İmişlidə sahibkarlarla icra başçısı arasında qarşıdurma

İmişli rayonunda böyük qalmaqal: icra başçısı Vilyam Hacıyev sahibkarları aldadaraq onlara vəd olunan pulu vermir; etraza qalxan sahibkarlara qarşı polisdən və qoçudəstələrindən istifadə oluünub. Bir müddət əvvəl ölkə prezidenti İlham Əliyev İmişli rayonunun sosial-iqtisadi inkişafının sürətləndirilməsinə dair əlavə tədbirlər haqqında sərəncam imzalayıb. Sərəncama əsasən İmişli Rayon İcra Hakimiyyətinə Azərbaycan Respublikasının 2012-ci il dövlət büdcəsində nəzərdə tutulmuş Azərbaycan Prezidentinin ehtiyat fondundan 2 milyon manat ayrılıb.
Daxil olan məlumata görə ölkə prezidentinin İmişliyə səfəri öncəsi İmişli Rayon İcra Hakimiyyətinin başçısı Vilyam Hacıyev sahibkarları toplayaraq, onlardan rayonun abadlaşdırılması üçün vəsait ayrılmasını xahiş edib. İcra başçısı bildirib ki, prezidentin ayırdığı vəsait icra hakimiyyətinin hesabına köçdükdən sonra onların pulunu qaytaracaq. Bu gün İmişlidən daxil olan məlumatda bildirilir ki, sahibkarlar onlara vəd olunan pulu ala bilmədiklərinə görə icra hakimiyyətinin qarşısına toplaşıblar və Vilyam Hacıyevdən pullarını tələb ediblər. Etiraz edənlərin böyük qismi isə, İmişlidəki işləri görən fəhlələr olub. İşlərin bitməsinə baxmayaraq fəhlələr hələdə pullarını ala bilmirlər.
Müraciət edən sahibkarlar bildirirlər ki, Vilyam Hacıyev onları uzun müddətdir ki, aldadır. Əslində prezidentin ayırdığı vəsait çoxdan İmişli Rayon İcra Hakimiyyətinin hesabına köçürülüb. Vilyam Hacıyev isə həmin vəsaiti bilinməyən bir şirkətin hesabına keçirib. Yəni icra başçısı faktiki olaraq prezidentin ayırdığı vəsaiti mənimsəyib. Qeyd edək ki, aldadılan sahibkarların arasında məşhur futbolçu Maşallah Əhmədov da var. Məlumatda bildirilir ki, bu gün sahibkarlar və fəhlələr İmişli Rayon İcra Hakimiyyətiinin qarşısına toplaşdıqdan sonra, İmişli Rayon İcra Hakimiyyətinin birinci müavini Səfa Ağayev bəzi kəndlərdən qoçu dəstəsi gətizdirərək etirazçılara hücum edib. Polis və qoçularla baş verən münaqişə zamanı Maşallah Əhmədov araya girərərk qarşıduran tərəfləri sakitləşdirməyə çalışıb.
Bundan sonra icra başçısı Vilyam Hacıyev İcra Hakimiyyətinin arxa qapısından iş yerini tərk edib. Hazırda rayonda vəziyət gərgindir və sahibkarlar pullarını tələb etməkdə davam edirlər. Müqayis adlı sahibkar bildirib ki, imişlinin abadlaşdırılması üçün 2,5 milyon manat vəsait xərcləsə də, bu günə qədər bu vəsaitdən bir qəpikdə geri ala bilməyib. Son məlumata görə sahibkarlar məsələ ilə bağlı ölkə prezidentinə müraciət edəcəklər. Qarşı tərfində mövqeyini dərc etməyə hazırıq…
Ələddin