ANS ÇM radiosunda erməni mahnılarının səsləndirməsi birmənalı qarşılanmayıb. Hətta bu layihəyə görə Milli Televiziya və Radio Şurasının sədri Nuşirəvan Məhərrəmli də ANS rəhbərliyini kəskin tənqid edib.
Sosial şəbəkələrdə və ayrı-ayrı müəlliflər tərəfindən internet portallarında ANS ÇM-in bu addımı pislənilir. Qarabağ Azadlıq Təşkilatının (QAT) sədri Akif Nağı da bu mövqedədir. A.Nağı “Yeni Müsavat”a dedi ki, ANS-in ermənilərlə bağlı mövqeyində yumşalma var. QAT sədrinin sözlərinə görə, bu, ANS-ə yaraşan hərəkət deyil: “ANS həmişə ermənilərin işğalçı olması mövqeyindən çıxış edib. Son dövrlər bu mövqedə yumşalma müşahidə olunur. Bundan əvvəl də Kəlbəcərin işğalı mövzusunda hazırladıqları verilişdə xoşagəlməz fikirlər səslənmişdi. Amma biz ANS-in xalq qarşısında xidmətlərinə görə onları müdafiə etməyə çalışdıq. Çünki ANS rəhbərliyi Qarabağ döyüşlərində iştirak edib. İndi də bu məsələ ortaya çıxıb. Məncə, yanlış mövqe nümayiş etdirirlər”.
A.Nağının fikrincə, erməni mahnıları təbliğ ediləndə onlar özlərini daha da qalib hiss edirlər: “ANS-də xəbərlər proqramı ”Ermənistanın Azərbaycana təcavüzü davam edir" ifadəsi ilə başlanırdı. Artıq bu sözü də efirdən çıxarıblar. Nə məsələdirsə, onların mövqeyi yumşalıb. İndi təsadüfən bu layihədə iştirak edirlərsə, ondan bir yol tapıb imtina etsinlər. Zərdüşt Əlizadə, Arzu Abdullayeva kimi “xalq diplomatiyası” mövqeyində dayanıblar".
“Qarabağ Qaziləri” Birliyinin sədri Etimad Əsədovun sözlərinə görə, milli qəhrəmanın adını daşıyan radioda erməni mahnısını səsləndirmək qəbuledilməz haldır: “Ermənilərlə münasibətlər kəsilməli, onların təbliğatı dayandırılmalıdır. Bizim onlarla münaqişəmiz var və bu halda erməni musiqisini təbliğ etməyi onlara yaraşdırmıram”.
E.Əsədov qeyd etdi ki, ermənilər mədəniyyətimizi həmişə oğurlayıblar: “Hətta İrəvan radiosunda Azərbaycan mahnısı səslənsə belə, onlar bu musiqini özlərinki kimi təqdim edirlər. Biz müharibədən məğlub çıxmışıq, başımıza müsibətlər gəlib, şəhid vermişik, Xocalıda bizə zülm olunub. Bütün bunları nəzərə almaq lazımdır”.
"Qafqaz top 20" musiqili verilişində erməni mahnılarının səsləndirilməsinə Azərbaycan Əfqanıstan Veteranları İctimai Birliyi etiraz edib. Bununla bağlı bəyanat yayan qurum belə məsələlərin yolverilməz olduğunu qeyd edib.
Qurumun sədr müavini Əbülfət Hüseynov deyib ki, ANS rəsmisi Mais Məmmədov etdiyi səhvə görə utanıb xalqdan üzr istəmək əvəzinə, öz bəd əməlinə haqq qazandırmaq istəyir: “O, yaxşı bilir ki, ermənilər Azərbaycan mahnılarını erməni mahnısı kimi təqdim edərək səsləndirir. Bunları anlamayan Mais Məmmədovu ANS Şirkətlər Qrupunun vitse-prezidenti Mirşahin Ağayevin də müdafiə etməsi çox acınacaqlıdır. İlk günlərdən Qarabağda gedən döyüşləri biz çəkmişik, bunu da edə bilərik demək istəməsi bizi çox təəssüfləndirdi. Bakı və Sumqayıtda 40 min erməni yaşayır, deyərək, biz buna göz yumuruq, siz də buna göz yumun demək istəyir?! Heç cür başadüşülən deyil. ANS telekanalının bu mövqeyini qəti şəkildə pisləyirik”.
ANS prezidentinin media üzrə müşaviri Mais Məmmədov “Yeni Müsavat”a açıqlamasında qeyd etdi ki, bu məsələyə münasibət bildirilib, cavab verilib. Onun sözlərinə görə, Qarabağ bizim torpaqlarımızdır və orada vətəndaşlarımız yaşayır.
M.Məmmədov bir mahnı ətrafında yaradılan ajiotaja təəccübləndiyini qeyd etdi: “Orada yaşayanlar da bizim vətəndaşlarımızdır. İkincisi, Azərbaycanda 30-40 min erməni yaşayır. Onda gəlin onlarla futbol oynamayaq, yarışlarda üz-üzə gəlməyək, nə bilim mahnılarına qadağa qoyaq.
Bununla nə olacaq? Biz onlara göstərməliyik ki, biz vəhşi deyilik. Qoy görsünlər ki, Qarabağı işğal etdilər, amma nə qazandılar? Yəni bir mahnı üstündə yaradılan ajiotaj başa düşülən deyil. Bu işlərimizi davam etdirmək lazımdır, sayt açmaq lazımdır, həmişə hərəkət etməliyik".
ANS rəsmisi “Elə Əkrəm Əylisli də kitabında bunu deyirdi, Leyla Yunus da "xalq diplomatiyası" layihəsində bunu nəzərdə tuturdu, onda onları niyə efirdə tənqid edirsiz" sualımıza belə cavab verdi: “Biz heç kimə sataşmamışıq, vurmamışıq, danlamamışıq. Əkrəm Əylisliyə gəldikdə, bu başqa məsələdir. Əkrəm həqiqətən düz etməyib. Mənim 76 yaşım var. Qarabağda döyüşlərin ən şiddətli vaxtında hər yerində olmuşam. Biz axı uşaq deyilik, hər şeyi yaxşı bilirik”.
Xatırladaq ki, ANS ÇM radiosunda “Qafqazın TOP-20 mahnısı” adlı verilişdə erməni mahnısı səsləndirilib.