Ağstafada kənd təsərrüfatı nazirliyinin “pul kəsən” maşını var

Bütün sahələrdə olduğu kimi, kənd təsərrüfatı sahəsindəki inkişafdan danışdıqca adamın qarını da doyur, könlü də. Hamı düşünür ki, yəqin bu il bostan, tərəvəz məhsulları ötən illərdəkinə nisbətən aşıb daşacaq. Qiymətləri də bir az aşağı olacaq. Amma nədənsə, gözlədiklərimizi görmək mümükün olmur. Siz deməyin “perepiska” xəstəliyi bizləri aldadır. Necə olur ki, ildən-ilə kağız üzərində əkin sahəsininn hektarı 2 dəfə artıq göstərilir? Məhsul tədarükünün pik həddə çatdığı soylənilir, lakin bazarlardan “od” yağır? Vəziyyət gərginləşəndə qonşu ölkələrdən idxal başlanır. Adını da qoyurlar ki, məhsullar xaricdən götürüldüyü üçün bahadır. Ay canım, görəsən “perepiska” xəstəliyinin dərmanı tapılacaq, ya yox? Niyə özümüz-özümüzü aldadırıq? Onsuz da az tapanda az yeməyi öyrənən xalqıq. Bir az dərinliyə varanda hiss edirsən ki, KTN-in rayonlarda “pul maşınları” var. Bölgələrdə məhsul əvəzinə pul “istehsal olunur”. Heyif ki, o pullar bir çox insanlardan uzaq düşüb.
...Aprelin 7-də müşavirədə Ağstafa rayon İH-nin başçısı Məhərrəm Quliyev rayonda 10 003 hektar buğda əkildiyini söylədi, hələ digər əkinlər bir yana. Müşavirə iştirakçılarının qəribə baxışlarından duyduq ki, bilmədən “perepiska” xəstəliyinə tutulmuşuq. Odur ki, rayonun böyük kəndlərinə üz tutduq, icra nümayəndələri ilə həmsöhbət ola bildik. Həmsöhbətlərim taxıl sahələrinin susuzluqdan məhv olduğunu və ildən-ilə əkinə maraq azaldığını bildirdilər. Əkin sahələrinin həddindən artıq yazılmasına İH tərəfindən məcbur edildiklərini də deməyi unutmadılar.
Rayonun Dağ Kəsəmən, Poylu, Düz Qışlaq, Pirli, Muğanlı kəndlərindəki taxıl sahələrinə nəzər yetirəndə müşahidəmiz əsas verdi ki, bu il məhsul ötən ildəkindən daha az olacaq. Şişirdilmiş sahələrin nə məqsəd daşıdığını bilməyə nə var. Mənbə bildirir ki, “rayon ərazisində faktiki 3000 hektardan bir az taxıl əkilmişdir. İndi diqqətlə hesablayın. Görün, şişirdilmiş 6000 hektar üçün ödənilən subsidiyalar, gübrə xərcləri nə qədər vəsaitin mənimsənilməsi deməkdir? Mənimsənilən 100 minləri hesablamaq elə də çətin deyil. Lakin bölüşdürmək çox çətindir. Şərikliyin həmişə sonu dava ilə qurtarır. Elə ona görə də giley-guzar səngimir. Hamısını bir yana qoyub Ağstafa rayon İcra Hakimiyyətinin başçısı Məhərrəm Quliyevə sadəcə bir neçə sual veririk:
1. “Kabinetinizdən” boylananda məhv olan taxıl sahələrinə heyfiniz gəlirmi?
2. 10 003 hektar sahə üçün gübrələr rayona gətirilibmi? Gətirilibsə haraya yığılıb və bölüşdürülübmü?
3. 10 003 hektar taxıl sahəsinin suvarılması nəzərdə tutulubmu və hansı tədbirlər görülüb?
Nə isə... Sadəcə suallar yazdıq. Onsuz da bilirik ki, kağız üzərində əkilən taxıl sahələrinə su və gübrə gərək deyil. Qazax, Tovuz, Şəmkir, Gədəbəy rayonlarında da eyni hallar mövcuddur.
(mövzu diqqətimizdədir).
Vəkil Rüstəm