən prezident seçilmək istəmirsənsə, onda bura nəyə gəlmisən?
- AXCP sədri Əli Kərimlinin oğlunun həbsini necə qiymətləndirirsiniz, sizcə, nədən AXCP sədrinin oğlu həbs edilib, o doğurdanmı cinayət əməli edib?
- İnsanlar mübarizəni insani çərçivədə aparmalıdırlar. Balalarımızın, ailələrimizin burada günahı yoxdur. Əli Kərimlinin oğlu tərbiyəli, qanacaqlı, mədəni və savadlı oğlandır. Hesab edirəm ki, Türkel Kərimlini həbs etməklə Əli Kərimliyə təsir etmək istəyirlər. Ancaq biz bütün bu mərhələləri keçmişik. Odur ki, buna getməsinlər. İndiki hakimiyyət Əli Kərimlinin oğlunu həbs edənlərin günahını yumaq istəyirsə Türkel Kərimlini azad etsinlər. Milli Demokrat Partiyası bu cür siyasi mübarizə üsullarını rədd edir, pisləyir və Əli Kərimlinin oğlunun dərhal azad edilməsini tələb edir.
- Sizdə hakimiyyətdə olmusunuz, Etibar Məmmədov və Heydər Əliyev sizin hakimiyyətə müxalifətdə olublar. Siz müxalifətinizə qarşı belə üsullardan istifadə edirdinizmi?
- Bir nəfər deyə bilməz ki, biz kiminsə uşağına, ailəsinə və ya evinə təzyiq məqsədilə hansısa hərəkət etmişik. Bunu bir nəfər deyə bilməz. Bizim vaxtımız da, bi müxalifətçinin uşağına söz deyilməyib. Çünki biz əxlaq sahibi olmuşuq. Hətta siz düşünün ki, bizim vaxtımızda Bakıdan qaçan KQB sədri Vaqif Hüseynovun oğlu yüksək balla hüquq fakultəsinə daxil oldu. Daxili işlər naziri vəzifəsində işləyən mən İsgəndər Həmidovun qardaşı qızı isə həmin il imtahandan kəsildi. Biz atalara görə, övladları hədəfə alacaq insan olmamışıq.
- Milli Şura bu günə mitinq təyin edib. Sentyabrın 22-də keçirilən mitinqdə insanların iştirakı sayı sizi qane elədimi?
- Əgər xatırlayırsınızsa bundan əvvəlki mitinqdə 3-4 min insan iştirak edirdi, amma 22 sentyabr mitinqində təxminən 13 min insan iştirak edib. Bununla bağlı monitorinq də aparılıb. Görünən budur ki, mitinq iştirakçılarının sayı artan xətt üzrə davam edir.
- Beynəlxalq qurumların Azərbaycanda vəziyyətə münasibətini adekvat saymaq olarmı?
- Mənim heç vaxt beynəlxalq qurumlarla əlaqəm olmayıb və bundan sonra da olmayacaq. Mən çoxlarından fərqli olaraq millətimizə və xalqa inanıram. Nə olacaqsa gümanımda, sökənəcəyim ünvanda xalqımdır. Hesab edirəm ki, çoxlarının dediyinin əksinə olaraq xalq yatmayıb. Cəmil Həsənlinin çıxışlarından sonra bir qədər oyanma var. Hesab edirəm ki, insanlarımız seçkilərə gəlib səs verəcəklər. Hakimiyyətin dayağı yoxdur. Onların dayağı orta təbəqə idi. Ancaq bu təbəqəni də özləri dağıdıb məhv elədi. Orta təbəqə bütün gününü işləyir, amma ilin sonunda Vergilər Nazirliyi adlandırılan reket nazirlik orta təbəqəni faktiki olaraq soyur. Artıq hökmətin dayağı hüquq mühafizə orqanlarıdır.
HÜSEYN ABBASOĞLU