Baş redaktor prosesdə iştirakdan imtina etdi

Bakı Ağır Cinayətlərə dair İşlər üzrə Məhkəmədə hakim Ramella Allahverdiyevanın sədrliyi ilə ötən gün “Xural” qəzetinin baş redaktoru Əvəz Zeynallının işi üzrə məhkəmə prosesi keçirilib.
Məhkəmə Zeynallının 14 vəsatətinə baxıb.
İlk vəsatət Əvəz Zeynallının Gülər Əhmədovanın oğlu Toğrul Əhmədovun şahid qismində yenidən məhkəməyə gəlməsi və yalan ifadə verdiyi üçün barəsində tədbir görülməsi barədə vəsatətinə münasibət bildirən dövlət ittihamçısı Ramazan Hadıyev vəsatət əsassız olduğu üçün təmin olunmamasını qeyd etdi. Məhkəmə də vəsatətin təmin olunmadığını elan edib. Daha sonra ibtidai istintaqı aparan müstəntiq Qalib Qasımovun məhkəməyə şahid qismində çağırılması haqda vəsatət müzakirə olunub. Bu dəfə də dövlət ittihamçısı vəsatətin təmin olunmamasını xahiş edib. Məsələ də elə bundan sonra başladı. Baş redaktor vəsatətlərin təmin olunmadığını görərək Cinayət Prosessual Məcəlləni prokurorun qarşısına atdı.
Əvəz Zeynallı:
- Gəl onu tapdala, siz onsuz da qanunları tapdayırsınız! Nə vəsatət verirəm təmin etmirsiniz. Məhkəmə qərəzlidir. Bundan sonra prosesdə iştirak etməyəcəyəm. Xahiş edirəm məni məhkəmə zalından çıxarın.
Məhkəmə baş redaktorun xahişini yerinə yetirdi və fasilə elan etdi.
Fasilədən qayıdan məhkəmə katibi prosesin qeyri-müəyyən müddətə təxirə salındığını elan etdi.
Qeyd edək ki, Əvəz Zeynallının işi üzrə proses 2012-ci ilin may ayından davam edir. O, 28 oktyabr 2011-ci ildə keçmiş deputat Gülər Əhmədovanın ondan rüşvət tələb etməsi haqqında şikayəti əsasında həbs edilib. Cinayət Məcəlləsinin 311.3.3 (böyük məbləğdə rüşvət alma) və 311.3.4 (qorxutma yolu ilə rüşvət alma) maddələri ilə yanaşı, ona qarşı məhkəmə qərarını icra etməmə və vergi ödənişindən yayınma ittihamları irəli sürülüb. Ancaq hazırda Gülər Əhmədova özü deputat mandatlarının satışı ilə bağlı iş üzrə fırıldaqçılıqda ittiham olunur. Bundan başqa, bu qalmaqalın Türkiyədə vəfat etmiş başqa fiquru Sevinc Babayevanın doğmaları onun ölümündə keçmiş deputatın əli olduğunu iddia edirlər.
Ramin DEKO