Həbs olunan sahibkarların işi ilə bağlı addımlar atılacaq

“Binə üsyanında tutulanların işi ilə bağlı addımlar atılacaq, bütün ölkə ictimaiyyəti hərəkətə keçəcək. Çünki tutulanlar artıq siyasi məhbus sayılır və onları müdafiə etməliyik”. Ötən gün “Binə” hadisələri ilə bağlı həbs olunan sahibkarların müdafiə komitəsinin toplantısında bu fikirlər tədbirin əsas mövzusu idi.
Müdafiə Komitəsi tutulanların müdafiəsi ilə bağlı görüləcək işləri müzakirə edərək təkliflər irəli sürdü. Vəkil Xalid Bağırov bildirdi ki, hadisə günü vəkillərdən üç nəfər Qaradağ rayon Polis İdarəsinə gedib. Onun sözlərinə görə, artıq etiraz edən yeni bir sosial qrup üzə çıxıb: “Düzdür buna qədər də “Binə” və “Sədərək” bazarlarında lokal aksiyalar olub. Amma bu səviyyədə etirazlar heç vaxt həmin sahibkarlardan görməmişdik”. Vəkil söylədi ki, hadisələrin kökündə təkcə icarə haqları dayanmır: “19 yanvarda baş qaldıran etirazlar sahibkarların 10 ildən artıq dövrdə başlarına gətirilən müsibətlərin kulminasiya nöqtəsi kimi qiymətləndirilməlidir. “Binə” bazarında 30 min adam çörək pulu qazanır. Üstəlik söhbət orada daimi işləyən 30 min insandan gedir. Bu o deməkdir ki, 30 min insan ailəsini dolandırır. Bu insanlar ilk gündən qanunsuz işləməyə məcbur ediliblər. İndi qanun tətbiq etməyə başlayanda, həm qanunla işləmək, həm də xərac vermək tələb olunur. Ticarətçilərin işi ağırlaşır. Sonra onlardan obyektlər təkrar almağa başlandı. Bütün bunlar “Binə” üsyanına gətirib çıxardı”.
Vəkil qeyd etdi ki, sözügedən bazarda təxminən 10 min obyekt fəaliyyət göstərir: “Orada baş verənlərə ikinci sort hadisə kimi baxmaq olmaz. Onların maraqları lokaldır. İcarə haqlarının artırılmamasını tələb edir. Düşünürlər ki, indi tutulanlar hər hansı yolla problemi həll edə bilərlər. Amma həbslərin olacağı gözlənilən idi. Problem təkcə vergidə deyil. Həm vergi alırlar, həm qeyri-qanuni pul yığılır, üstəlik də kassa aparatı quraşdırılırsa artıq ikiqat xərc çıxır. Kəbirə Məmmədova “Araz Avia” MMC firması açıb və onun adı ilə dükanları icarəyə verir. Bazarda yer haqları aylıq 1500-3000 manat arasında dəyişir. Bu dəfə azı 500 manat icarə haqqını qaldırmaq istəyiblər. Nəticədə hamı dükanlarını bağlayıb küçələrə çıxıb. Əraziyə çevik alayın cəlb olunması ondan xəbər verir ki, yuxarıdan sanksiyalaşdırılmış qərar olub”.
X.Bağırov bildirdi ki, müdafiə komitəsi geniş formatda yenidən toplanacaq, ölkə ictimaiyyəti, ziyalılar məsələ ilə bağlı təkliflərini irəli sürəcəklər: “Dinc aksiyaya, siyasi tələbi olmayan etirazlara görə niyə güllə atılmalıdır? Bu hadisələrdə polisin müdaxilə həddini aşması müzakirə olunmalıdır. Tutulan 10 nəfər bəraət almayacaq və çox güman ki, məhkəmə hökmü olacaq. Ümumiyyətlə, hüquqi baxımdan qaldırılası məsələlər var və addımlar atılacaq”.
Hüquq müdafiəçisi Vidadi İsgəndərli hazırda bazarlarda milyonlar oynayır və “Binə” də onlardan biri idi: “İndi kassa aparatı qoyub vergi istəyirlər. Bəs, 20 ildə əldə olunan pullar hara gedib? Dərnəgül bazarı, Bakı avtovağzalındakı yarmarka, “Vosmoy” bazarı və başqalarında milyonlar oynayır. Əmtəə dövriyyəsindən ildə 1 milyarda yaxın pul əldə edirlər. “Binə” üsyanı göstərdi ki, hər yerdə korrupsiya insanları boğaza yığıb. Niyə çevik polis alayı etirazlarının qarşısını almağa görə təşkil olunmuşdu? Buna ehtiyac yox idi. Qaradağ rayon polisi aksiyanın qarşısını almağa kifayət edirdi. Sadəcə çevik alayın xüsusi geyimləri, əllərindəki silahı böyük xof yaradır. Bunlar cəmiyyəti qorxutmağa, xof mühiti formalaşdırmağa çalışırlar. Müdafiə Komitəsi bir araya gəlib daha böyük şəkildə məsələni ictimailəşdirəcək, tutulanlara hüquqi yardım göstəriləcək”.
Müdafiə Komitəsində olan jurnalist İdrak Abbasov “Binə” bazarında yığılan xəraclar barədə maraqlı məlumatlar verdi: “Əvvəla tutulanların hüquqşünası deyir ki, polis aksiyada “istefa”, “azadlıq” şüarları səsləndirənləri axtarırmış. Elə biliblər ki, müxalifətçilər onların içərisindədir. O ki qaldı, etirazların baş qaldırmasına “Binə”də mərkəzləşdirilmiş kamera sistemi quraşdırılması, sayğac qoyulması üçün pul istənilib. Əvvəl sahibkarların kassa aparatları olub. Sonra gəlib aparatları yığışdırıblar. Aparatın təmiri üçün də hər ay 6 manatdan pul yığıblar. İşləməyən aparatların sonra pulunu tələb etməyə başlayıblar. Yer haqqı 40 kvadrata görə 1800 manat alınıb. Bütün bunlar ticarətçiləri bezdirib və ayağa qalxıblar”.
AXCP gənclər komitəsinin rəhbəri Əbülfəz Qurbanlı qeyd etdi ki, hakimiyyət bu münasibəti taksi sürücülərinə, evi sökülənlərə, Qarabağ qazilərinə, gənclərə də qarşı göstərib: “Müdafiə Komitəsi toplanıb fəaliyyəti istiqaməti qurulmalıdır. Tutulanlara dəstək verməliyik, ailələrinə kömək etməliyik, mətbuat onların həbsini diqqətdə saxlamalıdır. Çünki tutulanlar siyasi dustaqdır”. Qeyd edək ki, yanvarın 19-da “Binə” Ticarət Mərkəzində keçirilən aksiya zamanı 10 nəfər təqsirləndirilən şəxs qismində məhkəmə qarşına çıxarılıb. Bunlar Malik Məhərrəmov, Nicat Paşayev, Əbülfəz Əliyev, Samir Zeynalzadə, Səid Ədilov, Məhəmməd Mürsəliyev, Elnur Əliyev, Samid Hüseynov, Qüdrət Kişiyev və Vaqif İbrahimovdur. Onların barəsində 2 aylıq həbs-qətimkan tədbir seçilib.
Aslan