Direktor Səxavət Məmmədov Ədalət Vəliyevə arxalanır

Redaksiyamıza Mərziyə Davudova adına Mingəçevir Dövlət Dram Teatrının ali dərəcəli aktyoru İbrahim Türksoy (Salamov) tərəfindən təqdim olunmuş məlumatlarda, bu incəsənət ocağının tənəzzül dövrü yaşadığı bildirilir. Öz açıqlamalarında İbrahim Türksoy teatrın bugünkü durumuna görə direktor Həsən Həsənovu ittiham edir. Məlumatda bildirilir ki, H.Həsənov bu vəzifəyə təyinatının ilk günündən teatrı bazara, alver məkanına və intriqa ocağına çevirmişdir. Eyni zamanda da direktorun istedadlı, uzun illərdən bəri teatrın bütün yükünü öz çiyinlərində daşıyan işçilərə qarşı ayrı-seçkilik salması, ədalətsiz rəftar etməsi məlumatda öz əksini tapmışdır. İbrahim müəllimin iddialarına görə bu gün çalışdıqları teatrı iyrənc, utancverici əməllərin törədildiyi məkana çevirən H.Həsənov ona qarşı irəli sürülən haqlı iradlara yalnız “mən belə işləyirəm, gedin kimə, hara istəyirsiniz şikayət edin”-deyə cavab verir. Bu arada belə bir məqamı da qeyd etmək lazımdır ki, artıq iki il müddətində davam edən bu qarşıdurmada Mingəçevir Dövlət Dram Teatrının bir çox digər aktyorları da zərərçəkmiş kimi iştirak ediblər. Bu xüsusda İbrahim Türksoy bildirir ki, S.Məmmədov təyinatının ilk günündən teatrın adlı-sanlı aktyorlarını “gözümçıxdı”ya salsa da, həmin aktyorlar indiyədək səbr ediblər. Daha sonra aktyor öz məktubunda yazır: “Lakin bu illər ərzində baş verənlər artıq əndazənin aşılması deməkdir. S.Məmmədov Teatra gəldiyi gündən kollektivdə ögey-doğma münasibəti yaradıb. Halbuki biz onun teatrda mehriban, səmimi və işgüzar atmosfer yaradacağına ümid edirdik. Çünki o, elə vədlər verirdi ki, biz teatrda iş görüləcəyinə inanırdıq. Lakin hər şey əksinə oldu. O, iş görmək əvəzinə teatrda intriqaların yaranmasına girişib aktyorların heysiyyatı ilə oynamağa başladı. Teatr kollektiv sənətdir, tamaşanın uğurlu alınması yalnız aktyordan asılı deyil. Bura rejissura, dramaturgiya və digər amillər daxildir. Təəssüflər olsun ki, S.Məmmədov bütün bunlardan xəbərsizdir. Bu gün Mingəçevir teatrı əsl özfəaliyyət dərnəyinə çevrilib. Teatrda ruh, yaradıcı həvəs deyilən bir şey qalmayıb. H.Həsənov teatrı yolverilməz avtoritar prinsiplərlə idarə edir. Təsəvvür edin, teatrda elə adamlar var ki, biz indiyədək onların nə işlə məşğul olduğundan, hansı vəzifəni icra etdiklərindən xəbərsizik. Əvəzində hamı kimi bu adamlar da əmək haqqı alırlar.”Bütün bu baş verənlərdə diqqəti ən çox cəlb edən məqamlardan biri də budur ki, YUNESKO-nun tarixi abidələr siyahısına salınmış M.Davudova adına Mingəçevir Dövlət Dram Teatrının binası bu gün S.Məmmədov tərəfindən həm də ticarət mərkəzi kimi istismar olunmaqdadır. İbrahim Türksoyun sözlərinə görə hazırda teatrın zirzəmisi direktorun şəxsi studiyası kimi fəaliyyətdədir. Teatrın qarderobu sökülərək yerində kafe açılıb, binanın ikinci zirzəmisi restoran kimi icarəyə verilib, kiçik məşq zalı isə kinozal kimi fəaliyyət göstərir.Və nəhayət İbrahim Türksoyun verdiyi açıqlamalarda ölkənin Mədəniyyət və turizm nazirinin birinci müavini Ədalət Vəliyevin də adının hallanması təbii ki, maraq doğurmaya bilməz. Məsələ bundadır ki, aldığımız məlumatda Mingəçevir Dövlət Dram Teatrının direktorunun yol verdiyi bütün özbaşınalıqlarda Ədalət Vəliyevə istinad etdiyi bildirilir. Göstərilir ki, S.Məmmədov törətdiyi bütün əməlləri birbaşa nazir müavininin göstərişlərinə əsasən və onun himayəsi altında həyata keçirdiyini iddia edir.Sonda bunu da qeyd edək ki, hələ ötən il Mingəçevir Dövlət Dram Teatrının bir qrup işçisi, o cümlədən ali dərəcəli aktyorlar Ibrahim Salamov və Əsmər Qurbanova, I dərəcəli aktrisa Günel Əhmədova, II dərəcəli aktyor Asim Muxtarov və teatrın nəzdində fəaliyyət göstərən studiyanın üzvü Rizvan Əzimzadə direktor Həsən Həsənovun qanunazidd əməllərinə etiraz əlaməti olaraq Mədəniyyət və turizm naziri Əbülfəs Qarayevə müraciət ünvanlayıblar. Lakin təəssüflər olsun ki, nazirlik tərəfindən Mingəçevir Dövlət Dram Teatrında baş verənlərə hələ də münasibət bildirilməyib.