Sumqayıt şəhərində yaşayan, Daşaltı əməliyyatında 28 qəlpə yarası alan, (ölüb dirilən ləqəbli), iki gündən sonra möcüzə nəticəsində dirilən Qarabağ qazisi Malik Məcidovun ailə üzvləri redaksiyamıza zəng vuraraq qazinin vəziyyətinin ağır olduğunu bildirdilər.
Sumqayıt şəhərində onunla görüşərkən həqiqətən də onun səhhətinin dözülməz olduğunun şahidi olduq. Onun yaralarına baxarkən, sinə nahiyyəsinin irinli çirk içərisində olduğunu gördük. M. Məcidovun sinə nahiyyəsindəki neft aşınması texniki yanığa (dəri zəhərlənməsi diaqnozu) infeksiya keçmişdir. Sumqayıt cərrahları tərəfindən iki dəfə yara işlənərək yarılmışdır. Buna baxmayaraq əzələ daxilinə (infeksion) nüfuz etmiş yara sağalmır.
Xatırladaq ki, M. Məcidov Sumqayıt İH-da ona qarşı aqressiv davranmadan sonra o, İH-nın qarşısında üzərinə neft tökərək intihara cəhd etmişdi.
Çoxsaylı şikayətlərdən sonra o, həmin gün Sumqayıt İH-nə dəvət olunur. Onu Sumqayıt İH başçısının 1-ci müavini Rövşən Sadıqov və Mənzillərin Bölüşdürülməsi və Qeydiyyatı Şöbəsinin müdiri Sədaqət Əsədova qəbul edir. Uzun çəkən mübahisələrdən sonra M.Məcidova bildirirlər ki, onu sabiq icra başçısı Vaqif Əliyevin şəhərə rəhbərlik etdiyi vaxtdan ev növbəsindən çıxarıblar. Bu cavabdan hirslənən M.Məcidov özünü və ailəsini yandıracağını bəyan edir. İH başçısının müavini Rövşən Sadıqov ona bildirir ki, “sən özünü yandırmaq istəyirsənsə get yandır, özün bilərsən”. Bu cavabdan sonra Qarabağ Qazisi M.Məcidov Bələdiyyə Parkına gəlir. Əvvəlcədən zeytun kolluğunda gizlətdiyi 5 l-lik qabda olan nefti üzərinə tökərəkqışqırır bu zaman ətrafdakıların köməyi ilə neft qabını və kibriti onun əlindən alırlar.
O, birinci intihardan sağ-salamat sovuşur. M. Məcidov 14 fevral2014-cü il tarixdə Sumqayıt İH-nın qarşısına gələrək üzərinə neft tökərək təkrar intihara cəhd edir. Bu dəfə polislər tərəfindən təqib olunan M. Məcidovun əlindən alışqanı alırlar. Əynindəki paltarları bədəninə qədər neftli olduğundan 6 saat ərzində onun dərisinə texniki yanıq və zəhərlənmə diaqnozu qoyulur.
Həmin gün M. Məcidov Sumqayıt Təxirəsalınmaz Təcili Tibbi Yardım Stansiyasının reanimasiya şöbəsinə yerləşdirilir. Qazi 2 gün müalicə aldıqdan sonra, Sumqayıt İH başçısı E. Əzizovun göstərişinə əsasən onu Sumqayıt Ruhi Əsəb Dispanserinə (dəlixana) yerləşdirirlər. Müalicə zamanı M. Məcidova müalicə həkimləri tərəfindən ağır psixatrop dərmanlar verilmişdir. Özünün dediyinə görə, həmin dərmanların təsirindən dişləri tökülmüşdür.
Xatırladaq ki, Sumqayıtın sabiq İH başçısı Vaqif Əliyevin rəhbərliyi dönəmində Qarabağ əlilləri və şəhid ailələri üçün tikilən binadan bir mənzilini də I qrup əlil M.Məcidova verirlər. Təəssüflər olsun ki, həmin evdə yaşamaq Qarabağ qazisinə qismət olmur. Evlər paylanarkən H.Əliyevin anım günü və “Gül bayramı”na hazırlıq gedirmiş. Sumqayıtın sabiq İH başçısı V.Əliyev pul “sıxıntısı”keçirirmiş. Bu səbədən pul əldə etmək üçün mənzillərdən bir neçəsini satmaq qərarına gəlir. Başçının göstərişi ilə münasib və “yolagəlimli” adam axtarışına çıxırlar. Həmin vaxt Mənzillərin uçotu, bölüşdürülməsi və dəyişdirilməsi şöbəsinin müdiri Gülsarə Əhmədova vasitəçilik edərək M.Məcidovla sabiq İH başçısı V.Əliyevlə təmasını təşkil edir. Başçının iş otağında evi satmaq barədə sövdələşirlər. Sövdələşmədə M.Məcidova bildirilir ki, ona növbəti ev bölgüsündə 2 mənzil veriləcək. Bundan əlavə ona “Karvan Ticarət Mərkəz”indən bir dükan da hədiyyə ediləcək. Bu minvalla M.Məcidovu aldadaraq evini təcili özəlləşdirib satırlar. “Gül bayramı” Bakı şəhərində təmtəraqla yola verilir. Xeyli müddətdən sonra növbəti ev bölgüsündə vəd verildiyinə baxmayaraq, M.Məcidova ev verilmir. O, İH başçısı V.Əliyevdən evini tələb etsə də heç nəyə müvəffəq ola bilmir. Ümid yeri kimi Sumqayıt şəhər məhkəməsinə üz tutur. Nə yazıqlar olsun ki, məhkəmə M.Məcidovun hüquqlarını bərpa etmir. Bu azmış kimi onu ev növbəsindən də çıxarırlar.
İntihar hadisəsindən öncə M. Məcidov bədənində gəzdirdiyi çoxsaylı qəlpələri öz vətənində çıxarmaq mümkün olmadığından İran İslam Respublikasına üz tutur. Təbrizdə “Bəhlul” Tibb mərkəzində əməliyyat olunaraq qəlpələrdən azad olur.
İranlı həkimlər M. Məcidovun döş qəfəsindən qəlpələri çıxararkən möcüzənin şahidi olublar.
Belə ki, Qazi Daşaltı əməliyyatından huşsuz çıxarıldıqdan sonra əməliyyat zamanı daxili qanaxmanı təmizləyərkən həkimlər tənzif və tampunu unudaraq daxildə qoymuşlar.
“Gündəm xəbər” olaraq Sumqayıt İH-dan xahiş edirik ki, torpaqlarımızın bütövlüyü uğrunda sağlamlığından keçmiş Qarabağ qazisi Malik Məcidova sahib çıxsınlar.
KƏNAN