Şahin Həsənli: “Bu iş belə qalmayacaq, Avropa məkəməsinə müraciət edib bəraət almağa çalışacağam”

gundemxeber.az “Mən etmədiyim cinayətə görə 21 ay məhkum olunmuşam. Bu iş belə qalmayacaq. Avropa məkəməsinə müraciət edib bəraət almağa çalışacağam. Yəqin ki, maddi tələblərim də olacaq”- bunu ölkə prezidentinin əfv sərəncamı ilə cəzasının 3 ay çəkilməmiş hissəsindən azad olunan AXCP-nin təşkilat şöbəsinin müdiri Şahin Həsənli müsahibəsində bəyan etdi. Ş.Həsənli eyni zamanda azadlığa buraxılmasında rolu olan bütün dostlarına, xüsusilə də azad demokratik mətbuata, insan haqlarının müdafiəsi ilə məşğul olan hüquq müdafiəçilərinə təşəkkürünü bildirərək, müxalifətdə cərəyan edən hazırki prosesləri də diqqətə çatdırdı. O, öz həbsində bir şeyə heyfsiləndiyini dedi.

- Şahin bəy, siyasətçinin belə ekstrimal vəziyyətlərlə qarşılaşması ehtimalı qaçılmazdır. Heç düşündünüzmü ki, nəyə görə başqası deyil, məhz siz həbsə getdiniz?
- Mən AXC-nin rəyasət heyətinin üzvü olmaqla yanaşı, həm də 2001-ci ildən AXCP-nin təşkilat komitəsinin üzvüyəm. 2005-2006-cı illərdə 2 dəfə 15 gün olmaqla həbsdə yatmışam. Mitinqlərin təşkilində mənim xüsusi rolum olub. 2 aprel mitinqinin əsas təşkilatçılarından biri idim. Həbsə atılmağım hökumətin mənim ümumi fəaliyyətimə verdiyi “qiymət” idi. Bundan əlavə, partiyada Əli Kərimli ilə yaxın münasibətdə olmuşam, onunla tez-tez görüşmüşəm. Onlar həm Əli bəyə təzyiqlər etmək, həm də məni cəzalandırmaq üçün bunu etdilər. Bir sözlə, siyasi mübarizəmə görə hədəf seçilmişəm. Mitinq ərəfəsində maşınımda, hətta evimdə axtarışlar aparıblar. Polis təqibindən yayınmaq üçün Şəmkirdə dostumun evində gizlənmişdim. Məni yatdığım yerdə aparıblar, cibimdən 5 saylı patron çıxarıblar. Bu ittihamlar məhkmədə sübut olunmadı, çünki patrona əlim dəyməmişdi. Patronlarda əl izlərinin, patronların nömrələrinin hansı idarəyə məxsus olmasının yoxlanması barədə vəsatət versək də, bu araşdırılmadı.

- Bu gün sizin əfv edilməniz hansısa Avropa ölkəsi tərəfindən deyil, məhz ölkə başçısı tərəfindən verilən sərəncamla gerçəkləşib. Bu barədə nə düşünürsünüz?
- Yaxşı, axı mən nə etmişdim ki, məni həbs etdilər? Mən siyasətlə məşğul olduğuma görə həbs olunmuşam. Heç bir cinayət törətməmişəm. Nəyə görə həbsdən azad olunduğuma görə kiməsə təşəkkür etməliyəm. Bu gün sadəcə mənə qarşı edilən səhvi düzəldiblər.

- Müxalifət düşərgəsində gedən prosesləri həbsxanadan necə müşahidə edirdiniz?
- Hesab edirəm ki, Azərbaycanda dəyişiklik etmək istəyən qüvvələr bir araya gəlməlidir. Çünki təklikdə mübarizə aparmaq heç bir partiyanın bacaracağı iş deyil. Bütün mütərəqqi qüvvələr bir araya gəlib mübarizə aparmalıdır. Mən ayrı-ayrılıqda mübarizə aparan partiyaların uğur qazanacağını düşünmürəm. İndi azadlıqdayam və müxalifətin bir araya gəlməsində öz köməkliyimi göstərəcəyəm.

- Müxalifətçi dostlarınızın sizi də ittihamlamasından qorxmursunuz?
- Əgər mən düz yoldayamsa qorxmuram. Mən öz mövqeyimi ortaya qoyacağam.

- Bu gün bəllidir ki, AXCP və Müsavat Partiyalarının üzvləri bir-birinə qarşı ittihamlar səsləndirməkdə davam edirlər. Müxalifətin bu vəziyyətini görüb heyfsiləndiniz?
- Müxalifətdə belə halların olması xoşagələn deyil. Amma bu o demək deyil ki, biz mübarizəmizi dayandırmalıyıq. Digər tərəfdən mən öz həyatımı yaşayıram. Müxalifətdə baş verən belə hadisələri ötəri sayıram. Yəqin ki, hər şey öz qaydasına düşəcək və yəqin ki, partiyalar arasında məqbul bir variant tapılacaq.

- Nəyə görə AXCP ilə Müsavatın bir-birinə qarşı ittihamları səngimir?
- Siyasətdə hər anın öz hökmü olur. Bu gün müəyyən məsələlərə görə partiyalar arasında müəyyən narazılıq varsa, sabah hansısa yolla buna son qoyula bilər. Demokratik kəsim bir yerdə olmağa məhkumdur.

Tahirə Qafarlı