Bəzən bir neçə mövzu ətrafında paralel və ya az fərqlənən zaman kəsikləri çərçivəsində aparılan araşdırmalar zamanı maraqlı məqamlar aşkar etmək olur. Məsələn, müəyyən edirsən ki, bir rayonun bir neçə dövlət müəssisəsinə eyni soyadlı şəxslər rəhbərlik edir. Qeyri-ixtiyari və ya düşünülmüş şəkildə onlara eynilə aidiyyatı olan daha başqa müştərək məqamların olması ilə maraqlanırsan. Müəyyən olunur ki, həmin məmurlar bu və ya digər formada, fərqli və ya oxşar müstəvilərdə rayonda baş verən qalmaqallı olayların iştirakçıları olurlar. Bütün bunlardan sonra nəhayət ki, əslində ən üzdə olan, ən aşkar fakt da təsdiq olunur. Bax bu zaman müəssisələrinin fəaliyyəti barədə rəy söylənən rayonda gedən, olduqca maraqlı proseslərin müşahidəçisinə çevrilmək olur. Konkret faktlara keçsək, bu gün İmişli rayonunda kifayət qədər tanınan Əmirovlar soyadının daşıyıcıları artıq uzun müddətdir ki, ölkə mətbuatında davamlı olaraq işıqlandırılan müxtəlif problemli olayların iştirakçıları kimi çıxış edirlər. Zaman keçdikcə bu olaylar ətrafında müzakirələr nəinki səngimir, əksinə hadisələrin cərəyanı digər Əmirovları da diqqət mərkəzinə çıxarır. Yaranmış mənzərəni birlikdə yenidən seyr etmək üçün əlbəttə ki, ilk növbədə İmişli Rayon Təhsil Şöbəsinin müdiri Ramiz Əmirovun öz postunda fəaliyyəti zamanı yol verdiyi bəzi qanu pozuntuları ilə bağlı yaranmış vəziyyətə nəzər salmaq lazımdır. Bu baxımdan isə rayondakı mənbələrin təqdim etdikləri məlumatlar xüsusi əhəmiyyət kəsb edir. Belə ki, hələ ötən ilin mart ayında qəzetimizdə dərc olunmuş materiallardan birində, Ramiz Əmirovun adı, artıq İmişli Maliyyə İdarəsinin rəhbərliyi tərəfindən yol verildiyi iddia olunan bəzi maxinasiyalarda onun yaxından iştirakı ilə bağlı hallandırılmışdı. Bu xüsusda aldığımız məlumatlarda rayonun xüsusilə təhsil və səhiyyə sahələrnin inkişafı üçün ayrılmış dövlət vəsaitlərinin heç də ünvanyönlü xərclənmədiyi vurğulanır və bildirilirdi ki, İmişlinin Maliyyə İdarəsinə rəhbərlik edən Rəhim Rəhimov rayonun dövlət idarələrində rəhbər vəzifələrdə çalışan bəzi qohumları ilə, o cümlədən RTŞ-nin müdiri, doğma xalası oğlu Ramiz Əmirovla əlbir olaraq dövlət vəsaitlərinin mənimsənilməsi məqsədilə müxtəlif maliyyə maxinasiyaları həyata keçirir. Belə ki, R.Rəhimovun R.Əmirovla birgə rayon məktəblərinə yeni inventarlrın alnması adı altında küllü miqdarda vəsaiti mənimsədikləri iddia olunurdu. Həmçinin məlumatlarda, xalaoğluların daha əvvəl də əlbir olaraq rayondakı banklardan birindən küllü miqdarda vəsait çıxardıqları bildirilirdi. İmişlidəki qaynaqlarımız isə indi də bu fikirdədirlər ki, məhz Maliyyə Nazirliyinin rayonda yaranmış vəziyyətə liberal münasibəti Rəhim Rəhimov tərəfindən törədilən yeni-yeni özbaşınalıqlara rəvac vermiş olur. Yeri gəlmişkən, aldığımız yeni məlumatlara görıə heç bir şeydən çəkinməyən Təhsil şöbəsinin müdiri və Maliyyə idarəsinin rəisi bu gün də sürəkli olaraq müxtəlif maxinasiyaları həyata keçirməkdən qətiyyən çəkinmirlər. Lakin biz imkan daxilində diqqətimizi Əmirovlardan ayırmayaq. Ayrıca olaraq İmişli RTŞ-nin bərbad fəaliyyətinə dair aldığımız məlumatlarda belə bir məqam da ayrıca vurğulanır ki, artıq son bir neçə dərs ilində rayon üzrə şagirdlərin dərslərə davamiyyəti xüsusilə aşağı olub. Müəllimlərin bəzisi repititorluq etdiyi üçün məktəbdə uşaqları öyrətmək istəmirlər, dərsələrə gəlmirlər. Direktorlar həmin müəllimlərdən rüşvət alaraq onların məktəbdən yayınmalarına göz yumurlar. Şöbə müdiri isə bütün bunlardan təbii ki, xəbərdardır və bu məsələlərdə marağı olduğu üçün heç kimi cəzalandırmır. Rayondakı mənbələr israrla bildirirlər ki, RTŞ müdiri rayonun təhsil sahəsinin inkişafı üçün ayrılmış dövlət vəsaitlərinin təyinatı üzrə xərclənməsini təmin etmir. Bu xüsusda müxtəlif kütləvi informasiya vasitələrində ölkənin Təhsil naziri Mikayıl Cabbarova müraciət edən İmişli sakinləri Ramiz Əmirovun rayon təhsilinə vurduğu ziyanın ölçüyəgəlməz olduğunu vurğulayaraq qeyd edirlər ki, faktiki olaraq bu gün İmişli məktəblərində savadsız uşaqlar yetişir. Lakin bundan sonra da qəzetimizdə Ramiz Əmirovun yarıtmaz fəaliyyətinə dair materiallar dərc olundu. Nəhayət növbəti materiallardan birinin dərcindən sonra İmişli Rayon Təhsil Şöbəsinin müdiri iltifat göstərərək redaksiyamızın elektron poçtuna məktubla cavab göndərdi. Ramiz Əmirovun əndişə içində olduğu aşkar hiss ediən məktubda müəllif qeyd edirdi ki, bizim İmişli RTŞ-nin fəaliyyəti və şöbəmüdirinin şəxsiyyəti əleyhinə guya ki, qərəzli, qeyri-obyektiv mövqeydən hazırladığımız materialda göstərilən məqamlar həqiqətə ziddir.Amma bundan sonra redaksiyamıza daxil olmuş növbəti müraciət diqqəti artıq Əmirovların digər bir təmsilçisinə, son seçkilərdə bələdiyyə sədrliyinə namizədliyi YAP-ın yerli təşkilatı tərəfindən irəli sürülmüş İmişli rayonu Cəfərli kənd sakini, kənd orta məktəbində bədən tərbiyyəsi müəllimi işləyən Əmirov Rabil Zeyniş oğluna yönəltdi. Həm də bu dəfə müzakirəyə çıxarılmış olayda Əmirov soyadını daşıyan vətəndaş məhz zərərçəkmiş tərəf kimi çıxış etmiş oldu. Belə ki, Rabil Əmirov redaksiyamıza şəxsən təqdim etdiyi ərizəsində yaşadığı ərazi üzrə keçirilmiş bələdiyyə seçkilərinin bir sıra ciddi qanun pozuntuları ilə müşayiət olunduğunu iddia edirdi. Rabil müəllimin sözlərinə görə o, artıq üçüncü dəfədir ki, yerli bələdiyyə seçkilərində namizəd kimi iştirak edir. Həm də kənddə kifayət qədər nüfuz və hörmətə malik olan Rabil müəllim hər dəfə kifayət qədər səs toplamağa nail olur. Lakin rəsmi nəticələrə görə onun iştirak etdiyi bütün seçkilərdə hər dəfə məhz Kərim Həsənov “qalib çıxır”. Bu isə, yenə də Rabil müəllimin iddialarına görə, yalnız müəyyən saxtalaşdırmalar sayəsində mümkün olur. Məsələn, Rabil müəllim bildirir ki, bundan əvvəlki seçkilərdən sonra Kərim Həsənov ona hətta 1500 ABŞ dolları məbləğində rüşvət verərək artıq ondan “aldığı səslərin halallığını” da istəmişdi. Lakin Rabil Əmirov artıq yaranmış vəziyyətə etirazını bildirməsə də, həmin pulları kənd ağsaqqallarından birinin vasitəsilə geri qaytarmışdı. Son seçkilərdə isə Rabil müəllim namizədliyinin qeydə alınmasından əvvəlcə ümumiyyətlə xəbərdar olmayıb. Bu barədə ona yenə də Kərim Həsənov telefon vasitəsilə xəbər verib. R.Əmirovun sözlərinə görə kənddə fəaliyyət göstərən hər iki seçki məntəqəsinin sədrləri, Şakir Rüstəmov və Yavər müəllim də məhz Kərim Həsənovun maraqlarından çıxış edərək müxtəlif saxtakarlıqlara rəvac verirlər. Bu baş verənlərdə ən maraqlı cəhət isə bu idi ki, Rabil Əmirov nə seçki nəticələrinin ləğv olunması, nə də öz hüquqlarının bərpası kimi tələblər irəli sürmürdü. Sadəcə olaraq, artıq üçüncü dəfə Kərim Həsənovun və onun əlaltılarının səyləri ilə belə bir vəziyyətə düşməsi şikayətçinin sözlərinə görə onu mənəvi cəhətdən son dərəcə sarsıtmışdı. Bu səbəbdən də seçki maxinasiyalarının biixtiyar qurbanına çevrimiş bu insan, həqiqəti sübuta yetirə bilməyəcəyi halda intihar edəcəyini bəyan etmişdi...Göründüyü kimi, artıq neçə müddətdir ki, İmişli rayonunda gedən və əsasən neqativ məqamları ilə gündəmə gələn proseslərdə davamlı olaraq Əmirovların və onların yaxın qohum-əqrabalarının adları hallanmaqdadır. Əlbəttə ki, bu vəziyyət həmin şəxslərin müxtəlif dövlət qulluqlarında xidmət etmələri şərti daxilində daha diqqətəlayiq olur. Məhz bu səbəbdən də müvafiq dövlət orqanları tərəfindən, materiallarda irəli sürülmüş iddialar ətrafında araşdırmaların aparılması son dərəcə məqsədəuyğun hesab oluna bilər.