Əlikram Əliyevin rəhbərlik etdiyi qurumda dözülməz vəziyyət hökm sürür

Mehmanxana və turizm təşkilatlarının rəhbərliyi ayda bir dəfə BŞMTİ-yə «hesabat» verirlər

Son zamanlar Bakı Şəhər Mədəniyyət və Turizm İdarəsinin (BŞMTİ), həmçinin onun rəhbəri Əlikram Əliyevin adı nədənsə bir sıra xoşagəlməz məqamlarda hallandırılır. Belə ki, sözügedən qurumun rəisini plagiatlıqda ittiham edən məlumatlı şəxs iddia edir ki, Əlikram Əliyev təxminən, 2 il bundan əvvəl başqasının məqaləsini öz adına çıxıraq onu rəsmi qəzetlərdən birində çap etdirməyə müvəffəq olub.
Lakin bu məsələnin üstünün bir müddət sonra açıldığını deyən mənbə bildirir ki, Bakı Şəhər Mədəniyyət və Turizm İdarəsinin rəisinin özününküləşdirməyə çalışdığı həmin məqalə «Mədəniyyətlərarası dialoq Azərbaycanın mədəniyyət siyasətində prioritet istiqamət təşkil edir» adı ilə çap olunub. Əlikram Əliyevin 2008-ci ilin iyun ayından Bakı Şəhər Mədəniyyət və Turizm İdarəsinin rəisi vəzifəsində çalışdığını vurğulayan məlumatlı şəxsin sözlərinə görə, həmin vaxtdan bu günə kimi adıçəkilən qurumda dözülməz vəziyyət hökm sürür: «Hər dəfə hansısa bayram və ya tədbirlər ərəfəsində idarə rəisi rəhbərlik etdiyi qurumun tabeçiyliyində olan bir sıra müəssisələrə zorla bilet satdırır. Həmin biletin pulu isə öncədən işçilərin əməkhaqlarından tutulur. Bundan başqa, Bakı Şəhər Mədəniyyət və Turizm İdarəsinin işçilərindən az qala hər ay müxtəlif bəhanələrlə pul yığılır. Məhz elə bu səbəbdən də Əlikram Əliyevin rəhbərlik etdiyi qurumda tətbiq edilən bir sıra «qayda»lar artıq işçiləri təngə gətirib. Çünki cəmi 150-200 manat əməkhaqqı alan işçilərdən hər ay müxtəlif bəhanə ilə pul tələb olunur ki, bu da mədəniyyət işçilərinin canını boğazına yığıb. Əlikram Əliyevə gəlincə, o, ümumiyyətlə, işçilərlə hesablaşmır, onları saymır. Bu isə Bakı Şəhər Mədəniyyət və Turizm İdarəsinin əməkdaşlarının haqlı narazılığına səbəb olur. İdarənin əməkdaşları məsələ ilə bağlı bir neçə dəfə Mədədiyyət və Turizm Nazirliyinə müraciət etsələr də, hələ ki, Əlikram Əliyev barəsində heç bir tədbir görülməyib».
Bakı Şəhər Mədəniyyət və Turizm İdarəsinin rəisinin dövlət vəsaitindən düzgün, səmərəli istifadə etmədiyini bildirən mənbə iddia edir ki, hələ bir neçə il öncə istifadəyə verilən qurumun rəsmi veb saytı kitabxana direktorlarından toplanılmış vəsaitlər hesabına formalaşdırılıb: «Hələ bu, harasıdır. Hansısa bir rəsmi tədbir keçirilərkən Əlikram Əliyev sərf olunan məbləğin az qala 5-10 misli qədərini büdcədən silinməsinə nail olur. O, bu işləri Dövlət Qulluğundan imtahan verməmiş təsadüfi adamlar vasitəsilə həyata keçirir. Onlardan bəziləri imtahandan kəsiliblər. Lakin idarə rəisi qanunazidd addım ataraq onları Bakı Şəhər Mədəniyyət və Turizm İdarəsinə işə qəbul edib». Mədəniyyət evləri və kitabxanalarda fəaliyyət göstərən kurs, eləcə də dərnəklərdən toplanan vəsaitlərin də mənimsənildiyini deyən məlumatlı şəxsin sözlərinə görə, rayonlar üzrə mədəniyyət müəssisələrə dövlət tərəfindən ayrılan pullar da həzrabedən keçirilir: «Bununla yanaşı, hazırda paytaxt Bakıda fəaliyyət göstərən mehmanxanaların, həmçinin turizm təşkilatlarının əksəriyyəti Bakı Şəhər Mədəniyyət və Turizm İdarəsinin tənqid hədəfinə çevrilməmək üçün Əlikram Əliyevlə «yola getmək» məcburiyyətindədirlər. Odur ki, «Sherlok’s Beach Camping», «Sərin», «Rigs Home», «Respublika lüks», «Respublika», «Red Roof», «Radışon Sas Plaza», «Park İNN», «Old City İNN», «Oazis», «Nur», «Novıy Dom», «Neapol», «Musado», «Monteneqro İN», «Metropol», «Meridian», «Lodc», «Xəzər Qolden Biç», « Karat İNN», «İrşad», «Park Həyat Baku», «Horizon», «Hillsayd», «Botik Palas Baku», «Austin» və «Af hotel» mehmanxanasının, o cümlədən «Krea», «Shabran D», «Royal Travels», «Miraj Travel», «Karvan D», «Travel İN Club LTD», «Konsul», «Private Person», «Muhajır», «Sevgun», «Oasıs Travel LTD», «Tour», «Magic Travel», «Vahid-S», «Skylife LTD», «Orkhan-MX», «Universal Travel», «Millennium Company LTD», «Jet Travel LTD», «Khazar Tour Travel», «Ulduz Tour», «Kanan-1» və «Advent Tur» turizm təşkilatının rəhbərliyi demək olar ki, ayda bir dəfə Bakı Şəhər Mədəniyyət və Turizm İdarəsinə «hesabat» verirlər. Elə buna görə də onların fəaliyyətinə heç bir maneçilik törədən, müdaxilə edən olmur...»
Ötən gün mövzu ilə bağlı ətraflı məlumat almaq, məsələyə aydınlıq gətirmək məqsədilə Bakı Şəhər Mədəniyyət və Turizm İdarəsinin 492-60-47 nömrəli telefonuna zəng etsək də, dəstəyi qaldıran olmadı. Odur ki, idarə rəhbərliyi istənilən vaxt qarşı tərəf olaraq mövqeyini bildirə bilər.
«Gündəlik Bakı»