"Fərat" çay evindəki gizli toplantının sirləri açılır

DİN-in Baş Mütəşəkkil Cinayətkarlığa Qarşı Mübarizə İdarəsinin (BMCQMİ) yanvarın 19-da Xətai rayonu ərazisindəki "Fərat" çay evində keçirdiyi xüsusi əməliyyatın hələlik mətbuata bəlli olmayan detalları barədə maraqlı məlumatlar yayılıb. Bu barədə məlumat verəm mia.az-a daxil olan məlumata görə, yanvarın 19-da DİN-in Mətbuat Xidmətinin yaydığı rəsmi açıqlamada hadisənin təfsilatı izah edilməsə də, “Fərat” toplantısı əslində neçə vaxtdır aralarında ciddi rəqabət gedən iki azərbaycanlı kriminal avtoritetin – “Rövşən Lənkəranski” ilə “Lotu Quli” ləqəbli Nadir Səlifovun tərəfdarları arasındakı münasibətlərin aydınlaşdırılması, nüfuz dairələrinin yenidən bölüşdürülməsi məqsədi ilə təşkil edilmiş mərasim olacaqmış.
Ancaq ötən ilin oktyabrında “Yağmur” restoranında olduğu kimi, bu dəfə də BMCQMİ-nin müdaxiləsi avtoritetlərin tədbirini pozub. Deyilənə görə, “Yağmur”dakı toplantıdan fərqli olaraq, bu dəfə avtoritetlərin özlərində olan silahlardan atəş açması polis əməkdaşları ilə atışmaya gətirib çıxarıb. Hətta bizdə olan məlumata görə, BMCQMİ əməkdaşları təslim olmaq istəməyən, silahlı müqavimət göstərən üç avtoriteti ayaqlarından güllələyiblər də və onlardan ikisinin vəziyyəti olduqca ağırdır. Hazırda ölüm ayağında olan həmin şəxslərin polis nəzarəti altında Mərkəzi Klinik Xəstəxanada yerləşdirilidiyi, qohumlarının isə onları israrla Türkiyəyə aparmaq istədikləri və razılıq üçün DİN rəhbərliyinə də müraciət etdikləri söylənir.
Yaralananların, xüsusən də vəziyyəti ağır olan avtoritetin kimliyini dəqiləşdirmək cəhdlərimiz hələlik nəticə verməsə də, məlumat üçün bildirək ki, yanvarın 19-da DİN-in Mətbuat Xidmətinin yaydığı rəsmi açıqlamada 11 nəfərin - Sumqayıt şəhər sakinləri, əvvəllər məhkum olunmuş Etibar Abbasov, Natiq Atakişiyev, Natiq Məmmədov, RF-nin vətəndaşları Xalid Umudov, əvvəllər məhkum olunmuş Əsgər Əsgərov, Tovuz rayon sakini Nemət Abdullayev, Bakı şəhər sakinləri Elman Əliyev, əvvəllər məhkum olunmuş Natiq Eyvazov, Emin Eyvazov, Zaur Məmmədov və Şəki şəhər sakini Ramil Ağasiyevin adları çəkilmişdi və onların hamısının saxlanıldıqları qeyd olunurdu.
“Fərat” toplantısının məqsədləri barədə redaksiyamıza məlumat verən mənbənin sözlərinə görə, yanvarın 17-də qətlə yetirilən məşhur oğru “Ded Xasan”ın ölümündən qabaq “Quli”nin oğru adının geri qaytarmasına qərar verməsi və bu qərarın Azərbaycandakı həbsxanalara göndərilməsi cəza çəkmə müəssisələrində, xüsusən də Kürdəxanıdakı istintaq təcridxanasında son bir ay ərzində xeyli gərginlik yaradıbmış. Hətta Kürdəxanı təcridxanasında kütləvi bıçaqlanma hadisəsi də baş veribmiş və bununla “Lotu Quli”nin tərəfdarları “obşak”a nəzarətin dəyişdiyi xəbərdarlığını ediblərmiş. Gözlənilirmiş ki, “Fərat”dakı toplantıda bu məsələ yenidən müzakirəyə çıxarılsın, üstəlik, paytaxt Bakıda “vəziyyətə baxan” yeni nüfuz sahiblərinin adlar elan olunsun.
Mənbə bildirir ki, “Ded Xasan”ın qəfil ölümü son vaxtlar böyük həvəslə Azərbaycan həbsxanalarına nəzarəti ələ keçirməyə çalışan “Quli”nin mövqelərinə və planlarına böyük zərbə vurub və onu məyusluq əhvalına kökləyib. Ən təhlükəli düşmənin aradan götürülməsiylə xeyli rahatlıq tapan “Rövşən Lənkəranski” isə əldən verdiyi mövqeləri yenidən geri almağa və “Quli”ni də zərərsizləşdirməyə can atır. Yaxın günlərdə Azərbaycan həbsxanalarında Rövşənin təşəbbüsüylə “Quli”nin tərəfdarlarına qarşı yeni savaşın başlanacağı gözlənilir.