Gədəbəydə icra başçısının “düzəltdiyi” yol da “əriyib”


gundemxeber.az - Bu gün Azərbaycanın bütün rayonlarında abadlıq və quruculuq işlərinin aparılması ilə bağlı rəsmi dövlət nümayəndələrinin ardıcılıqla açıqlama verdikləri bir vaxtda, bəzi rayonlarda həmin inkişafın əksinə iş aparılması davam etməkdədir. Buna misal olaraq Gədəbəy rayonunda aparılan işləri göstərmək olar. Belə ki, rayonda icra başçısı Ramiz Yediyarov tərəfindən iş adamlarına qarşı dağıdıcılıq işləri hələ də dayanmaq bilmir. Bu yaxınlarda vaxtı ilə Rusiya Federasiyasına gedib və orada işləyərək əlinə pul toplamış Gədəbəy rayon sakini Oqtay Əliyev rayonda istirahət mərkəzi yaratmışdır. Bu cür iş adamlarının ölkəmizə nə dərəcədə xeyir verdiklərini bəzi rayon icra başçıları görmək belə istəmirlər. Adı tez-tez mətbuatda mənfi qəhrəman kimi hallanan Ramiz Yediyarov da belələrindəndir. Öz maraqları naminə dövlət tərəfindən ayrılan maliyyə vəsaitini mənimsəyən icra başçısı, rayon sakinlərini öz güclərinə yaşadığı ərazilərdə apardığı abadlaşdırma işlərini görmək belə istəmir. Bu günlərdə yuxarıda sadaladığımız fikirlərlə bağlı jurnalist araşdırması apararkən ortalığa əlavə faktlar da çıxdı.Həmin faktlarda cinayət əməllərinin olması göz qabağındadır. İndi oxuculara əldə etdiyimiz rəsmi sənədlərdən üzə çıxan qanundankənar və aldadıcı məqamları təqdim edirik. Belə ki, Gədəbəy şəhəri M.Şəhriyar küçəsi ev 13 ünvanında yaşayan Əliyeva Aybəniz Ramazan qızının Gədəbəy RİH-nın başçısı Ramiz Yediyarova ünvanladığı ərizədə ona məxsus olan 0,26 hektar təyinatlı torpaq sahəsinin olduğu, orda inşa edilmiş avtomobillərin yuyulmasl üçün nəzərdə tutulmuş tikintinin qeyri-qanuni uçurulması əvəzində isə heç bir kompensasiya verilməməsi, əlavə torpaq sahəsinin ayrılmaması barədə ünvanladığı şikayətə görün RİH-nin memarlıq və tikinti şöbəsinin müdiri Elxan Vəliyev necə cavab verib. “Sizin şikayət ərizənizə cavab olaraq bildiririk ki, həqiqətən Gədəbəy rayon İcra Hakimiyyətinin başçısının 1998-ci il 16 iyun tarixli 143 saylı sərəncamı ilə əriniz Vaqif Səfərova bazar tikmək məqsədi ilə 2564 kv.m torpaq sahəsi ayrılmışdır. Sərəncam verilərkən həmin ərazinin 35 kilovoltluq elektrik xəttinin bilavasitə altında olduğu, bazarda alqı-satqı zamanı vətəndaşların təhlükəsizliyinin təmin olunması, şəhərin mərkəzində avtomobillərin intensiv hərəkətinə maneçilik yaratdığı nəzərə alınmamışdır. Ona görə də Gədəbəy rayon İcra Hakimiyyəti başçısının 29 aprel 2002-ci il tarixli 94 saylı sərəncamı ilə torpaq ayrılması barəsində əvvəlki sərəncam ləğv edilmişdır”. Rayonun baş memarının şikayətçiyə ünvanladığı cavab məktubunu araşdırdıq. Və belə qənaətə gəldik ki, əgər həqiqətən rayonun baş memarı Elxan Vəliyev dediyi kimidirsə, bəs onda necə oldu ki, Ramiz Yediyarov və Elxan Vəliyev həmin 35 kilovoltluq və üstəlik təzə çəkilmiş 110 kilovoltluq elektrik naqillərinin altında ticarət mərkəzi inşa etdirmişdir. Cavab məktubunda göstərilir ki, vətəndaşların təhlükəsizliyinin təmin olunması guya ki, həmin torpaq sahəsi ayrılanda nəzərə alınmayıb. Bəs siz nəzərə aldınızmı? Axı indi daha çox həmin ərazidən yüksək gərginlikli elektrik naqilləri keçir. Sizin sözünüzdən elə çıxır ki, indi həmin ticarət mərkəzinə köçürdüyünüz insanların təhlükəsizliyi sizin üçün o qədər də vacıb deyil. Niyə də vacib olsun. Onsuz da siz Ramiz Yediyarov başda olmaqla kifayət qədər qeyri-qanunu işlərlə öz maddi durumunuzu çox gözəl düzəltmisiniz. Əgər belə olmasaydı R.Yediyarov icra başçısı təyin ediləndən bəri beş-altı bahalı maşın alıb dəyişməzdi.Növbəti şikayət ərizəsinə cavab olaraq, siz şikayətçiyə bildirmisiniz ki, Gədəbəy Sukanal İdarəsinin balansında olan su hövzəsinin üzərində Gədəbəy RİH-nin başçısının şəhər İƏD üzrə nümayəndəsi Şahbaz Bayramova məxsus nə ev tikilib, nə də həyətyanı torpaq sahəsi yoxdur. ”Hörmətli” Elxan Vəliyev ola bilsin ki, həqiqətən də Şahbaz Bayramovun adına həmin ərazidə heç nə yoxdur. Siz axı rayonun baş memarısınız. Deyə bilərsinizmi bəs həmin ərazidə tikilən və yüksək hasarla bağlanmış ev kimə məxsusdur?! Hər kimə məxsus olursa olsun bəs nə yaxşı bir memar kimi həmin qeyri-qanunu evin tikilisinə göz yumursunuz. Axı siz hətta 6 ədəd dam örtüyünü dəyişmək istəyən vətəndaşa “başçı icazə vermir”, deyirsiniz. Bəs nə yaxşı bu böyüklukdə içməli su hövzəsinin üstündə, həmin evin tikilməsinə icazə vermisiniz. Deməli sizin göndərdiyiniz cavab məktubları da necə işləməyinizin bariz nümünəsidir. Siz özününzü elə göstərirsiniz ki, guya ki, Ramiz Yediyarov icra başçısı təyin ediləndən abadlıq, quruculuq işləri sürətlə gedir. Ancaq həqiqətdə bunların hamısı yalandır.Əgər yalan olmasaydı Gədəbəy şəhəri Mirzə Sadıqov küçəsində (Pir məhəlləsi) yaşayan insanlar dəfələrlə onların yolu olmadığı haqqında Azərbaycan Respublikasının Prezidentinə müraciət etməzdilər. Siz də baxılması üçün Prezident Administrasiyasından sizə göndərilən məktuba laqeydcəsinə cavab verməzdiniz. Siz həmin cavab məktubunda göstərirsiniz ki, guya ki, Mirzə Sadıqov kücəsinə 2013-cü ilin noyabr ayında 80 ton (iki maşın) asfalt tökmüsünüz. “Hörmətli” Elxan Vəliyev birincisi 2013-ci ilin noyabr ayında Gədəbəyə güclü qar yağmışdı. Asfaltı qarın üstündənmi tökmüşdünüz? İkincisi əgər həqiqətən asfalt tökmüşdünüzsə gəlib o asfaltdan bircə parça göstərə bilərsinizmi? Deməli sizin danışdıqlarınızın hamısının cəfəngiyyat olduğu burdan üzə çıxır.Yadınızdan çıxarmayın ki, sizin bu yazıq rayonu talan etməyinizin ömrü Ramiz Yediyarovun işdən azad ediləcəyi günə qədərdir. Həmin gün də çox uzaqda deyil. Yəqin ki, aidiyyatı qurumlar gədəbəylilərin səsinə səs verəcəkdir. Və sizlər Ramiz Yediyarov başda olmaqla tezliklə müttəhimlər kürsüsündə əyləşəcəksiniz. Onda bilirik ki, bir ağızdan hər biriniz deyəcəksiniz ki, biz nə edəydik, Ramiz Yediyarovun buyurduqlarını yerinə yetirmişik. Gədəbəylilərin üzünə siz bir gədəbəyli olaraq necə dik baxacaqsınız, bircə onu bilmirik.