Məhkəmə prosesini ABŞ-ın Azərbaycandakı səfirliyinin nümayəndəsi və Müsavat Partiyasının təmsilçiləri də müşahidə ediblər

“İsmayıllı işi”ndə nahar fasiləsindən sonra məhkəmə prosesi şahidlərin ifadə verməsi ilə davam etdirilib.
Şahid İsmayıllı rayonu polis şöbəsinin rəis müavini Şöhrət Kərimov ifadə verərək, hadisə zamanı təqsirləndirilən şəxslərdən Vasif İbrahimovu, Şükran Möhbalıyevi, Cəfər və Anarı gördüyünü bildirib. O, hətta Şükran Möhbalıyevə “40 dəfə xəbərdarlıq” etdiyini deyib. Rəis müavini Tofiq Yaqublu və İlqar Məmmədovun da orada olduğunu və onların insanları ixtişaşa dəvət etdiklərini, daş atdıqlarını iddia edib.
Vəkil Nemət Kərimli şahid Ş.Kərimovdan T.Yaqublunun Bakıdan gəldiyini haradan bildiyini soruşduqda şahid “onları otağıma gətirmişdilər” deyə cavab verib. İ.Məmmədovu isə, onun camaatın içinə olması səbəbindən tapa bilmədiklərini deyib.
İ.Məmmədovun şahid Ş.Kərimova yönəlik “siz mənim orda olduğumu kimdən eşitdiniz” sualına isə, şahid kobud bir şəkildə “siz kiminlə danışdığınızı bilirsiniz?” - deyə cavab verib. Hakimin müdaxiləsindən sonra o, sualı cavablandıraraq, Vahid Məhərrəmov və Nicat Vəliyevin xəbər verdiyini bildirib.
Daha sonra şahid Ş.Kərimova T.Yaqublu tərəfindən suallar verilib. T.Yaqublunun “siz yalan danışmağın cinayət olduğunu bilirsinizmi?” və “siz üzədurmağın biqeyrətlik olduğunu bilirsinizmi?” kimi suallarına hakim etiraz edib. T.Yaqublunun “məni sizin otağınıza kim gətirmişdi” sualına cavabında şahid Şöhrət Kərimov Nicat Vəliyevin adını çəkib.
T.Yaqublu isə hakimə N.Vəliyevin ifadəsini xatırladaraq, adıçəkilən şəxsin onu qapıda qoyaraq, getdiyini deyib. Bundan sonra Ş.Kərimov sözünü dəyişərək, onların şöbəyə gətirildiklərini söyləyib.
T.Yaqublunun “niyə sizin otağınıza ancaq jurnalistlər gətirildi” sualına isə Ş.Kərimov “orada olan camaata siz ruh verirdiniz” deyə cavab verib. T.Yaqublunun “ayın 24-də mənə zəng etmişdiniz” sualına Ş.Kərimovun “yox” deməsindən sonra T.Yaqublu üzünü hakimə tutaraq, “bax, elə buna görə də telefon danışıqlarını gətizdirmirsiniz. Çünki o, ayın 24-də mənə zəng edib” deyə söyləyib.
T.Yaqublu həmçinin bildirib ki, onları ilk dəfə polis bölməsinə aparıb, buraxdıqdan sonra hətta benzinlərini belə vurublar: “Sizdə belə bir praktika varmı ki, cinayətkar adlandırdığınız şəxsi maşınına benzin vurub, yola salırsınız. Biz yanacaqdoldurma məntəqəsinə gəlib, benzin vuranda bizdən pul almadılar”.
Daha sonra T.Yaqublu şahid Ş.Kərimovdan hadisə zamanı çəkilişlərin olub-olmadığını, həmin çəkilişlərdə onu və İ.Məmmədovu görüb-görmədiyini də soruşub. Ş.Kərimov isə, cavabında jurnalistlərin hamısını T.Yaqublunun gətirdiyini iddia edib: “Ona görə də kadrlarda yoxsunuz”. T.Yaqublu isə deyib ki, “belə çıxır ki, “Lider”, “AzTV” və digər telekanallar mənim sözümlə oturub, dururlar”.
Təqsirləndirilən Şükran Möhbalıyev şahid Ş.Kərimovun onu hədələdiyini deyib: “Mənə dedi ki, təqaüdə çıxamağıma 6 il qalıb. Ona kimi sənə 10 il verdirəcəm. İndi sual verirəm ki, niyə o, mənə belə deyib”.
Hakim Rəşid Hüseynovun vəkillərə dəfələrlə xəbərdarlıq etməsi və şahidə verilən sualları “təkrar sualdır” deyərək çıxartması təqsirləndirilən şəxslərin qəzəbinə səbəb oldu və onlar Ş.Kərimovu yalan danışmaqda suçladılar. Ona görə də hakim şahid Ş.Kərimovu zaldan çıxartdı.
Bundan sonra vəkil Xalid Bağırov “bu məhkəmə prosesi Stalin dövrünü xatırladır, 2 nəfər söyüş söydüyünə görə digərlərinin haqqı tapdalanır” deyərək, hakimə etiraz etdi.
Ancaq növbəti şahid Qələndər Muxtarlının ifadəsi alındıqdan sonra şahid Ş.Kərimov yenidən məhkəmə zalına dəvət edildi və ona suallar verildi. Bununla belə, bu dəfə də verilən suallar şahid tərəfindən tam cavablandırılmırdı.
Daha sonra İsmayıllı rayonunun sahə müfəttişi Azay Ağayev şahid qismində ifadə verib. O, T.Yaqublu və İ.Məmmədovun üzünə duraraq, təqsirləndirilən şəxslərin rayon təhsil şöbəsinin qarşısında insanları ixtişaşa çağırdıqlarını bildirib.
Məhkəmə prosesini Müsavat başqanının müavini Gülağa Aslanlı və partiyanın bir sıra digər təmsilçiləri, eləcə də, ABŞ-ın Azərbaycandakı səfirliyinin nümayəndəsi də müşahidə ediblər.
Növbəti məhkəmə prosesi fevralın 4-də saat 10:00-da keçiriləcək.