Rayonun təhsil, mədəniyyət və maliyyə başqanları birləşib dövlətin vəsaitlərini mənimsəyirlər

Bu gün sıradan bir Azərbaycan ziyalısını sərbəst mövzuda söhbətə cəlb etsən, əvvəl-axır bu mövzu ya təhsilimizə, ya da ki, mədəniyyətimizə bağlanacaq. Əlbəttə ki, hər iki sahə cəmiyyətin ziyalı təbəqəsi üçün daha yaxın və doğma olduğundan bu sahələrdə əldə olunan uğur və nailiyyətlər də, yaşanan problemlər də həmin insanların hər zaman diqqət mərkəzində olur. Sevindirici haldır ki, bu gün Azərbaycan dövləti həm ölkənin təhsil sistemində həyata keçirdiyi əsaslı və mütərəqqi islahatlarla, həm də mədəniyyətimizin dünyaya tanıdılması istiqamətində atılan əhəmiyyətli addımlarla hər iki sahənin inkişafı üçün geniş imkanlar, əlverişli zəmin yaradır. Digər tərəfdən isə, xüsusilə bəzi regionlarda bu sahələrin inkişafına görə məsuliyyət daşımalı olan rəhbər vəzifəli şəxslərin qeyri-qənaətbəxş fəaliyyətləri bir çox hallarda dövlət siyasətinin tam ziddinə yönəlmiş nəticələrə səbəb olur. Elə İmişli ziyalılarını son vaxtlar getdikcə daha çox narahat edən məqamlardan biri də məhz belə bir durumla bağlıdır. Bu xüsusda redaksiyamıza daxil olan məlumatlarda İmişli Rayon Təhsil Şöbəsinin müdiri Ramiz Əmirovun, eləcə də rayonun Mədəniyyət və Turizm Şöbəsinə rəhbərlik edən Süleyman Bəşirovun yarıtmaz fəaliyyətləri üzündən bu sahələrin hər ikisində müşahidə olunan ciddi geriləmələrdən bəhs olunur. Xatırladaq ki, qəzetimizin ötən saylarında biz artıq bu mövzuda bir neçə tənqidi material dərc etmişik. Lakin yeni aldığımız məktublardan məlum olur ki, bu məmurlar tənqiddən nəticə çıxararaq müşahidə olunan neqativ halların aradan qaldırılması istiqamətində müvafiq tədbirlər görməyə meyilli insanlar deyillər. Əksinə, aldığımız məlumatlarda rayonun həm təhsil, həm də mədəniyyət sahələrində durumun günü-gündən daha da ağırlaşdığı, çeşidli qanun pozuntularının və korrupsiya hallarının daha da artdığı bildirilir. Artıq dəfələrlə qeyd olunduğu kimi Süleyman Bəşirovun yarıtmaz idarəçiliyi sayəsində Mədəniyyət və Turizm Şöbəsinin tabeliyində fəaliyyət göstərən 1 mədəniyyət sarayı, 7 mədəniyyət evi, mərkəzi kitabxana, 2 şəhər kitabxanası, 46 kitabxana filialı, şəhər klubu, 26 klub müəssisəsi, muzey, 1 uşaq musiqi məktəbi və 1 uşaq incəsənət məktəbində iş formal xarakter daşıyır və əsasən kağız üzərindədir. Vətəndaşlara mədəni xidmətin səviyyəsi get-gedə aşağı düşür, əhalinin asudə vaxtının təşkili, gənclərin mənəvi, əxlaqi və vətənpərvərlik tərbiyəsi diqqətdən kənarda qalmışdır. Süleyman Bəşirov isə həmin müəssislərin hər birindən, hətta rəhbər vəzifələrini “satdığı” obyektlərdən belə aylıq haqq yığır. Bu ödənişlərdən boyun qaçıran müəssisə rəhbərləri üçün isə şöbə müdiri tərəfindən ciddi problemlər yaradıla bilər. Buna görə də yaranmış vəziyyət həmin müəssisə rəhbərlərini də adekvat addımlar atmağa sövq edir. Məlumatlarda bildirilir ki, rayonun musiqi məktəblərində çalışan müəllimlərin dərs saatlarının planlaşdırılması ilə həyata keçirilən müxtəlif maxinasiyaların köməyi ilə xeyli miqdarda rüşvət yığımlarına və büdcə vəsaitlərinin mənimsənilməsinə nail olunur. Digər tərəfdən də aldığımız məlumatlarda bu gün bölgədə turizmin və mədəniyyətin inkişafı məqsədilə Mədəniyyət və Turizm Nazirliyi tərəfinən ayrılmış büdcə vəsaitlərinin də təyinatı üzrə istifadə olunmadığı bildirilir. Qeyd olunur ki, həmin vəsaitlərin böyük bir hissəsi qeyri-qanuni maxinasiyalar, şişirdilmiş smetalar, müxtəlif silinmələr yolu ilə Süleyman Bəşirov tərəfindən mənimsənilir. Eyni zamanda da məlumatlarda oxşar vəziyyətin rayonun təhsil şöbəsində müşahidə olunduğu vurğulanır. Qeyd olunur ki, İmişli RTŞ-nin müdiri Ramiz Əmirov son illər ölkənin təhsil sahəsində əldə olunan nailiyyətləri məhz yarıtmaz fəaliyyətilə kölgə altına alır. Rayonun təhsil işçilərindən alınan məlumata görə, Ramiz Əmirov rayon təhsilini son dərəcə acınacaqlı duruma gətirib. Bu isə haqlı olaraq yerli ictimaiyyəti və təhsil işçilərini ciddi şəkildə narahat edir. Rayon təhsil işçiləri müxtəlif instansiyalara ünvanladıqları məktub və ərizələrdə vəziyyətin gərgin həddə çatdığını qeyd edirlər: “Təhsil sisitemindəki yenilklər və irəliləyişlər İmişli rayon təhsil sistemində nəzərə çarpmır. Bunun isə əsas səbəbkarı məhz rayon təhsil şöbəsinin müdiri Ramiz Əmirovdur. O, müxtəlif maliyyə maxinasiyaları ilə də əhalinin diqqətini cəlb edir. Məsələn, İmişli rayonunda yerləşən təhsil müəssisələrində əslində keçirilməmiş dərs saatlarına görə əmək haqqlarının hesablanması və digər üsulların tətbiqilə dövlət vəsatlərinin mənimsənilməsi artıq adi hal alıb. Ramiz Əmirov məktəblərin maliyyə rıçaqlarını da ələ keçirib. İmişlidə təhsilin bügünki vəziyyətini acınacaqlı kimi qiymətləndirməyə əsas verən faktlar çoxdur. Bu sırada ilk növbədə davamiyyətin aşağı olmasını göstərmək olar. Ucqar kəndlərdəki məktəblərdə siniflər tamamilə boş olur...” Təbii ki, İmişlinin təhsil və mədəniyyət şöbələrində yol verilən büdcə vəsaitlərinin mənimsənilməsi hallarından danışarkən, bu rayonun Maliyyə idarəsinin fəaliyyəti barədə də bir çox suallar meydana gəlir. Aydındır ki, məhz maliyyə idarəsinin iştirakı olmadan bu mənimsəmələrin reallaşdırılması da mümkün olmaz. Buna görə də redaksiyamıza təqdim olunan məlumatlarda Rəhim Rəhimovun rəhbərlik etdiyi İmişli rayonu Maliyyə İdarəsinin fəaliyyətində yer almış çeşidli qanun pozuntuları barədə açıqlamalar xüsusi yer tutur. Həmin məlumatlarda göstərilir ki, bu gün rayonun iqtisadi-sosial inkişafı üçün ayrılmış dövlət vəsaitləri heç də ünvanyönlü xərclənmir. Rəhim Rəhimov isə rəvac verdiyi müxtəlif maxinasiyalar vasitəsilə bu vəsaitlərin külli-miqdarda mənimsənilməsinə yol açır. O cümlədən daxil olan məlumatlarda R.Rəhimovun rayonun dövlət idarələrində rəhbər vəzifələrdə çalışan bəzi qohumları ilə əlbir olaraq dövlət vəsaitlərinin mənimsənilməsi məqsədilə həyata keçirdiyi maxinasiyalara dair də maraqlı açıqlamalar təqdim olunmaqdadır. Belə ki, məlumatlara görə Rəhim Rəhimov doğma xalası oğlu olan İmişli RTŞ-nin müdiri Ramiz Əmirovla əlbir olaraq dövlət əmlakının mənimsənilməsi və büdcə vəsaitlərinin talanmasında iştirak edirlər. Belə ki, R.Rəhimov xalası oğlu R.Əmirovla rayon məktəblərinə yeni invertarlrın alnması adı altında küllü miqdarda vəsaiti mənimsəyirlər. Bir müddət əvvəl isə aldığımız məlumatlarda bu şəxslərin əlbir olaraq rayondakı banklardan birindən küllü miqdarda vəsait çıxardıqları qeyd olunmuşdu. Digər tərəfdən isə aldığımız məlumatlarda vurğulanır ki, İmişli rayonu Maliyyə İdarəsinin fəaliyyətinə dair yuxarı instansiyalara təqdim olunan hesabat və məruzələrdə şişirdilmiş rəqəmlər göstərilir. Mənbələrin məlumatlarında xüsusi olaraq qeyd olunur ki, idarənin fəaliyyətində "Dövlət büdcəsi haqqında" qanunun bir çox maddələri də kobud şəkildə pozulur. Belə ki, həmin qanuna əsasən Maliyyə İdarəsi tərəfindən büdcədən maliyyələşən təşkilatların üç ildə bir dəfədən az olmayaraq təftiş olunması nəzərdə tutulsa da, İmişli rayonundakı təşkilatlardan bəziləri ildə bir neçə dəfə və eyni zamanda da qərəzli formada yoxlanıldığı halda, digərlərinin fəaliyyəti ümumiyyətlə təftiş edilmir. Bu vəziyyət isə Rəhim Rəhimovun həmin idarə və təçkilatlara təyin etdiyi aylıq “haqq”ların hansı davamiyyətlə ödənilməsi ilə nizamlanır. Bütün bunlar İmişlinin maliyyə, təhsil və mədəniyyət sahələrinin reanimasiyası üçün təcili tədbirlərin görülməsinin artıq çoxdan vaxtının çatdığına dəlalət edir. Lakin nədənsə müvafiq instansiyalar hələ də yaranmış vəziyyətə müdaxilə etməyə tələsmirlər.