Bu gün “İsmayıllı işi”ndə növbəti məhkəməsi prosesi keçirilib. Təqsirləndirilən şəxslərin məhkəməyə gec gətirilməsi, eləcə də vəkillərin bir qisminin gecikməsi səbəbindən prosesin başladılması yubadılıb.

Nəticədə məhkəmə prosesi saat 10:30-da başlayıb. Bu dəfəki prosesdə şahidlər dindirilib. İlk olaraq, “Çıraq” otelinin qeydiyyat şöbəsində çalşan Vüsalə Həsənova şahid qismində ifadə verib. O, təqsirləndirilən şəxs Anar Həsənovdan başqa heç kəsi tanımadığını deyib.

Şahidlərdən Habil Abdullayev, Rahim Əliyev, Elton Əşrəfov, Xəyal Kərimov, Rəvan Osmanov, Vüsal Sabirli, Taleh Muradlı, Yüsif Səlimov, Sübhan Əzimov, Ramil Cavadov və Bəhruz Həşimov İsmayıllıdan olan təqsirləndirilən şəxsləri tanıdıqlarını, hadisə vaxtı onları orada görmədiklərini və Müsavat Partiyası başqanının müavini, “Yeni Müsavat” qəzetinin köşə yazarı Tofiq Yaqublunu və REAL Hərəkatının sədri İlqar Məmmədovu görmədüklərini və tanımadıqlarını deyiblər. Tofiq Yaqublunun vəkili Nemət Kərimli 100 nəfər şahidin olduğunun qeyd edib. Həmin şahidlərdən cəmisi 21 nəfəri dindirilib.

Şahid Baba Kərimov öz ifadəsində bunları deyib:

- Təqsirləndirilən şəxsləri rayon sakini olduqları üçün tanıyıram. Tofiq Yaqublu və İlqar Məmmədovu tanımıram və görməmişəm. Mən hadisə vaxtı evdə idim. Yanvarın 24-də gecə saat 2-də Kəpənək dairəsində camaat var idi. Amma polis işçiləri daha çox idi. “Çıraq” otelin yandırılmasını isə görməmişəm.

Şahid Pərviz Bağırov:

- Təqsirləndirlən şəxsləri Tofiq Yaqublu və İlqar Məmmədov istisna olmaqla, üzdən tanıyıram. Mənim evim otelin yaxınlığında yerləşir. Özüm taksi sürücüsüyəm. Yanğın baş verməzdən əvvəl Emil Şəmdinov İsmayıllıları təhqir etdi və camaat da buna etiraz etməyə başladı. Ondan sonra nələr baş verdi, bilmirəm. Elə otelin yandığını da evimdən görmüşəm.

Şahid Şöhrət Nəzərov:

- Təqsirləndirilən şəxsləri rayon sakini olduqları üçün tanıyıram. Bu şəxslərlə heç bir düşmənçiliyim yoxdur. Amma Tofiq Yaqublu və İlqar Məmmədovu heç vaxt görməmişəm və tanımıram. Hadisə vaxtı, 23 yanvarda mən dükanda işləyirdim. Gördüm ki, ağ xarici maşın sürətlə mənim üstümə tərəf gəlir. Tez kənara çəkildim. Sonra həmin maşın 07 ilə toqquşdu. Xarici maşınını sürən Emil Şəmdinov maşından düşərək, “kimindir, bu maşın...” - deyə qışqırdı. Həmin 07-nin sahibi Ramin gəldi ki, mənim maşınımdır, heç nə olmaz. Sonra dava elə orada başladı. Emil Raminin gözünə yumruqla vurdu. Sonra müdiryyət bizə dükanı tapşırdı, biz də bağlayıb, getdik.

Şahid Xəyyam Heydərov:

- Təqsirləndirilən şəxsləri rayon camaatı kimi tanıyıram. Bu şəxslərlə heç bir düşmənçiliyim yoxdur. Amma Tofiq Yaqublu və İlqar Məmmədovu heç vaxt görməmişəm, tanımıram. Hadisə vaxtı, yanvarın 23-də evdə idim, yatırdım. Rayonda baş verənləri isə səhər eşitmişəm. Məni də yanvarın 24-də siqaret alıb, qayıdanda tutdular.

Hakim saat 11:10-da fasilə elan edib. 10 dəqiqəlik fasilədən sonra digər şahidlər də dindirilib.

Şahid Əlyar Cəfərov:

- Rayon sakini kimi İsmyaıllıdan olan dustaqları tanıyıram. Tofiq Yaqublu və İlqar Məmmədovu görməmişəm, tanımıram. Yanvarın 23-də Kəpənək dairəsində mən taksidən enərkən kameraya düşmüşəm. Yanvarın 24-də səhər saat 10-11 arası məni tutub, apardılar.

Şahid danışarkən hakim R.Hüseynov onun əvvəl verdiyi izahatla indiki danışdıqları arasında ziddiyyətin olduğunu qeyd edib: “Əlyar Cəfərov, sən öz izahatında həmin hadisələri görüb, videoya çəkdiyini demisən.”

Əlyar Cəfərov əvvəlcə bunu inkar etsə də, izahat oxunduqdan sonra, fikirlərin ona aid olduğunu təsdiqləyib: “Bəli, gördüyüm hadisələri videoya çəkdim. Sonra aparıb, evdəkilərə göstərdim. Evdə “başına bir iş gələr” - deyə videonu sildirdilər”.

Şahid Orxan Lətifli:

- Təqsirləndirilən şəxslərin heç birini tanımıram. Hadisə bizim evimizin qarşısında baş verib. 10-15 dəqiqə orada oldum, sonra atam gəlib, məni apardı.

Şahid Elxan Mikayılov:

- İsmayıllıdan olan təqsirləndirilən şəxslərin çoxunu tanıyıram. Yanvarın 24-də saat 7-8 radələrində evə gəldim. Atamın səhhəti pisləşmişdi, beyninə qan sızmışdı. Tez evdən çıxıb, dərman almağa getdim. Elə oradaca saat 9-10 arası camaatın içərisində məni tutub, apardılar. 10 sutka da iş verdilər.

Məhkəmə 14:30-da nahar fasiləsi verənə qədər 20 şahid dindirilib.

Nərgiz Yaqublu