Hər bir Türk şəhidinin xatirəsinin Türkiyədə
olduğu kimi, bütün türk ellərində də əziz tutulur

Yanvar ayının 5-6-sı tarixlərində “Borçalı” İctimai Cəmiyyətinin sədri Zəlimxan Məmmədli başda olmaqla qurumun üzvlərindən ibarət heyət sayca 98-incisi düzənlənən Sarıkamış şəhidlərinin xatirəsini anma törənində iştirak etmişdir. Nümayəndə heyətinə cəmiyyətin fəal üzvlərindən Hüseyn Artıkoğlu, Osman Əhmədoğlu, Qiymət Məhərrəmli, Aqil Camal və İsrafil Bayramov daxil idilər. Qeyd edək ki, Kars Sərhəd Boyları Dərnəyinin rəhbəri Məhərrəm Yıldız və BengüTV-nin tanınmış proqram rəhbəri Seyfullah Türksoyun təşkilatçılığı ilə baş tutan bu mötəşəm tədbir Türkiyənin dövlət rəsmiləri və geniş ictimaiyyət tərəfindən böyük razılıqla qəbul olunaraq, ehtişamla dəstəklənməkdədir.
Türkiyədə xatirəsi hər il ehtiramla yad olunan Çanakkala şəhidlərindən (bu mücadilədə Türkiyənin 250 mindən artıq əsgəri qəhrəmanlıqla şəhid olmuşdur) sonra, ən böyük itkilərlə tarixə yazılmış Sarıkamış şəhidlərinin (90 min əsgər) xatirəsi bu il də ötən illərdə olduğu kimi, Türkiyənin hər bir yerindən, eləcə də dünyanın türkdilli xalqlarının yaşadığı bütün ölkələrdən gələn sayğıdəyər insanlar tərəfindən içdən gələn duyğularla yad edildi.
Bu möhtəşəm törən Türk xalqına qarşı hər cür vəhşiliklər törədən, Karsı və digər əraziləri azğınlıqla işğal etmiş rus qoşunları ilə mücadiləyə qalxmış Sarıkamış şəhidlərinin soyuqdan və digər məhrumiyyətlərdən donaraq həlak olduqları Allahuəkbər dağlarında baş tutdu.
Ayın 5-də Sarıkamışdakı möhtəşəm törən zalında Türkiyənin Xarici və Daxili işlər nazirlərinin, digər dövlət rəsmilərinin, eləcə də millət vəkillərinin də qatıldığı bu möhtəşəm anma mərasiminin açılışı hər bir Türk insanının gözləri qarşısında şəhidlərin xatirəsinin bu ölkədə necə əziz tutulduğunu bir daha nümayiş etdirdi.
“Borçalı” Cəmiyyətinin rəhbərliyi və üzvləri Sarıkamış şəhidlərinin möhtəşəm abidəsi önünə əklil qoydular, şəhidlərin xatirə muzeyində oldular. Səhəri gün Sarıkamışda güclü qar yağmasına baxmayaraq, 10 mindən artıq insan Allahuəkbər dağlarına yürüş etdi. “Borçalı” Cəmiyyətinin üzvləri də bu möhtəşəm yürüşdə iştirak edərək, şəhidlərin xatirəsinə ehtiramlarını bildirdilər.
Yürüş başa çatdıqdan sonra Sarıkamışa dönən izdiham Türkiyənin və digər türkdilli dövlətlərin bayraqları ilə əhatə olunmuş ucu-bucağı görünməyən düzəngahdakı açıq meydanda baş tutan anım törəninə qatıldılar. Daha sonra iştirakçılar çadırlarda hazırlanmış yeməyə dəvət olundular.
Axşam törən iştirakçılarının şərəfinə geniş ziyafət verildi, Məhərrəm Yıldız və Seyfullah Türksoy anım tədbirinə qatılmış bütün qonaqlara təşəkkür edərək, razılıqlarını bildirdilər. “Borçalı” İctimai Cəmiyyətinin sədri Zəlimxan Məmmədli Borçalı türklərinin, eləcə də bütün Azərbaycan xalqının iradəsini ifadə edərək, hər bir Türk şəhidinin xatirəsinin Türkiyədə olduğu kimi, bütün türk ellərində də əziz tutulduğunu diqqətə çatdırdı. Mərasimin hər bir iştirakçısına ayrı-ayrılıqda ürək sözlərini yetirmək üçün fürsət verildi.
Mərasimin sonunda Çində Uyğur türklərinə qarşı aparılan barbar soyqırımının əks olunduğu video-çarx nümayiş etdirildikdən sonra, hər kəs bu qətliama tezliklə son qoyulması yolunda qəti addımlar atılmasının tələb etdi. Mərasim boyunca BengüTV-nin və digər televiziya kanallarının müxtəlif proqramları tərəfindən cəmiyyət üzvlərindən müsahibələr alındı.
“Borçalı” İctimai Cəmiyyətinin Mətbuat Xidməti