İtaliya, Yunanıstan və Skandinaviya ölkələrinin istehsalı kimi təqdim edilən xəz-dəri geyimləri, əslində, Çində istehsal edilirmiş

“Karolina Valiant” xəz-dəri qalereyası barədə ötən sayımızda dərc olunan məlumat böyük ajiotaj yaradıb. Qalereyanın mallarının keyfiyyətsiz olması barədə yazımızdan sonra mağazanın müştərilərinin sayı kəskin azalıb. Əldə etdiyimiz məlumata görə, buradan baha qiymətə xəz alan vətəndaşlar aldıqları malları geri qaytarmağa başlayıblar. Mağaza sahibləri əvvəlcə geri qaytarılan malların pulunu qaytarmaqdan imtina etsələr də, narazılığın artması onları bu addımdan çəkindirib. Narazı müştərilərin sayı hədsiz çox olduğundan, artıq qalereya sahibləri geri qaytarılmaq üçün gətirilən malların pulunu müştərilərə ödəyirlər.
Xatırladaq ki, qəzetimizin ötən saylarında “Karolina Valiant” xəz-dəri mağazasının istehlakçıları aldatdığı barədə məlumat vermişdik. Belə ki, İtaliya, Yunanıstan, Skandinaviya ölkələrinin istehsalı kimi təqdim edilən “Karolina Valiant” xəz-dəri geyimləri, əslində, Çin istehsalı imiş. İstehlakçıların aldadılmasından “Karolina Valiant” son 4-5 ayda milyonlarla gəlir əldə edib.
Saxta və keyfiyyətsiz xəzlər satan “Karolina Valiant” xəz-dəri qalereyası ictimaiyyətə geniş şəkildə reklam edildiyindən, buranın müştərilərinin sayının əvvəllər çox olduğu bildirilir. Burada xəzlərin qiyməti 1300 manatdan başlayır və 50 min manata qədər artır. Min üç yüz manata qısa və sadə xəz almaq mümkündür. Sadə və uzun xəzin start qiyməti 2000 manatdan başlayır. Xəzdən hazırlanan jiletlərin ən ucuzu isə 850 manatdır.
“Karolina Valiant”da baş verən qanunsuzluqlar bununla yekunlaşmır. Təxminən bir il bundan əvvəl ölkə mətbuatının səhifələrində "Karolina Valiant" xəz-dəri mağazasının istehlakçıları aldatdığı və bu salonun sponsorluq fəaliyyətindən yararlanan müəyyən teleşirkət rəsmilərinin bilərəkdən bu maxinasiyalara göz yumduğu barədə məlumatlar dərc olunmuşdu. Məsələnin məğzində ciddi iqtisadi maxinasiyalarda iştirak etmə və hətta dövlətin maliyyə sisteminə zərbə olan bir sıra fırıldaqçı firmalarla ortaqlıq kimi ağır ittihamlar dururdu. Bəzi məlumatlarda isə "Karolina Valiant" xəz-dəri mağazasında və bu şirkətin bütün strukturlarında MTN tərəfindən ciddi araşdırmaların aparıldığı da bildirilirdi. Məlum olmuşdu ki, "Karolina Valiant" mağazasında İtaliya, Yunanıstan və Skandinaviya ölkələrinin istehsalı kimi təqdim edilən xəz-dəri geyimləri, əslində, Çində istehsal edilirmiş. Bu yolla istehlakçıların aldadılmasından isə "Karolina Valiant" son 4-5 ayda milyonlarla gəlir əldə edib. Əldə olunan pulların az qala yarısı da məhz mağazanın reklam edildiyi telekanala yönəldilib. Bir müddət, hətta küçələrdən mağazanın reklam lövhələri də yığışdırılmışdı. O cümlədən həmin ərəfədə "Binə" ticarət mərkəzində yerləşən "Karolina Valiant" xəz-dəri mağazasının fəaliyyətinin də dayandırılacağı barədə məlumatlar yayılmaqda idi.
Lakin aradan az bir müddətin keçməsilə bütün bu söz-söhbətlər, sanki heç olmamış kimi, öz-özünə unuduldu. Düşünmək olar ki, irəli sürülən ittihamların əsassız olması və mağazada təqdim olunan malların yüksək keyfiyyəti buna səbəb oldu. Lakin bir fakt olduğu kimi diqqəti cəlb edərək, problemin hələ də həllini tapmadığını vurğulayır. Bu gün "Karolina Valiant" xəz-dəri mağazası, ticarət və sponsorluq fəaliyyətilə bərabər, eynilə sadəlövh müştəriləri aldatmağa da davam edir. Buna əsas sübut isə müştərilərin həmin mağazanın salonlarından əldə etdikləri məmulatların tez bir zamanda ilkin görkəmini və keyfiiyyətini itirməsidir. Məsələ bundadır ki, artıq xeyli zamandır müəyyən texnologiyalara yiyələnmiş Çin istehsalçıları tərəfindən beynəlxalq bazarlara çıxarılan məhsulları görkəminə görə yüksək keyfiyyətli Avropa mallarından ayırmaq heç də asan deyildir. Hətta xüsusi analizlər həyata keçirilmədən bəzi mütəxəssislər belə saxta malı orijinaldan ayırmaqda çətinlik çəkirlər. "Karolina Valiant" xəz-dəri mağazası tərəfindən həyata keçirilən bu möhtəşəm fırıldağın əsas sığortaçısı isə Azərbaycanın iqlim şəraiti olmuşdur. Belə ki, uzun illərdən bəri, Qərbi Avropa ölkələri və Rusiya ilə müqayisədə, ölkəmizdə qışın kifayət qədər mülayim keçməsi Çin istehsalı olan xəz-dəri məmulatlarının da öz keyfiyyətlərini nisbətən qorumasına səbəb olurdu. Lakin builki soyuq hava şəraiti Azərbaycan istehlakçısına Avropa brendləri kimi təqdim olunan kürklər və gödəkçələr üçün də əsl imtahana çevrildi. Təəssüflər olsun ki, məhz "Karolina Valiant" xəz-dəri mağazasından alınmış əksər məmulatlar tez bir zamanda öz sahiblərini məyus etmiş oldular. Geyim olaraq, əsas funksiyası kimi soyuqdan qorumağa xidmət edə bilmədiklərilə yanaşı, bu məmulatlar, həm də, ilkin gözəl görkəmlərini tez bir zamanda itirmiş oldular. Bu dəfə, necə deyərlər, sərt Bakı küləyi özü imtahançı qismində çıxış etdi. Paytaxtımızda sadəcə bir gün tüğyan etmiş qarlı çovğun "Karolina Valiant"ın xəz-dəri məmulatlarına sarsıdıcı zərbə vurdu. Yeni alınmış mallar, ən azından 4-5 qış mövsümündən çıxmış kimi görünməklə, istehlakçıların bütün etibarını itirmiş oldular. Nəzərə alsaq ki, bu məmulatların satış qiymətləri, bəzi məlumatlara görə, 1300 manatdan başlayır və 50 min manata qədər artır, o zaman "Karolina Valiant" sahiblərinin yol verdiyi maxinasiyaların miqyasını, təxmini də olsa, təsəvvür etmək olar. Hər halda, son günlər ölkə mətbuatı və digər informasiya vasitələri tərəfindən yenidən gündəmə gətirilməkdə olan "Karolina Valiant" mövzusu, nəhayət ki, bu məsələlərə tam aydınlıq gətiriləcəyinə və Azərbaycan istehlakçılarının hüquqlarının gələcəkdə də bu kimi təcavüzlərdən müdafiə olunacağına yeni ümidlər doğurur.
Mövzunu davam etdirəcəyik.

Xaliq