Elmar Məmmədyarov Bağdadı “Cənub qaz dəhlizi”inə qoşulmağa çağırdı

Hər gün qanlı terror aktlarının baş verdiyi İraqa ezam edilən Azərbaycan xarici işlər naziri Elmar Məmmədyarov bu saatlarda Bağdadda iraqlı həmkarı Xoşiyar Zəbari ilə keçirdiyi birgə mətbuat konfransında sensasion bəyanatlar verib.

Virtualaz.org saytı Fransanın “Le Figaro” qəzetinə istinadən xəbər verir ki, Elmar Məmmədyarov İraqı Xəzər dənizini Avropa İttifaqı ilə birləşdirən “Cənub qaz dəhlizi”inə qoşulmağa çağırıb.

Məmmədyarov deyib ki, Azərbaycan İraqa öz qazını Avropaya nəql etməkdə kömək göstərməyə hazırdır. Onun sözlərinə görə, Bağdadda aparılan danışıqlar zamanı İraq rəsmiləri bu irimiqyaslı layihədə iştirakda maraqlı olduqlarını bildiriblər.

“Bu, böyük layihədir və İraq üçün açıqdır. İraq da bu dəhlizlə öz təbii qazını Avropaya ixrac edə bilər. Biz bu məsələ ilə bağlı danışıqlar aparmağa hazırıq” - deyə Məmmədyarov bildirib.

Azərbaycan xarici işlər naziri həmçinin deyib ki, ölkə parlamenti Bağdadda səfirliyin açılmasına dair qərarı təsdiqləyib və tezliklə Azərbaycanın İraqda diplomatik missiyası fəaliyyətə başlayacaq.

Məmmədyarov həmçinin İraq baş naziri Nuri Əl-Maliki ilə görüşündə terrorla mübarizədə Bağdada kömək etməyə hazır olduqlarını deyib. “Bakı bu məsələdə Bağdadla əməkdaşlığa və bütün regionu təhdid edən terrorçuluqla mübarizədə informasiya mübadiləsinə hazırdır” deyə nazir bildirib. Məmmədyarov həmçinin Azərbaycan şirkətlərinin İraqda işləməyə və xüsusən energetika sektoruna yatırımlar qoymağa hazır olduqlarını da deyib.

Azərbaycan xarici işlər nazirinin Bağdada səfəri və orada səsləndirdiyi bəyanatlar rəsmi Bakının İraq qazı uğrunda mürəkkəb geosiyasi mübarizəyə qoşulmasından xəbər verir. Belə ki, İraqın şimalında, de-fakto muxtariyyətə sahib Kürdüstan bölgəsində nəhəng qaz ehtiyatları var və bu ehtiyatların hasilatı, dünya bazarına nəqli ətrafında bir çox dövlətlər öz maraqlarını təmin etməyə çalışır.

Mərkəzi İraq hökuməti ilə regionun kürd hökuməti arasında bu məsələdə qarşıdurma var. Kürd hökuməti bu bölgədə qaz hasilatında və nəqlində söz sahibi olmaq istəyir. Lakin mərkəzi İraq hökuməti bəyan edir ki, kürd bölgəsinin təbii ehtiyatları bütün İraq xalqına məxsusdur və Bağdadın razılığı olmadan hasil oluna, nəql edilə bilməz. Türkiyə hökuməti də neçə vaxtdır kürd bölgəsindən hasil olunacaq qazın nəqlində söz sahibi olmağa çalışır. Bu məqsədlə Türkiyə hökumətinin Kürdüstan bölgə hökuməti ilə separat danışıqlar apardığı haqda məlumatlar var.

Baş nazir Ərdoğan ötən ilin payızında kürd hökumətinin başçısı Məsud Bərzanini Türkiyədə təntənəli şəkildə qəbul edib və ilk dəfə “Kürdüstan” ifadəsini işlədib. Bir neçə gün əvvəl isə Türkiyənin enerji və təbii ehtiyatlar naziri Taner Yıldız deyib ki, İraq qazı Türkiyənin Azərbaycan, Rusiya və İrandan aldığı bahalı qazdan imtina etməyə imkan verərdi. Nazir İraqın qaz yataqlarının Türkiyəyə çox yaxın olduğunu və bu yataqlardan qaz nəqlinin ucuz başa gələcəyini deyib.

Belə bir vaxtda Azərbaycan prezidenti İlham Əliyev də xarici işlər nazirini Bağdada ezam edib və onun vasitəsilə İraq hökumətinə “Cənub qaz dəhlizi”inə qoşulmaq təklifini çatdırıb.Başqa sözlə, Azərbaycan Avropa üçün təkcə qaz təchizatçısı kimi qalmaq istəmir və yeni açılan enerji dəhlizində əsas söz sahibi olan ölkələrdən birinə çevrilmək üçün böyük oyuna qoşulur.