“Türkiyə-Yunanıstan gərginliyinin arxa planında başqa məqam gizlənir. Öncə nəzərə almalıyıq ki, Türkiyə-ABŞ münasibətlərində gərginlik mövcuddur. Bunun da tarixi-siyasi aspekti var. Burada söhbət 16 iyun 2016-cı ildə Türkiyədə çevrilişə cəhd və bunun arxasında ABŞ xüsusi xidmət orqanlarının durmasından gedir. Bununla bağlı məsələ həllini tapmayıb.

İkincisi, ABŞ-ın strategi gedişi ilə bağlı problem var. Ağ ev PKK və onun törəmələrinə dəstək verir. ABŞ bu strateji niyyətindən əl çəkmək fikrində deyil.
Üçüncüsü isə yeni dünya düzəni ilə bağlıdır. Artıq Türkiyə ABŞ-ın qarşısında istənilən tapşırığı icra etməyə hazır dövlət kimi durmur, əksinə, öz maraqlarına uyğun siyasət aparır. Mənim fikrimcə, məsələnin kökündə bu problemlər dayanır və yaxın gələcəkdə bunun həlli gözlənilmir. Yunanıstan da bunu yaxşı bildiyindən Ankara ilə münasibətləri gərginləşdirməklə bir növ Ankara-Vaşinqton münasibətlərini pozmağa çalışır. Afinanın fəallaşması bununla bağlıdır”.

Gundemxeber.Az xəbər verir ki, bu fikirləri Reyting.az-a Azərbaydan Demokratlar Partiyasının sədri Sülhəddin Əkbər gərginləşən Türkiyə-Yunanıstan münasibətlərini şərh edərkən deyib.
S. Əkbərin fikrincə, Ankara ilə Vaşinqton arasında gərginliyin artması gözləniləndir: “Burada Türkiyə diplomatiyasının üzərinə böyük iş düşür. Mənim fikrimcə, London və Təl-Əviv üzərindən ABŞ-ın dərin dövləti ilə dil tapmaq lazım gələcək. Odur ki, burada Yunanıstan vəkil kimi çıxış edir, yaranan fürsətdən istifadə etməyə çalışır. Bu, bir növ zamanında Ermənistanın hər fürsətdən istifadə edərək Azərbaycanla Rusiyanı qarşı-qarşı qoymaq cəhdinə bənzəyir. Yunanıstan da Tükiyə-ABŞ münasibətlərinin dərinliyini bildiyindən yaranan vəziyyətdən istifadə edərək, bu iki ölkə arasında münasibətləri pozmağa çalışır”.
S. Əkbər Türkiyə-Yunanıstan münasibətlərinin hərbi qarşıdurmaya çevriləcəyini gözləmir: “Düşünmürəm ki, ABŞ bunda maraqlı olsun. Amma qarşıdurma və gərginliyi davam etdirəcək. Ola bilsin ki, proses müharibə həddinə qədər irəliləsin. Gərginliyi artırma strategiyası hətta müharibə həddində balanslaşdırılma strategiyasına çatdırılsın. Amma müharibəyə keçəcəyini düşünmürəm. Bunda tərəflərin heç biri maraqlı deyil. Əslində bu əsəb müharibəsidir, yorucu savaşdır. Burada ağıllı hərəkət də azdır, müdriklik lazımdır. Ankara London və Təl-Əviv əlaqələrindən istifadə etməklə problemi çözməlidir”. 

Gundemxeber.Az