Zaman İsgəndərovun ticarət mərkəzləri bağlana bilər

Respublikanın iri şəhərlərindən olan Sumqayıta Eldar Əzizovun icra başçısı təyin olunması ilə şəhərdə söküntü işlərinə start verildi. Köhnə başçının rəhbərliyi illərində tikilmiş bir sıra obyektlər sənədləri qaydasında olmadığı üçün traktorların qarşısına verilərək yerlə-yeksan edildi. Şəhərin mərkəzi küçələri, o cümlədən Nərimanov, Heydər Əliyev prospektləri, Sülh küçəsindəki ticarət obyektləri və köşklərinin bir neçəsi artıq sökülüb. Şəhər rəhbəri Sumqayıtda nüfuza malik olan şəxslərin obyektlərinin sökülməsi haqqında də qərar verib.
Son günlər başının üzərində qara buludlar dolaşan ticarət obyektlərindən biri də Sumqayıtda məşhur olan "Cavid", "Qalatasaray” Ticarət Mərkəzidir. Xatırladaq ki, Sumqayıt uzun illər yerli oliqarxlar arasında bölüşdürülüb. Hələ sovet dövründən Zaman İsgəndərov (Sumqayıt Univermağının sahibi), Tofiq Hüseynov (Sumqayıt çörək zavodunun sahibi), Sabir Tanrıverdiyev (Sumqayıt maşın bazarının sahibi) burada hegemonluq ediblər.
Ticarət Mərkəzində işləyən sahibkarlar fəaliyyətlərini dayandırmaq qərarına gəliblər. "Cavid"də işləyən sahibkarlar yer haqqının bahalaşması səbəbindən bezərək, bizneslərindən əl çəkməli olublar. Məlumatda deyilir ki, artıq onlar öz obyektlərini bir-bir təhvil verərək, başqa işlə məşğul olmağa başlayıblar. Qeyd olunur ki, keçən ilin əvvəli ilə müqayisədə hazırda "Cavid", "Qalatasaray” da geyim satışı ilə məşğul olanların yarısı öz dükanlarını bağlamalı olub. Maliyyə Nazirliyinin Qiymətli Metallara və Qiymətli Daşlara Nəzarət Dövlət Xidməti tərəfindən "Qiymətli metallar və qiymətli daşlar haqqında" Azərbaycan Respublikası Qanunun tələblərinə əməl edilməsi ilə bağlı aparılan yoxlama da "Cavid"in taleyini sual altında qoyub. Aparılan araşdırmalar zamanı mərkəzdə kütləvi qanun pozuntuları aşkar edilib. İcarədarlar əhaliyə qiymətli metallar və qiymətli daşlardan olan zərgərlik və digər məişət məmulatlarının satışını həyata keçirirlər. Hansı ki, bu fəaliyyət növü ilə məşğul olmaq üçün xüsusi razılıq, yəni lisenziya alınması tələb olunur. Xidmət tərəfindən Ticarət Mərkəzinin rəhbərliyinə xüsusi lisenziya olmayan fərdi sahibkarlarla icarə müqaviləsi bağlamamağa və onlara satış yerləri ayırmamağa dair xəbərdarlıq məktubları göndərilsə də, bu xəbərdarlıqlara məhəl qoyulmayıb. Ayrı-ayrı fərdi sahibkarların qanunsuz fəaliyyətinə şərait yaradılıb.
Aparılan yoxlamalar zamanı, 29 fərdi sahibkarın razılıq aldıqları, qalan 24 nəfərin isə qanunsuz fəaliyyət göstərdikləri aşkar edilib. Qanunsuz fəaliyyət göstərən obyektlərdə qiymətli metallardan və qiymətli daşlardan hazırlanan və qanunvericiliyə zidd olaraq dövlət əyar damğası ilə damğalanmayan 4076 ədəd zərgərlik məmulatı aşkar edilib. Yol verilən nöqsanlarla əlaqədar İnzibati Xətalar Məcəlləsinin müvafiq maddəsinə əsasən sahibkarlara inzibati xəta protokolları tərtib edilib.
Sumqayıtdakı digər iri ticarət obyektlərinin bağlanmasında maraqlı olan qüvvələrdən biri də "Univermaq Zaman" adı ilə tanınan Zaman İsgəndərovdur. Çünki həmin ticarət mərkəzləri fəaliyyətə başlayandan Z.İsgəndərova məxsus "Cavid" Ticarət Mərkəzinin alveri ölüb.
Tahir