Prokurorluq və MTN-nin Ağdam Təhsil Şöbəsi qarşısında
aciz qalıb, Elmira Şükürovadan prezidentə şikayət olundu

Ötən ilin ilin yekunları ilə bağlı müşavirədə dövlət başçıs səviyyəsində yenidən antikorrupsiya məsələsinə toxundu. Nazirlər dinlədi, hətta özlərini işgüzar göstərmək üçün qələmini götürüb qeydlər aparanlar da oldu. Amma bunlar yalnız görüntü xarakteri daşıyır. Reallıqda isə hökumətin korrupsiya şkalasının yüksəkliyi hər kəsə bəllidir. Bu sırada xüsusi “uğurlar” əldə etmiş sahələrdən biri də təhsil sektorudur.
Azərbaycan təhsil sisteminin korrupsiya bataqlığı bir müddət öncə Prezident Administrasiyasının rəhbəri Ramiz Mehdiyev tərəfindən də dilə gətirilmişdi. O zaman Təhsil naziri Misir Mərdanov da cavabı çox ləngitmədi, dedi ki, cənab Mehdiyevlə 100 faiz razıdır, bu sahədə problemlər var və yavaş-yavaş həll edilir. Deməli, təhsildəki korrupsiya, rüşvət faktoru gözəgirən həddədir.

Hər müəllimdən 50 manat tutulur

Rüşvət hallarından söz düşmüşkən, bu məsələ rayon məktəblərində xüsusilə acınacaqlı formadadır. Məcburi köçkün məktəblərində isə özbaşınalıq vəziyyət kritik həddədir. Redaksiyalara ən çox şikayətlərsə Ağdam rayon Təhsil Şöbəsindən gəlir. Adının açıqlanmasını istəməyən müəllimlər təhsil şöbəsinin müdiri Elmira Şükürovadan gileylənməkdən yorulmurlar. Şikayətçi müəllimlərin dediklərindən belə məlum olur ki, hər ay müəllimlərin məvacibləri kəsilir: “Demək olar ki, hər ay müxtəlif adlar altında bizdən pul yığılır. Elmira xanımdan bir soruşan yoxdur ki, bu qədər pulu niyə yığırsan? Əvvəllər bir neçə dəfə ardıcıl olaraq yoxlamalar gedirdi, bəhanə edirdilər ki, komissiyaya rüşvət verilir, ona görə yığılır. Bəs indi niyə kəsirlər pulumuzu?” Maraqlıdır ki, eyni şikayəti edən müəllimlər çoxluq təşkil etsə də, heç biri adının açıqlanmasını istəmir. Səbəb də eynidir; fakt araşdırılsa da, nəticəsi olmayacaq, əvəzində şikayətçi işini itirəcək.

Məktəblər direktorun adı ilə çağırılır

Müəllimələrin sözlərinə görə, məktəblər nömrələri ilə deyil, direktorlarının adı ilə tanınır. Məsələn, Çimnaz müəllimənin məktəbi, Dilguşə müəllimənin məktəbi və s. Bütün məktəblərdə də problem eynidir. Adının açıqlanmasını istəməyən ingilis dili müəlliməsinin sözlərinə görə, Ağdam rayon məktəblərinin hamısında ştatlar dolu olsa da, faktiki həmin sahə üzrə çalışan yoxdur: “Məktəblərin əksərində nə psixoloq, nə laborant, nə də kitabxanaçı var. Amma hamısının adı ştat cədvəlindədir. Məvaciblərini direktorlar alır, onların adlarına da staj yazılır. Təkcə bizim məktəbdə ştatda 8 ingilis dili müəllimi var, amma faktiki işləyən 4 nəfərdir. Elə ay olmur ki, maaşımızdan 40-50 manat kəsilməsin. Öz aramızda rayon təhsil şöbəsinə “Elmira xanımın ticarət mərkəzi” deyirik. Kim də şikayət edirsə, salırlar gözümçıxdıya. Başlayırlar dərslərinə yoxlamalar göndərməyə, problemlər yaratmağa. Ona görə də heç kim ağzını açıb danışa bilmir”.

Təhsil Nazirliyi anonim şikayətlərə baxmır

Mənbə daha sonra deyir ki, Ağdamda 30-dan çox məktəb yalnız kağız üzərində mövcuddur. Əslində isə reallıqda yoxdurlar. Buna baxmayaraq adı olub, özü mövcud olmayan məktəblərə büdcədən hər il yüz minlərlə manat pul ayrılır. Təhsil Nazirliyinin “Qaynar xətt”inə dəfələrlə bu özbaşınalıqlar haqqında məlumatlar daxil olmasına baxmayaraq, şikayətə baxılmır. Hətta bu barədə mətbuata da şikayət edilib.
Təbii ki, məsələyə qarşı tərəfin də münasibətini öyrənməyə çalışdıq. Təhsil Nazirliyindən ənənələrinə sadiq qalaraq, anonim şikayətlərə münasibət bildirmək istəmədiklərini söylədilər: “Kimin şikayəti varsa, açıq şəkildə nazirliyə müraciət etsin. Biz də məsələni araşdırıb ölçü götürək”. Nazirlikdən hətta E.Şükürovanın telefon nömrəsini də aldıq. Lakin dəfələrlə aramamıza baxmayaraq, RTŞ-nin müdiri dəstəyi qaldırmadı. Ümid edirik ki, heç olmasa yazı çap olunduqdan sonra Elmira xanım baş verənlərlə bağlı mətbuata açıqlama verəcək.

Prezidentə şok şikayət

Redaksiyamıza üz tutan şikayətçilər Ağdam təhsil sistemində baş verən qanunsuzluqlardan ölkə rəhbərinə şikayət məktubu hazırladıqlarını bildirdilər. Şikayətin yaxın zamanlarda tam şəkildə ictimaiyyətə açıqlanacağını bildirən Ağdam pedaqoqları məktubunda rayon təhsil sistemindəki böyük korrupsiya və maxinasiyalardan bəhs olunur və dövlət orqanlarının baş verənlərə susqunluğundan danışılır:
“Çox hörmətli cənab Prezident!
Ağdam təhsil sistemi bərbad haldadır. Korrupsiya və rüşvət rayon təhsilini məhvə sürükləyir. Dövlət büdcəsinin talanması, təhsilin gəlir mənbəyinə çevrilməsi adi hala çevrilib. Maliyyə Nazirliyi dəfələrlə bu sahədə yoxlamalar aparmış və ortaya ciddi maliyyə pozuntuları çıxmışdır. Lakin buna baxmayaraq günahkarlar cəzalandırılmamışdır. Əksinə aparılan yoxlamalar rüşvətə bir qədər də vüsət vermişdir. Biz təhsil işçiləri artıq yoxlamanın əlindən bezmişik. İndiyədək üç dəfədir ki, Ağdam Təhsil Şöbəsinin müdiri Elmira Şükürovanın təkidi ilə hər məktəbdən 1000 manat pul yığılır. Bu nə vaxtadək davam edəcək? Yoxlama səhvləri düzəltmək və nöqsanları başa salmaq məqsədi ilə edilirsə, buna nə ad vermək olar? Onsuz da az məvacib alan köçkün müəllimlər bir tərəfdən də yoxlama adı ilə yığılan pulların hesabına müflis vəziyyətə salınır…
Cənab Prezident!
Siz çıxışlarınızda rüşvət və korrupsiyaya qarşı mübarizədən danışır və məmurlara bu barədə göstərişlər verirsiniz. İnanırıq ki, Ağdam təhsil sistemində baş verənlər haqda da məlumat alıb lazımi tədbir görəcəksiniz. Prokurorluq və MTN-nin ərazi şöbəsinin rəhbərliyi də baş verənləri susqunluqla seyr edir. Sizin birbaşa müdaxiləniz olmasa Ağdamda təhsil tamamilə məhv olacaq, hökumətin korrupsiyaya qarşı mübarizə aparmasına inam itəcək.”
Tahir Sarıyev