Rayondan gələn xəbərlər çox utancvericidir

Prezident Administrasiyasına göndərilən şikayətlərə Masallı rayonu liderlik edir; Masalının 3 ay əvvəl əsaslı təmirdən sonra istismara verilən kəndlərarası yolları dağılır…
Masallıda 1 il öncə çəkilən kəndlərarası yollar bərbad vəziyyətə düşüb. 4,6 milyon manat sərf olunan kənd yolları dağılır. Qeyd edək ki, 2 ay öncə Masallı rayon icra başçısı Rafil Hüseynovun rayon yollarının təmiri üçün xərclədiyi 4,6 milyon manat vəsaitin yarıdan çoxunun mənimsənilməsi haqqında məlumat yaymışdı. Bu barədə Masallıdan daxil olan məlumatda göstərilir ki, icra başçısı Rafil Hüseynovun təmir etdirdiyi kənd yolları artıq bərbad vəziyyətdədir və rayonun 41 saylı Masallı Yol İstismar İdarəsi dağılmış yolları dayanmadan bərpa etməklə icra başçısınının maliyyə maxinasiyalarını ört basdır etməklə məşğuldur.
Redaksiyamıza daxil olan məlumatda bildirilir ki, 2013-cü ildə Masallının Həsənli-Xırmandalı kənd arası yolun təmirinə 1082563 manat vəsait sərf olunub. Həmin yolu «Elnur-2» UİKŞ şirkəti təmir edib. Kürdəbaz-Qarğalıq kənd arası yollarının təmirinə isə 595240 manat vəsait xərclənib. «Elnur-2» UİKŞ şirkəti bu yolun da təmirinə reallaşdırıb. Məlumat verən mənbə bildirir ki, hazırda hər iki yol dağılır və 41 saylı Masallı Yol İstismar İdarəsi həmin yollarda bərpa işləri aparır. Daxil olan məlumatda göstərilir ki, «Elnur-2» UİKŞ şirkətinin təmir etdiyi başqa bir yol Musaküçə-Lürfən kəndlərarası yolu olub. Bu yolun təmirinə 1846360 manat xərclənib. Seybətin-Səmidxan-Alışanlı-Ətcələr kəndlərarası yollarında isə «Elnur-2» UİKŞ şirkəti 445396 manat vəsaiti havaya sovurub. Qəriblər-Qodnan kəndlərarası yollarının təmiri isə 445720 manata başa gəlib və təmiri edən şirkət yenə də «Elnur-2» UİKŞ olub.
Səruçlar-Sirəbil kəndlərarası yollarının təmiri üçünsə dövlət 196897 manat ayırıb. Təmir işləri Masallının tanınmış iş adamlarından olan Hacı Mazana məxsus «Bayram-M» MMC şirkəti həyata keçirib. Və nəhayət Masallı şəhərdaxili yollarının təmirinə 544552 manat xərc çəkilib və təmir işlərini «Bayram-M» MMC şirkəti həyata keçirib.
Məlumatı verən mənbə iddia edir ki, icra başçısı Rafil Hüseynov yuxarıda qeyd olunan kənd yollarının təmirini həyata keçirən şirkətlərlə əlbir olaraq ayrılan milyonlarla manat vəsaitin bir hissəsini «kitabdan kitaba» salaraq mənimsəyib. Bildirilir ki, çəkilən kənd yollarının layihə smetasa cədvəlində qoyulan asfaltın qalınlığının 10-12 sm göstərilsə də, yola döşənən asfaltın qalınlığı 4-5 sm olub. Elə bu üzdən də təmirinə 5 milyon manata yaxın dövlət vəsaiti sərf olunan həmin yollar artıq dağılır və icra başçısı Rafil Hüseynov öz «səhvini» ört-basdır etmək üçün hazırda həmin yollara «yamaq» vurdurur və cəmi yarım il əvvəl 5 milyona yaxın vəsit sərf olunan yolların təmirinə əlavə vəsait sərf edir. Ən acınacaqlı vəziyyət isə yeni təmir olunan Masallı şəhər küçələrinin asfalt örtüyünün dağılmasıdır. İcra başçısı Rafil Hüseynov Yol İstismar İdarəsinin vasitəsi ilə şəhər daxili yollarındakı bu acınacaqlı vəziyyəti ortadan qaldıra bilsə də, dağılmış kənd yollarının bərpa edilməsi çox çətin olacaq.
Mənbə onu da qeyd edir ki, son zamanlar Masallı rayonunda sosial problemlərlə bağlı narazılıqların artması və icra başçısının “xeyir duası” ilə rayon büdcə təşkilatlarında baş alıb gedən korrupsiya bataqlığının gündəmə gəlməsi Rafil Hüseynovu ciddi şəkildə narahat edib.
Məlumatda xüsusi olaraq vurğulanır ki, Prezident Administrasiyasına rayonlardan daxil olan şikayət məktublarına görə, Masallı ilk yerlərdən birini tutur və bu şikayətlərin böyük hissəsi Rafil Hüseynovun çəkdiyi yollarla bağlıdır. Digər şikayətlər isə ayrı-ayrı dövlət qurumlarının, həmçinin icra hakimiyyətinin yarıtmaz fəaliyyəti barədədir.
Qeyd edək ki, Masallı rayonunda büdcə təşkilatlarının Rafil Hüseynovun himayəsi altında həyata keçirdikləri maliyyə maxinasiyaları ilə bağlı redaksiyamıza göndərilən ilginc məlumatları dəqiqləşdirdikdən sonra oxucularımıza təqdim edəcəyik.
Qarşı tərəfin də mövqeyini dərc etməyə hazırıq…