İcra başçısı bütöv bir rayonu özəl mülkiyyətinə çevirib

Ağsuda özbaşınalıqlar sərhəd tanımır. Rayonda baş verən müxtəlif qanunsuzluqlarla bağlı ölkə mətbuata dəfələrlə yazılıb. Ancaq bunlara baxmayaraq hakimiyyət Ənvər Seyidəliyevi başqa icra başçıları kimi digər rayonlara “ekstradisiya” edə bilmir. Bu günü Ağsulular səbirsizliklə gözləyir. Hətta qurban kəsəcəklərini də gizlətmirlər. Lakin bununla yanaşı Ənvər Seyidəliyevin hər hansı rayona icra başçısı təyin ediləcəyini də arzulamırlar. Çünki rayon sakinləri yaxşı bilirlər ki, Ənvər Seyidəliyev özbaşınalıqlarını digər rayonlarda da həyata keçirə bilər.

Ənvər Seyidovun vəzifə pillələri

Ağsunun icra başçısı Ənvər Seyidəliyevin qanunsuz əməlləri ilə bağlı məlumatlar daxil olub. Ənvər Seyidəliyev Ağsu rayonunun Pirhəsənli kəndindən olmağına baxmayaraq ağsululara günün bu günü qənim kəsilib. 1975-ci ildə Azərbaycan Politexnik İnistitutunu bitirən Ağsunun hal hazırkı icra başçısı müxtəlif vəzifələrdən sonra 2007-ci ildə Cavid Qurbanovun “Azəryolservis” ASC-də idarə rəisiliyindən birbaşa “taxta” çıxıb. Beləliklə də Ənvər Seyidəliyev 5 ildir ki, Ağsunun icra başçısı vəzifəsində çalışır. Ağsulular Ənvər Seyidəliyevi icra başçısı olduğu müddətdə rayonun inkişafı üçün bircə işini belə xatırlamırlar. Hər kəs onu Ağsuda “xaç atası” kimi tanıyır. Rayonda hansı ərazini neçəyə satmasından danışılır. Fəaliyyəti yalnız rayonda qohum-əqrəbalarını başına toplamaqdır. Ənvər Seyidəliyev buna görə də "xaç atası" ləqəbəni qazanıb.

Rayonda pul yığımı

Ağsu rayonunun idarə və müəssisə rəhbərləri, həmçinin rayonun iş adamları icra başçısı Ənvər Seyidəliyevdən narazılıq edirlər. Buna səbəb isə icra başçısının yeni aul toplama kampaniasına start verməsidir. Belə ki, Ağsudan daxil olan məlumata görə, başçı, rayonun bütün idarə və təşkilatlarından, həmçinin özəl sektorda çalışan bütün ortabab dükan və marketlərdən pul toplamağı əmr edib.
Məlumata görə, icra başçısı Yeni il bayramı və ilin sonu ilə bağlı dövlət idarələrinin rəhbərlərindən və özəl sektorda çalışanlardan külli-miqdarda pul tələb edib. İcra başçısı bu pulları rayonda Yeni il və Dünya Azərbaycanlılarının Həmrəylik günü münasibəti ilə keçirilən tədbirlərə sərf olunacağını deyib. Tələb olunan məbləğin hər bir idarə və təşkilatdan, həmçinin özəl sektor obyektindən 2000 manat civarında olduğu deyilir. Özəl sektorda çalışanlar başçının bu özbaşınqalığına etiraz etsələrdə, onlara bildiriblər ki, pulu verməsələr, yeni ildən ciddi problemlərlə üzləşəcəklər. Bundan başqa, icra başçısı məmurlara bir sıra tapşırıqlar da verib. O bildirib ki, ilin yekunları ilə bağlı hesabatlar hazırlanmalıdır. Həmin hesabtalara əsasən hansı dövlət müəssisəsində nöqsanlar varsa, idarənin rəhbərliyi cəzalandırılacaq.
Məlumatda bildirildiyinə görə, icra başçısının bu addımı əslində müəssisə rəhbərlərinə mesajdır. O, idarə rəhbərlərini nöqsanları ilə hədələməklə tələb etdiyi məbləği tərəddüdsüz vermələrinə məcbur edir.O da qeyd olunur ki, icra başçısının növbəti pul yığımı rayonda ciddi narazılığa
səbəb olub. Çünki dövlət müəssisələrində çalışan şəxslərə müdirləri tərəfindən dekabrın maaşından tutulacağı ilə bağlı xəbərdarlıq edilib. Bu da kütləvi narazılığa səbəb olub.

Ənvər Seyidəliyevin karxana “əməliyyatı”

Ənvər Seyidəliyev rayondakı keçmiş RTS-in həyətində özünə daş karxanası yaradıb. Həmin karxana ilboyu icra başçısının əsas gəlir mənbələrindən biridir. Bir vaxtlar RTS-in müdiri olmuş Ənvər Seyidəliyev elə həmin yeri özəlləşdirdikdən sonra, yaratdığı daş sexi ilə də qazanac əldə etməyə başlayıb. Rayonda yolların qıraqlarına səki çəkmək üçün daşlardan istifadə yalnız Ənvər Seyidəliyevin sexindən gətirilə bilər. Əks təqdirdə icra başçısının qəzəbinə tuş gəlmək mümkündür. Həmin «bardyor»ları dövlətə ustalıqla satan icra başçısı bundan böyük miqdarda pul qazanır. Daha doğrusu, Ağsunun icra başçısı büdcənin pulunu və yaxud rayonun infrastrukturu üçün ayrılan vəsaitləri götürüb, rahatlıqla cibinə qoyaraq öz kefindədir.

Boğaza yığılan xalq

Qeyd edək ki, Ağsu rayonunun icra başçısı Ənvər Seyidəliyev Dövlət Sosial Müadfiə Fondunun rəhbəri Səlim Müslümovun dayısıdır. İllərdir eyni vəzifədə qala bilməsinin səbəbi də bacısı oğlunun yüksək ranqlı məmur olmasıdır. Elə buna görədir ki, rayonda Seydəliyevin həyata keçirdiyi özbaşınalıqlar camaatın canını boğazına yığıb.
Ağsunun əksər kəndlərində əhalinin sosial-məişət problemləri dəhşətli vəziyyətdədir. Rayonun bir neçə kəndləri mərkəzdən demək olar ki, təcrid olunub. 21-ci əsr olmasına baxmayaraq, Ağsunun Pirhəsənli kəndini çıxmaqla digər kəndlərin camaatı məktəb, xəstəxana, qaz, içməli su, yol, işıq və poçt xidmətinin üzünə həsrət qalıblar. Kəndlərdə sosial-iqtisadi vəziyyətin ağırlığı ucbatından əhali kütləvi şəkildə ev-eşiklərini tərk etmək məcburiyyətində qalıblar. Kəndlərdə əsas problemlər sırasında yanacaq məsələsi dayanır. Sovet ittifaqı dağıldıqdan sonra qaz üzünə həsrət qalan əhali odun sobaları ilə qızınırlar. Nəticədə kəndin yaxınlığında yerləşən meşələr məhv edilir.
Ağsuda əhlinin içməli suya olan tələbatı da bərbad haldadır. Dağlıq ərazi olmasına rəğmən, su təhcizatının yarıtmaz halda düşməsi insanları kənardan su almağa məcbur edir ki, bir maşın içməli suyun da qiyməti 100-150 manata başa gəlir. Halbuki Ənvər Seyidəliyev dəfələrlə yuxarı dairələrə hesabat göndərərək iddia edib ki, rəhbəri olduğu rayonda içməli su problemi yoxdur. Əgər doğrudan da Ənvər Seyidəliyevin dedikləri kimi rayonda su problemi mövcud deyilsə, o zaman ağsulular evbaşına il boyu 1000 manata yaxın pulu nəyə və niyə sərf edirlər?
Rayonun problemləri bununla yekunlaşmır. Rayonda istənilən qədər problemlər var ki, onların hamısı sənəd üzərində həll edilmiş göstərilsə də, reallıqda bu öz əksini tapmır. Ənvər Seyidəliyevə qaldıqda isə rayonun problemlərinin ona qəti aidiyyatı yoxdur. Çünki bacısı oğlu Səlim Müslümov Bakıda onun problemlərini rahatlıqla həll edə bilir.

Tayfa işğalına məruz qalmış Ağsu

Ənvər Seyidəliyevin Ağsunun icra başçısı vəsifəsindən gedəcəyi barədə məlumatlar hələ ki, öz təsdiqini tapmır. Ancaq rayonda əhalinin vəziyyəti acınacaqlı durma düşüb. Xüsusilə Kənd Təsərrüfatı Nazirliyinin fermerlərə verilən subsidiyaları icra başçısının tayfası tərəfindən mənimsənilir. Ağsuda və onun kəndlərində iş yerləri demək olar ki yoxdur. Tikinti-quruculuq adı ilə rayonda bir neçə şəxsi obyektlər tikilib ki, bunun da camaata heç bir faydası dəymir. Buna baxmayaraq yenə də hakimiyyət rayonda baş verən bu özbaşnalıqlara görə kimsəyə gözün-üstə qaşın var söyləmir. Yerli hakimiyyət orqanları tərəfindən törədilən özbaşınalıqlar rayon ictimaiyyətinin narazılığını getdikcə artırır. Ağsuda bütün məsul rəhbər vəzifələri də məhz Ənvər Seyidəliyevin qohumları və həmkəndliləri arasında bölüşdürülüb. Bir sözlə Ağsu bü gün barıt çəlləyinə çevrilib. Quba hadisələrinin bu rayonda baş qaldıracağı günü bizlərə gözləmək qalır.
Şamil Əlibəyli