Heydər Əsədovun işçiləri Ədalət Əsgərovu “tavana otuzdurub”

gundemxeber.az Cəlilabadda təhsilin bərbad gündə olduğuna çox az adam şübhə edər. Hər hansı statistik rəqəm də deyilənləri təsdiq edir. O da sirr deyil ki, 20 il təhsil şöbə müdirliyindəki kreslosunu qoruyan Ədalət Əsgərov burada təhsilin bütün savablarına da, günahlarına da cavabdehdir. Lakin buradakı kütləvi saxtakarlıqlar, cinayət həddinə çatan əməllər yüksələn xəttlə davam etsə də, nə rayon rəhbərliyi, nə də Təhsil Nazirliyi Ədalət müəllimə güldən ağır söz demir. Bundan ruhlanan Ədalət müəllim Cəlilabad təhsilində əndrabadi əməliyyatlar aparmaqda davam edir. Onun növbəti addımı rayondakı Təzəkənd kənd orta məktəbini əsas məktəbə, qısası, 11 illik məktəbi 9 illik məktəbə çevirmək olub. Səbəb də o göstərilib ki, bu orta məktəbin uğurlu nəticələri yoxdur.
Ə.Əsgərovun məntiqilə davam etsək, bu gün 9 illik olan məktəblərimiz 2 ildən sonar, yəqin ki, yerli-dibli bağlanacaq. Təzəkənd kəndində biri 9, digəri 11 illik olmaqla, iki məktəb vardı. Buradakı tam orta (11 illik) məktəbi təhsil başkanı bağlatdırıb. Qeyd edək ki, Ə.Əsgərovun Təzəkənd məktəbilə bağlı qərarı onun bu silsilədən ilk “islahatı” deyil. Cəlilabaddan aldığımız digər xəbərdə deyilir ki, RTŞ müdiri əhalisinin sayı az olan dağ kəndlərindəki ibtidai məktəbləri də sentyabrın 15-dən möhürləyərək, onlarda dərs keçilməsinə icazə vermir. Həmin məktəblərin direktorlarının qarşısına qoyulan tələb isə belədir: “5 min manat gətirin, məktəbi açım”.
Xəbərə görə, bağlanan məktəblərdən bir neçəsinin direktoru bu tələbi icra etməyə məcbur olub. RTŞ müdirinin Təzəkənd məktəbi qarşısında da eyni 5 min manat tələbi qoyduğu bildirilir. Əldə etdiyimiz məlumata görə, bu məsələ direktorlar tərəfindən Ə.Əsgərova irad tutulanda o, bu zaman təhsil naziri M.Mərdanovun bir fikrini sitat gətirərək deyib ki, cənab nazir şagird sayı az olan məktəblərin birləşdirilməsi ideyasını irəli sürüb, mən də bu fikrə əsaslanıram.
Bu ildən Təzəkənd kənd tam orta məktəbi 9 illik məktəbə çevriləcək. Məktəbin 10-11-ci sinif şagirdləri bu dərs ilindən kənddən 7-8 kilometr aralıda yerləşən Üçtəpə və Alar kəndlərinə getməli olacaqlar. Bu barədə verilən məlumatda deyilir: “Valideynlərin bir çoxu uşaqlarının adını indidən qonşu kəndlərin məktəblərinə yazdırsa da, onları “aylığa” çıxarıblar. Çünki bu gün həmin kəndlər arasında avtobus işləmir. Əhalisinin sayı 3000, şagirdlərinin sayı isə 550 nəfərdən çox olan bir kəndin məktəbinin 9 illik edilməsi qərarı burada birbaşa təhsilin məhvinə yönəlib.
TQDK-nın ötənilki qəbulun nəticələrini təhlil edən statistik hesabatı da maraqlı məqamlardan xəbər verir. TQDK, ötən ilin nəticələrinə görə, ən yüksək və ən zəif göstəriciləri olan 10 rayonu müəyyənləşdirib. Cəlilabad ən zəif rayonlar arasında birincidir.
Bütün bu fəaliyyətin nəticəsidir ki, Cəlilabad rayon Təhsil Şöbəsində külli miqdarda dövlət əmlakının mənimsənilməsilə bağlı faktlar aşkarlanıb. Büdcə vəsaitlərinin xərclənməsi üzrə Hesablama Palatasının əməkdaşlarının apardıqları yoxlamalar nəticəsində məlum olub ki, rayonun təhsil şöbəsinin müdiri Ədalət Əsgərov saxta sənədlər hazırlamaqla 300 min manat dövlət vəsaitini mənimsəyib. Yoxlamalar dövründə Ədalət Əsgərov yeyinti üzrə mənimsənilmiş 300 min manatın 30 min manatını və 80 min manatını geri qaytarsa da, hələlik 190 min manat dövlət vəsaiti büdcəyə qaytarılmayıb. Məlumatlara əsasən, əgər yoxlamalar başa çatana qədər təhsil şöbəsinin müdiri həmin vəsaitləri geri qaytarmasa, onun barəsində cinayət işi də açılacaq.
Rayondan daxil olan məlumatda vurğulanır ki, Cəlilabad rayon Təhsil Şöbəsinin müdiri Ədalət Əsgərov düşdüyü vəziyyətdən çıxmaq üçün Palatanın nümayəndələrilə anlaşmaq məcburiyyətində qalıb. Həmin anlaşmaya əsasən, Əsgərov Bakıdan gələnlərə 30 min manat pul verməlidir ki, əyri işləri ört-basdır olunsun. Məlumatda vurğulanır ki, təhsil şöbəsinin müdiri həmin pulu müəllimlərin üzərinə qoyub. Qeyd olunur ki, bu məqsədlə artıq bütün orta məktəb direktorlarına göstəriş verilib ki, hər bir məktəbin üzərinə 1000-2000 manat öhdəlik qoyulub. Həmçinin, Ədalət Əsgərovun bu göstərişinin Göytəpə Şəhər 1 saylı Orta Məktəbində ciddi narazılıqla qarşılanması da xüsusi olaraq vurğulanır. Qəzetimizə çatan bilgilərə görə, müəllimlər artıq şöbə müdirinə etiraz edərək, tələb olunan pulu verməkdən imtina etdiklərini çatdırıblar. Bəzi iddialara görə, Əsgərov da onlara bu hərəkətlərinin qarşılığında başının hələlik qarışıq olduğu və Hesablama Palatasının işçiləri rayondan getdikdən sonra onlarla hesablaşacağını vurğulayıb.
Cəlilabad təhsilində baş verən digər qanunsuzluqlar haqda növbəti sayımızda.

Faiq