Gürcüstan azərbaycanlıları Putin separatizminin alətinə çevrilə bilər?

Krımı çətinlik çəkmədən işğal edən Putin nəzərlərini yenidən Rusiyanın patronluğuna daha əvvəldən asi olan Gürcüstana tərəf yönlədirib. Son zamanlar Gürcüstanın ermənilər yaşayan Cavatexi və azərbaycanlılar yaşayan Borçalı bölgələrinə muxtariyyat verilməsi barədə Rusiya mətbuatında fikirlər səsləndirilməkdədir. Borçalıya muxtariyyat verilməsi fikirləri artıq Azərbaycanda da eşidilməkdədir. Borçalıya Rusiyanın əli ilə muxtariyyat verilməsi Azərbaycanın milli maraqları ilə üst-üstə düşürmü? Azərbaycanın Ermənistanın yolu ilə gedərək Rusiyanın separatçı oyunlarına alət olması Azərbaycanın gələcəyinə nə vəd edə bilər? Bu barədə Gürcüstan parlamentinin azərbaycanlı deputatı Azər Süleymanovun və politoloq Vəfa Quluzadənin fikirlərini öyrənib. Azər Süleymanov: “Borçalıda yaşayan azərbaycanlılar arasında bir nəfər də olsa separatçı yoxdur”.
Gürcüstan parlamentinin azərbaycanlı deputatı Azər Süleymanov Rusiyanın dəstəyi ilə Borçalıda separatizmin vüsət almasını mümkün hesab etməyib: “Borçalıda yaşayan azərbaycanlılar arasında bir nəfər də olsa separatçı yoxdur. Borçalı camaatı heç vaxt buna razı olmaz. Hesab edirəm ki, bu Rusiya tərəfindən yayılmış profokasiya xarakterli informasiyadır. Burada 500 min azərbaycanlı yaşayır və heç bir azərbaycanlının fikrində belə bir şey yoxdur və olmayıb. Bu provakasiyalara uymaq lazım deyil və burada yaşayan bu qədər azərbaycanılının taleyi ilə oynamaq düz deyil”.
Vəfa Quluzadə: “Rusiyadan hər şey gözləmək olar”.
Politoloq Vəfa Quluzadə də hesab edir ki, proseslərin Rusiya tərəfindən idarə edilməsi mümkündür: “Rusiyadan hər şey gözləmək olar. Borçalıda səsləndirilən muxtariyyət məsələləri Rusiya xüsusi xidmət orqanlarının apardığı işin nəticəsi ola bilər. Mən dəfələrlə Borçalıda yaşayan azərbaycanlılarla görüşmüşəm. Onların şikayətlərini eşitməmişəm. Hesab edirəm ki, Azərbaycanla Gürcüstan iki dost ölkədir. Rusiya böyük məmnuniyyətlə bu iki dost dövlətin arasını vurmaq istərdi. Mən əminəm ki, onların bu fəaliyyəti heç bir nəticə verməyəcək”.
N.KƏRİMLİ