“Borçalı” Cəmiyyətinin sədri Zəlimxan Məmmədli facebook səhifəsində maraqlı status paylaşıb. gundemxeber.az həmin statusu təqdim edir:
“Minnətlə danışmağı xoşlamaram. Azərbaycanın Gürcüstana etdiklərinin Gürcülər əvəzini versin deyə səs salanları da qınayıram. Səs salanlara isə, edilən yaxşılığı başa qaxmanın dədələrimizdən bəyənilməyən xasiyyət olduğunu anlatmağa çalışmışam. Bunun iki dövlətin arasında qarşılıqlı faydalı anlaşma olduğunu, hər hansı etnosa, o cümlədən soydaşlarımıza rəsmi səviyyədə əlavə imtiyazlar nəzərdə tutmayan, dövlətlərarası razılaşmalar olduğunu həqiqət bilirəm.
Ancaq bir şey hamıya aydındır ki, biz - Azərbaycan və Gürcüstan bir ailə olmaq niyyətindədirlər. Bu Avropa ailəsidir. Bu məqamda hər birimizin üzərinə əlavə məsuliyyət düşür və buna əməl etmək borcdur. Avropa ailəsinə daxil olmanın şərtləri də problemsiz, insanların, mədəniyyətlərin, dilin, dinin qarşılıqlı uzlaşması, müxtəlifliklərin birhgəyaşayışının mümkünlüyü, hətta daha gözəl olduğu fəlsəfəsi üzərində düşünməni diqtə edir. Avropaya getmək istəyi olan Gürcüstan səmimidirsə, əhalinin sayına görə II etnosu olan, regionun isə üstün saylı etnosu olan türklərlə, konkret halda ortaq problemləri və dəyərləri çox olan Azərbaycanla və azərbaycan türkləri ilə daha səmimi olmalıdır.
Erməni naqisliyi, diversiyası Kremlin əli ilə Güney Qafqazı içəridən yeyir, Gürcüstan və Azərbaycanı etnik separatçılıqla təhdid edir, birlik və bərabərliyə ciddi təhlükə yaradır. Gürcüstanın Azərbaycandan fərqli olaraq Abxaziya və Cənubi Osetiya problemini və onun unutarlığını laxladan Kremlin iqtisadi, psixoloji blokada reallığını da bura daxil etsək, mənzərə tam aydın olur. Gürcüstanın vəziyyəti daha dramatik görünür.
Şaakaşvilinin ardıcıl, radikal idslahatları bütün məziyyətləri ilə start götürdüyü davam etsəydi Avropa birliyi standartlarına daha yaxın bir aura mövcurd ola bilərdi. İndikilər isə islahatlarda əski sovetlərdən qalma KQB metoduna, “parçala-hökm et" prinsipinə meylli görünürlər. Çox qorxulu meyldir.
Kifayət qədər problemləri olan Gürcüstanın, Azərbaycan və Türkiyənin bütün anlamlarda xoşgörülü münasibətinə adekvat olmayan münasibət sərgiləməsi düşündürücüdür. Məntiq də, siyasi reallıqlar da, geopolitik durum da Gürcüstandan başqa, daha səmimi, daha uzlaşan mövqe sərgiləmələrini diqtə edir.Gürcüstan isə cığal, gücü rəqibə yetməyən uşaq təsiri bağışılamaqdadır. Yoxsa günün günorta çağı Azərbaycanda qeydiyyatdan keçmiş, minlərlə əski gürcüstan vətəndaşlarının təmərküzləşdiyi qos-qocaman “Borçalı” Cəmiyyətinə, onun sağlam inkişaf xəttinə badalaq gəlməyyə qalxmazdı.
“Borçalı” Cəmiyyətinin üz tutduğumuz Avropa ailəsinin tələblərinə uyğun, müxtəlif mədəniyyətlətin daha gözəl birgəyaşayışının mümkünlüyünü təsdiq etməyə yaxın olduğu bir dövrdə, onun yoluna çürük kötük tullamanın nə anlamı? Cəmiyyət rəsmilərinin ayıq başlı hər kəsə bəlli olan dostluq, qardaşlıq yolunu kəsməyə cəhd etmənin adı nədir? Fikrimizcə Burada Gürcü siyasi hakimiyyətinə daxil olmuş antiavropa, antiinteqrasiya təfəkkürlü qrupun və ya siyasi oriyentasiyanı Kremlə - geri döndərməyə çalışan destruktiv qüvvənin mövcudluğunu ehtimallamaqda haqlıyıq.
Bütün hallarda bizi öz dədə-baba torpağımıza yasaqlamanın adı qeyri-səmimilik, minnətsiz uzanan dost əlinin sahibinə sayğısızlıqdır. Bunu hamı, həm Gürcüstan, həm də Azərbaycan, həm də Türkiyə dövlətləri və sağlam ictimaiyyət nəzərə almağa məhkumdur. Zamanı itirmək olmaz, problem aradan qalxmalıdır.
Zamanla zarafat qorxuludur”.