Ağcabədi sakinin harayına cavab verən yoxdu

Laçın rayonunun Şeylanlı kəndindən məcburi köçkün, hal-hazırda Ağcabədi şəhər E.İsmayılov küçəsi, ev 45-də müvvəqqəti məskunlaşmış Baxışov Müqabil Baxış oğlu tərəfindən şikayət məktubu daxil olmuşdur. Məktubu olduğu kimi təqdim edirik:
“2012-ci ilin mart ayından başlayaraq bütün dövlət orqanlarına və KİV-lərə müraciət edirdim ki, Laçın rayonunun idarə və müəssisələri korrupsiya çirkabında boğulur. Aidiyyatı dövlət orqanları bu haqlı tələbimə susmaqla cavab verirdi. Dövlət orqanlarının rayonumuzda olan biabırçı vəziyyətə seyrçi mövqedən yanaşması Laçın rayonunun sabiq icra başçısı R.Cəbrayılovu mənə qarşı sərt tədbirlər görməsinə şərait yaratdı. Aidiyyatı dövlət orqanlarının vətəndaş hüquq və azadlıqlarımın pozulmasına biganə yanaşması sayəsində günahsız yerə həbs olundum, bütün əmlakım rüşvət alındı və mənə həm maddi həm də mnəvi zərər dəydi. 2013-cü ilin mart ayının 4-də Azərbaycan Respublikasının prezidenti İ.Əliyev cənablarının sərəncamı ilə Laçın rayon İH-nın Başçısı R.Cəbrayılovun tutduğu vəzifədən azad edilməsi və həmin vəzifəyə A.Səlimovun təyin olunması bizləri nə qədər sevindirdisə də, bir o qədər də yanıldığımızın şahidi olduq. A.Səlimov rayona rəhbərlik etdiyi bu bir il müddətində rayon 1992-ci ilin hakimiyyətsizliklərini, özbaşnalıqlarını yenidən yaşadı. Korrupsiya, rüşvətxorluq, əliəyrilik hakim oldu. A.Səlimov əvvələr polis rəisi işlədiyindən rayonu totalitar polis rejimi ilə idarə edir. Haqqı tələb edən sakinlər, ədaləti işıqlandıran mətbu orqanlar məhkəmələrlə hədələnir. Azərbaycan Respublikasının möhtərəm Prezidenti İ.Əliyev cənablarının ölkə məmurlarına verdiyi ciddi tapşırıqlardan da A.Səlimov heç bir nəticə çıxarmadı. A.Səlimovun şəxsi maraqları Laçının təhsilini də dəhşətli bir fəlakətlə üz-üzə qoyub. 2013-2014-cü tədris ilində məktəblərin qızdırılmasına, inventar və avadanlıqların alınmasına, məktəblərin əsaslı və cari təmirinə ayrılmış vəsaitin 50-60%-i şəxsi ciblərə axdı. 2013-cü il ərzində rayonun bir sira fin tipli məktəblərinin təmirinə ayrılmış vəsaitlə hətta yeni məktəb tikmək mümkün olardı. Halbuki, həmin vəsaitin 10 %-dən artığı həmin məktəblərə xərclənməyib. 2013-2014-cü tədris ilində rayon məktəblərinin hesabatları qəbul olunarkən sinif komplektlərinin sayı nəzərə alınmaqla hər bir məktəb direktorundan 300-700 manat məbləğində vəsait toplanıldı. Korrupsiyanın hakim olduğu rayonumuzda elə məktəblər var ki, qapısı aylarla açılmır. Hətta, bir çox məktəblərin şagird və müəllimləri bir birini tanımırlar. Məktəblərdən aylıq yığılan vəsaitin acı nəticəsidir ki, fizika, kimya, biologiya, Azərbaycan dili və ədəbiyyatı dərsləri bir çox məktəblərdə formal olaraq ibtidai sinif və fiziki tərbiyyə müəllimlərinə "tədris" etdirilir. Bunun da nəticəsində təlimin və tədrisin keyfiyyəti olduqca aşağı düşür.
Rayonun kadr siyasəti də A.Səlimovun şəxsi maraqlarına xidmət edir. Hətta vəziyyət o yerə çatıb ki, A.Səlimov öz şəxsi maraqları naminə saxta diplomlu "kadrları" idarə müdiri, məktəb direktoru, icra nümayəndəsi və s. təyin edir. Rayonun yaşıllaşdırma idarəsinə ayırılan vəsaitin 30%-i təyinatı üzrə xərclənsəydi, Taxta Körpü qəsəbəsi ərazisində böyük bir meşə massivi salınmış olardı. Təəssüf hissi ilə qeyd etmək lazımdır ki, rayon mərkəzi sayılan Taxta Körpü qəsəbəsinin abadlığı üçün ayrılmış vəsaitin də 60-70 %-i mənimsənilir. Buna misal olaraq göstərə bilərəm ki, A.Səlimov başçı işlədiyi bu bir il ərzində Taxta Körpü ilə 552 saylı köçkünlər qəsəbəni birləşdirən 3 km-lik yolun kənarında salınan səki hələ də başa çatmayıb. Çünki hər il abadlığa ayrımış vəsaitin böyük bir hissəsi bu yol kənarındakı səkinin salınmasına yazılaraq mənimsənilir. Yuxarıda göstərdiklərimin nəticəsidir ki, A.Səlimov işlədiyi bu bir il ərzində respublikanın ayrı-ayrı bölgələrində məskunlaşmış Laçınlı köçkünlər bir neçə dəfə A.Səlimova etiraz əlaməti olaraq dövlət yolunu kəsməyə cəhd etmişdirlər.
Hörmətli redaksiya!
Rayonumuzda yaranmış bu korrupsiya fırtınasına etirazımı bildirdikdə yenidən həbs olunacağımla hədələnirəm. Bu hədələrin real olacağına əmin olduğum üçün sizin vasitənizlə ölkə prezidentimiz İ.Əliyev cənablarından kömək istəyirəm. Əgər Azərbaycan dövləti təhlükəsizliyimi təmin etməzsə, hər hansı bir xarici ölkədən sığınacaq istəmək məcburiyyətində qalacağam”.
Laçın rayonun Şeylanlı kəndindən məcburi köçkün, hal-hazırda Ağcabədi şəhər E.İsmayılov küçəsi ev 45-də müvvəqqəti məskunlaşmış, Laçın rayon təhsil şöbəsində metodist vəzifəsində çalışan Baxışov Müqabil Baxış oğlu. Qarşı tərəfin də mövqeyini dinləməyə hazırıq.
N.KƏRİMLİ