Təhsil Şöbəsinin müdiri Zakir İbrahimovun fəaliyyətsizliyi buna səbəb olub

Bir tərəfdən Azərbaycan dövlətinin ölkə təhsilini yüksək dünya standartları səviyyəsinə çıxarmaq yönümündə həyata keçirdiyi əsaslı islahatlar, digər tərəfdən isə bu sahədə “çalışan” bəzi korrupsioner məmurların həmin islahatları puça çıxarmağa yönəldilmiş cəhdləri arasında yaşanan ziddiyyətlər respublikanın təhsil sisteminin ümumi inkişafına ciddi manelər törətməkdədir. Aydındır ki, gec-tez bu münaqişədə məhz ikinci tərəf, yəni korrupsioner məmurlar məğlub olacaqlar. Lakin bu nə zaman baş verəcək və həmin vaxta qədər böyüməkdə olan gənc nəslin hələ neçə nümayəndəsi müstəqil həyata savadsız qədəm qoyacaq kimi suallara cavab verməyə indi hər kəs çətinlik çəkir. Bu baxımdan Zəngilanın təhsil sahəsində hal-hazırda yaşanan ciddi problemlər də yerli ictimaiyyəti son dərəcə narahat etməkdədir. Artıq uzun müddətdir ki, ölkənin kütləvi informasiya vasitələrinə və bir çox əlaqədar instansiyalara Zəngilan rayonu Təhsil Şöbəsinin müdiri Zakir İbrahimovun fəaliyyətindən doğan ciddi narazılıqları əks etdirən şikayət məktubları ünvanlanmaqdadır. Həmçinin bu günlərdə redaksiyamıza ardıcıl daxil olmuş bir neçə şikayət ərizəsində də rayon ictimaiyyətinin, xüsusilə də ziyalı təbəqənin Zəngilanda təhsilin durumu ilə bağlı ciddi narahatlıqları öz əksini tapır. Daxil olan bütün məlumatlarda Zakir İbrahimov ilk növbədə ciddi korrupsiya əməllərində ittiham olunur. Buna görə də məlumatlarda mənbələr bu qurumun işinin təcili olaraq Maliyyə Nazirliyi tərəfindən təftiş olunması zərurətindən bəhs edirlər. Artıq qeyd olunduğu kimi ərazisi işğal altında olan Zəngilanınn təhsil müəssisələri bu gün ölkəmizin müxtəlif rayonlarında fəaliyyət göstərməkdədirlər. Ümumilikdə isə Zəngilan RTŞ-nin tabeliyində fəaliyyət göstərən bu təhsil ocaqlarında 4112-dən çox şagird təhsilə cəlb edilmişdir. Məlumatlarda xüsusi olaraq vurğulanır ki, belə yoxlama nəticəsində Zəngilan RTŞ-də həyata keçirilən çeşidli mənimsəmə faktları aşkarlana bilər. Mənbələr tərəfindən irəli sürülən ittihamlara əsasən şöbə aidiyyatı üzrə Mərkəzi İcra orqanlarının sərəncam və göstərişlərini rəhbər tutaraq fəaliyyət göstərməli olduğu halda, əksər hallarda həmin qərar və sərəncamların pozulmasına yönəlmiş fəaliyyət göstərməkdədir. Külli miqdarda dövlət vəsaitlərinin mənimsənilməsinə yol açan qanun pozuntularına isə şöbənin işində addımbaşı rast gəlmək olur. O cümlədən Zakir İbrahimov tərəfindən rəvac verilən qeyri-qanuni əmək haqlarının yazılması, məktəbdənkənar müəssisələrdə əlavə qrupların yaradılması, ödəniş dərəcələrinin düzgün müəyyən edilməməsi, siniflərdə qəsdən komplektləşmə aparılmaması və digər bu kimi hallar olduqca böyük məbləğlərin silinməsinə şərait yaratmaqdadır. Bütün bu deyilənlər bir daha təsdiq edir ki, dövlətimizin ölkə təhsilinin inkişafına göstərdiyi yüksək diqqət və qayğıdan Zəngilan RTŞ-nin müdiri Zakir İbrahimov təhkim olunduğu sahənin inkişafı üçün deyil, daha çox öz şəxsi mənafeylərinin təminatı baxımından yararlanmağa çalışır. Narazı sakinlər tərəfindən müxtəlif instansiyalara ünvanlanan şikayət ərizələrində rayon təhsilində vəziyyətin dözülməz həddə çatdığı göstərilir. Mənbələrin bildirdiyinə görə, Zəngilan Təhsil Şöbəsinə kadrların seçilməsi zamanı heç bir qanuna riayət olunmur. Belə ki, təhsil sistemindən anlayışı olmayanlar hazırda təhsil şöbəsində bəzi mühüm vəzifələri tutublar. Digər tərəfdən isə diqqət çəkən məsələlərdən biri də Zakir İbrahimovla Təhsil Nazirliyi arasında artıq uzun müddətdir ki, davam edən çəkişmədir. Daha doğrusu, şöbə müdirinin TN-nin rəhbərliyinə qarşı nümayiş etdirdiyi aşkar saymazyana münasibətidir. Bu xüsusda aldığımız məlumata görə, nazirliyin müəllimlər üçün keçirdiyi imtahandan keçə bilməyən bir nəfər bu gün də Zəngilan rayonu 9 nömrəli orta məktəbdə müəllim işləyir. Bu faktdan belə başa düşmək olar ki, şöbə müdiri TN-nin keçirdiyi imtahanları şübhə altına alır və imtahandan keçə bilməyən insanı işlə təmin edir. Məlumatlarda bu da göstərilir ki, bu kimi hallarla Zəngilan məktəblərində kifayət qədər çox rastlaşmaq olar...