“Məndən barmaqlıqlar arxasında da qorxursunuz”

Sabiq səhiyyə naziri Əli İnsanovun məhkəmə prosesi hazırda davam etdirilir. O, zalda yenə də şüşə qəfəs içində saxlanır.

Virtualaz.org saytı Əli İnsaovun bu gün sayca ikinci olan məhkəmə prosesindəki çıxışı haqda əlavə məlumat əldə etmək üçün onun vəkili Toğrul Babayevlə əlaqə saxlayıb.

Vəkilin sözlərinə görə, Ə.İnsanov hakimlərlə hirsli şəkildə danışaraq bildirib ki, hansı yollara əl atsalar da onun susdura bilməyəcəklər.

T.Babayevin sözlərinə görə, Ə.İnsanov daha sonra bunları qeyd edib: “Siz bağlı barmaqlıqlar arxasında da məndən qorxursunuz. Məni xalqımdan ayırmaq istəyirsiniz. Amma bunu bacarmayacaqsınız. Sizin gördüyünüz heç bir iş məni qorxutmur. Sizin qanunsuzluqlarınızı ifşa etməyə çalışacam”.

* * * 13:15

Vəkil Toğrul Babayev virtualaz.org saytına eksklüziv açıqlamasında dedi ki, Əli İnsanov məhkəmədə sərt danışıb: “Sabiq nazir üzünü hakimlərə tutaraq bunları dedi: “Sizin məhkəmələr orta əsr divanxanalarından da betərdir. Siz iqtidarın sifarişini yerinə yetirirsiniz. Bəli, mənim səsimi batıra bilərsiniz. Amma sizin cinayətlər haqda bütün dünya danışır. Mən bir dəfə bu şüşələri qırmışam və yenə də qıracağam. Mənim müraciətlərimin, dediklərimin hamısı haqdır, siz isə nahaqsınız”. Əli müəllim bunları deyəndən sonra hakim iclası tələm-tələsik yekunlaşdırdı”.

* * * 12:51

Bu gün sabiq səhiyyə naziri Əli İnsanovun məhkəməsi olub.

Virtualaz.org saytının hazırda Bakı Apelyasiya Məhkəməsində olan əməkdaşı xəbər verir ki, proses saat 11:00-a nəzərdə tutulsa da 12:05-də başlayıb.

Hakim Sənan Hacıyevin sədrliyi ilə keçirilən prosesdə Əli İnsanovun Penitensiar Xidmətə və Ədliyyə Nazirliyinə qarşı apelyasiya şikayətinə baxılıb. Xatırladaq ki, şikayət Avropa İnsan Haqları Məhkəməsinin Əli İnsanova qarşı işgəncə faktını tanıması ilə bağlı verilmişdi. Məhkəmə qərar qəbul edib ki, bu iddiaya 1 saylı Bakı İnzibati İqtisad Məhkəməsində baxılsın.

Müxbirimiz bildirir ki, Əli İnsanovun bu gün Apelyasiya Məhkəməsində baş tutan məhkəməsi qeyri-adi şəraitdə keçirilib. Belə ki, sabiq nazir üçün xüsusi şüşə qəfəs düzəldiblər, elə qəfəs ki, onun içindən kənara səs yayılmır. Proses ciddi təhlükəsizlik tədbirlərinin müşayiəti altında aparılıb. Ötən prosesdən fərqli olaraq jurnalistlərin foto və videokameraları, diktofonları və digər texniki avadanlıqlar nəzarətçilər tərəfindən alınıb. Mətbuat nümayəndələrinin üstü ciddi yoxlanıb. Bunun hansı xidmətə məxsus əməkdaşlar tərəfindən edildiyi məlum deyil, çünki həmin şəxslər mülki geyimdə alıb.

Əli İnsanov isə məhkəmə zalında quraşdırılmış xüsusi şüşə qəfəsə salınıb. Onun səsini yalnız bir halda eşitmək olurdu - hakim Sənan Hacıyev əlindəki xüsusi pultu basanda. Əli İnsanov ətrafı yalnız bu halda eşidə bilirdi. Eləcə də onun səsi ətrafdakılara yalnız bu halda çatırdı. Hakim düyməni basmayanda sabiq nazir nə qədər ucadan danışsa da eşidilmirdi. O da vəkillərini eşidə bilmirdi.

Əməkdaşımız bildirir ki, bu vəziyyət sabiq nazirin vəkillərinin də ciddi etirazına səbəb oldu. Lakin hakim buna məhəl qoymadı. Əli İnsanov və onun vəkilləri məcbur qalaraq bir-birləri ilə işarələrlə, əl-qol hərəkətləri ilə danışmağa başladılar. Əli İnsanov bundan qəzəblənsə də onun nə dediyi yenə də eşidilməyib. Vəkillər bu dəfə onunla kağıza mətn yazaraq şüşə arxasından oxumasını istədilər.

Vəkil Toğrul Babayev virtualaz.org saytına dedi ki, bu, sabiq nazirin və vəkillərinin hüquqlarının pozulmasıdır.

Müxbirimiz xəbər verir ki, Ə.İnsanovun Ədliyyə Nazirliyinə qarşı iddiasına baxıldı və iş 1 saylı İnzibati İqtisad Məhkəməsinə göndərildi.

Qeyd edək ki, Əli İnsanovun bu gün daha bir şikayəti ilə bağlı məhkəmə prosesi keçiriləcək. Məhkəmə saat 14:30-da sabiq nazirin Ali Məhkəmənin Plenumunun qərarı ilə bağlı şikayətinə baxacaq.

◀▶
* * * 11:42

Sabiq səhiyyə naziri Əli İnsanovun apelyasiya məhkəməsi ləngiyir.

Virtualaz.org bildirir ki, “Yeni Müsavat”ın müxbirinin verdiyi məlumata görə, Bakı Apelyasiya Məhkəməsində saat 11.00-da başlamalı olan məhkəmə qeyri-müəyyən vaxta qədər gecikir. Əli İnsanovun məhkəməyə saat 12 radələrində gətiriləcəyi gözlənilir. Müxbir dəqiqləşdirib ki, sabiq naziri gətirən maşın yola çıxıb. Amma onun məhkəməyə nə vaxt çatacağı bəlli deyil.

Qeyd edək ki, bugünkü məhkəmə prosesində Əli İnsanovun Ədliyyə Nazirliyinə qarşı iddiasına baxılacaq.