Avropa Şurasının insan haqları komissarı Nils Muiznieks “Azadlıq” radiosuna müsahibə verib. Müsahibədə 9 oktyabr prezident seçkisinə də toxunulub:
- ATƏT missiyası 9 oktyabr prezident seçkisinin beynəlxalq standartlara uyğun gəlmədiyini bildirdi. Sizin fikirlərinizi bilmək maraqlı olardı...
- Təkcə ATƏT missiyası deyil, Avropa Parlamenti də seçkinin ATƏT standartlarına uyğun gəlmədiyini bəyan edib. Hakimiyyət bu bəyanatları nəzərə almalıdır. Seçkiləri təkmilləşdirmək üçün Azərbaycanda çox iş görülməlidir.
- Bir şəxsin 3-cü müddətə prezidentliyi şəxsən sizin və Avropa Şurası üzvü üçün nə deməkdir?
- Sonucda biz hakimiyyətdə olan hökumətlərlə, liderlərlə, parlamentlərlə işləməliyik. Bir tərəfdən bu o deməkdir ki, kiminlə işlədiyimizi bilirik, çünki bir müddət həmin hökumət, yaxud prezidentlə işləmişik. Digər tərəfdən davam edən dialoqun daha çox nəticəsi olacağına inanırıq. Bu səbəbdən kimliyinə baxmadan hakimiyyətdə olanlarla işləyirik. Onların irəli addım atmasını gözləyirik.
- Avropa Şurasının bəzi üzvlərinin ciddi pozuntulara yol versə də, qurum rəhbərliyinin buna göz yumması və nəticədə Avropa dəyərlərinin getdikcə daha çox ucuzlaşmasına dair fikirlər yayılıb. Bu şübhələri dağıtmaq üçün nə çatışmır?
- Əsas məsələ problemi görəndə onu adı ilə çağırmaq, həqiqəti demək, peşəkar təhlil etmək, onları hər bir üzvün götürdüyü hüquqi öhdəliklərə bağlamaqdır. Avropa Şurasının bir çox üzvünün öhdəliklərini yerinə yetirmək baxımından problemləri var. Mənim işim ikili standarta yer qoymamaq, hamıya yüksək standartla yanaşmaqdır. Bir çox ölkələrdə problemlər var. Bu qurumun mahiyyəti, hamının bağlı olduğu hüquqi öhdəliklərin praktikada nə demək olduğu barədə aydın düşünməliyik. Və dəyişikliyə çalışmalıyıq. Təkcə mənim ofisimdə deyil, Avropa Şurasının digər hissələrində də. Şəxsən mən özümü həqiqəti demək üçün məsul sayıram. Mən lobbiçilik subyekti deyiləm. Çox geniş mandatım mənə müxtəlif insan haqlarını əhatə etməyə imkan verir.
- Azərbaycanın Avropa Şurasına sədrliyi ərəfəsində hakimiyyətdən konkret hansı addımları gözləyirsiniz?
- Diffamasiyanın dekriminallaşdırılmasını, mülki diffamasiya üçün cərimələrin ciddi azaldılmasını, qeyri-mütənasib olmamasını istərdim. Bakının mərkəzində vaxtaşırı etirazlara icazə verilməsini, inandırıcı görünməyən ittihamlarla həbsdə yatan məhbusların, fəalların, bloqçuların, müxalifətçilərin azadlığa buraxılmasını istərdim. Bunların elə indi baş verməsini görmək istərdim. İrəliyə konkret addımlar atmaq lazımdır. Ancaq bu halda Azərbaycanın sədrliyi uğurlu ola bilər. Əks halda o, sədrlik dövründə pis siyasəti və qanunları müdafiə etmiş görünəcək ki, bu da yaxşı hal deyil.
Sorğu
Yay istirahətini harada keçirmək niyyətindəsiniz?