Ermənistan hakimiyyəti yeni müttəfiqlər axtarmağa başlayıb.

Qeyd edək ki, Ermənistan parlamentinin son iclasında Baş nazir Nikol Paşinyan ölkəsinin xarici siyasəti ilə bağlı fikirlər səsləndirib. Çıxış zamanı o, bildirib ki, Ermənistan hakimiyyəti artan təhlükəsizlik təhdidləri fonunda regional münasibətləri tənzimləmək yolunu tutmaq niyyətindədir:

“Bizim regional əlaqələrimizi tənzimləmək və inkişaf etdirmək iradəmiz və imkanımız varmı? Üstəlik, ətrafımızdakı təhlükəsizlik təhdidlərinin region üçün daha da şiddətləndiyi bir halda? Biz bütün çətinlikləri anlayaraq, bu suala müsbət cavab tapmaq yolu ilə getməyə qərar verdik. Çünki yalnız bu yol təhlükəsizliyə və rifaha zəmanət verə bilər”, - deyə Paşinyan bunu deyib.

Qərbyönlü Paşinyanın sözlərindən aydın olur ki, yaxın zamanda Ermənistanın xarici siyasətində və regional təhlükəsizlik strategiyasında ciddi dəyişikliklər müşahidə olunacaq. Çünki bu ölkə artıq Rusiyanı müttəfiq kimi görmək istəmir.

Ümumiyyətlə, yaxın gələcəkdə Ermənistan öz təhlükəsizliyini təmin etmək üçün kimi müttəfiq görmək istəyəcək? ABŞ, Fransa, yoxsa İran?

GUNDDEMXEBER.AZ-ın məlumatına görə, məsələ ilə bağlı politoloq Qabil Hüseynli Cebhe.info-ya şərhində bildirib ki, Qərbə inteqrasiya xətti Paşinyan hakimiyyətinin siyasətində əsas yer tutur.

“Paşinyan həqiqətən həm siyasi, həm də iqtisadi cəhətdən Qərbə doğru hərəkət etməkdə maraqlıdır. Həmçinin, Ermənistan əhalisinin əksəriyyəti də Avropa İttifaqına inteqrasiya xəttini bəyənir. Hesab edirəm ki, Ermənistanın yeni müttəfiqləri sırasında birinci Fransa, ondan sonra ABŞ olacaq. Böyük ehtimalla, Ermənistan yaxın gələcəkdə NATO və Avropa İttifaqına daxil olmağı hədəfləyəcək. NATO və Avropa İttifaqında yeni müttəfiqlər görmək istəyən Ermənistanın Rusiya ilə münasibətləri qırılmaq nöqtəsinə qədər gəlib çatıb. Regionda hazırki siyasi proseslər göstərir ki, İrəvan Rusiyadan uzaqlaşmağa çalışır. Zənnimcə, İranla da münasibətlər daimi olaraq səmimi xarakter daşımayacaq. Avroatlantika və Avropa İttifaqına inteqrasiya xəttini tutan İrəvanın İran hakimiyyəti ilə diplomatik münasibətləri möhkəmləndirməsi qeyri-mümkündür. ABŞ və Avropa dövlətlərinin tələbi ilə Paşinyan hakimiyyəti İrandan da məsafə saxlamağa çalışacaq. İndiki İran-Ermənistan münasibətləri daha çox Tehranın hesabına ayaqdadır. Bildiyimiz kimi, İranda bütün dünya tərəfindən təcrid edilən teokratik sistem mövcuddur. Ermənistana molla rejimi ilə münasibətlərini inkişaf etdirməyə imkan verməyəcəklər. Müəyyən müddətdən sonra İran-Ermənistan münasibətləri də zəifləyəcək”.

Politoloq Ermənistanın Azərbaycan və Türkiyə ilə gələcək münasibətlərinə də toxunub:

“Bakı və İrəvan arasında sülh müqaviləsi imzalanarsa, Ermənistan Azərbaycan və Türkiyə ilə münasibətləri normallaşdıracaq. Buna heç bir şübhə ola bilməz”.