Baş həkim xəstəxananı şəxsi biznesinə çevrilib.

Bütün dünyanı maliyyə böhranı bürüdüyü bir vaxtda, ölkəmizdə hələ ki, bunu hiss etmirik. Şübhəsiz ki, belə bir ağır sınaqda hər bir kəs mənimsəmədən, talançılıqdan uzaq durmalıdır. Təbii ki, dövlət vəsaitinin 1 qəpiyinə belə göz dikməmək gərəkdir.

Qazax MRX-nın binası söküldü, baş həkimə villa tikildi.

Mərkəzi xəstəxananın binası sökülənə qədər, baş həkim Arzu Novruzov Qazax rayon Səhiyyə Şöbəsində müavin işləyirdi. Həmişə şəxsi evinin yarımçıq olmasından gileylənirdi. 2012-ci ilin sonlarında baş həkim təyin olunduqdan sonra, onun şəxsi həyatında əsl intibah dövrü başladı. Bir göz qırpımında A. Novruzovun nəinki yarımçıq evi, hətta bir neçə yerlərdə villanı xatırladan evlərinin tikintisi də başladı və sona çatdı. Bir sözlə, baş həkimin bəxti sonradan gətirdi. Atalar belə yerdə yaxşı deyib ki: “Əvvəlin gəlincə axırın gəlsin”.

Demirik ki, baş həkimin evi-eşiyi olmasın, olsun. İndiki zamanda Arzu Novruzovun Bakı şəhərində bahalı evlər almasına, xarici ölkədə ev almaq iddiasına düşməsinə, nə ad qoymaq haqda düşünmək istərdik...

Mərkəzi xəstəxananın kağız üzərində qalmış maliyyə işləri, hər vaxt cinayətin izini göstərir. Açıqca hiss olunur ki, Qazax səhiyyəsi Arzu Novruzovun şəxsi biznesidir. Bina olmadığından səhiyyə işçiləri evlərində oturub milyonların haraya sovrulmasını görəndə, maliyyə böhranına sürükləndiyimiz hiss olunur.

Qazax səhiyyəsi yanğından sovuşub?

Qazax rayon Mərkəzi Uşaq Xəstəxanası, doğum evi, kənd həkim məntəqələri uzun illərdir ki, öz görkəmindədir. İnsafən, həkim və tibb işçilərinin şəxsi vəsaitləri hesabına sadəcə olaraq bir neçə otaq rənglənib. Eşidəndə ki, bu ilin yanvar ayında 7600 manatlıq elektrik avadanlığı alınıb, düşündüm ki, yəqin səhiyyədə qısa qapanma baş vrib. Odur ki, araşdırmam düşündüyümün əksinə oldu. Kənd həkim məntəqələrində, uşaq xəstəxanasında, doğum evində bu günlərdə hər hansı elektrik avadanlıqlarının dəyişdirilməsini bilən və görən olmamışdı.

Kağız üzərindəki anbar dağılır.

Dağılır deyəndə hər ay 4-5 min manatlıq təsərrüfat malları alınır, 5000 manatlıq dəftərxana ləvazimatları götürülsə, demək anbardakı mallar aynadan, qapıdan çölə çıxar. Əgər hər ay 4-5 minlik təsərrüfat malları götürülsə, bəs onda xəstəxanaların, həkim məntəqələrinin həyət-bacaları niyə zibilliyin içərisindədir? Nəyə gözə dəyən süpürgə, bel, xətəngaz köhnə illərin avadanlıqlarını xatırladır? Əl yuyulan yerlərdə, niyə əl sabunu və ya şampun gözə dəymir?

Dogurdan da, hər ay 5000 manatlıq dəftərxana ləvazimatı götürülürsə, bəs niyə həkimlər resept yazanda qələm axtarışında olurlar? Tibb bacıları adicə yapışdırıcı üçün mağazaya getməli olurlar.

İki ayda 10 000 manatlıq yanacaq götürülüb. Hansı avtomobillə görüldüyünü, haraya boşaldığını öyrənmək istədik. Mənə güldülər. Məlum oldu ki, yanacaq çəni olmadığından, yanacağa pul baş həkim tərəfindən götürülüb. Belə çıxmırmı ki, kağız üzərindəki anbar dağılır...

Yanvar ayında 65 000 manatlıq dərman preparatları götürülüb. Əgər müalicə üçün palatalar yoxdursa, bu dərmanlar kimlərə istifadə olunub? Maraqlı deyilmi?

Mətbəx yoxdursa, hər ay 15-17 000 manatlıq ərzaq götürülürsə, 2-3 min manatlıq çörək alınırsa təsdiq edilir ki, baş həkim Arzu Novruzov “qaz vurub, qazan doldurur”. Mənbə onu da bildirir ki, ərzaq “Göyəzən ES” MMC – dən alınır. Hansı ki, həmin MMC-nin təkcə möhür və ştampı var. O da hər an direktorun cibində olur. Mohürə yalnız ayda bir dəfə hava dəyir.
Haşiyə: Ərzaq cədvəlinə nəzər yetirəndə məlum olur ki, həmin cədvəl 1992-93-cü illərdən təsdiq edilib. Mahiyyəti barədə düşünülməyib. Cədvələ nə qədər göz gəzdirsəm də, tamat və digər ərzaq məhsullarının adına təsadüf etmədim. Belə çıxır ki, kağız üzərindəki əməliyyatlar xəstələrə deyil, yalnız baş həkimə sərf edir.

Müdir müavini başının “milçəyini” qoruyur.

İxtisasca uroloq, sonradan 6 ay kurs keçməklə travmatoloq kimi yetişən Qazax səhiyyəsinin müdir müavini Allahverdi Quliyev də, başqa “sim üstündə köklənib”. İşə bir baxın ki, o da Arzu Novruzovdan bərk narazılıq edir: “mənə vəzifə versə də səlahiyyət verməyib, səhiyyənin xeyiri də onundur, şəri də.. Mən heç nəyə qarışmıram”.

Qəribə məntiqdir. Belə çıxır ki, bu adam “postu zanit” edib. Sonradan məlum olur ki, Allahverdi Quliyev sakit yeməyə alışıb. “Az aşım, ağrımaz başım!” Sən demə, kişinin “qara paketi” varmış.
Rayonun Kosalar kəndində diş həkiminin adı olsa da, özü yoxdur.

Mövzuya qayıdacağıq.

Vəkil Rüstəm