YAP üzvünün sənədlərini maraqlı «üsul»la ləğv ediblər; Sakinlər Mehriban Əliyevadan «Bizi bu bəladan qurtarın»,- deyə, kömək istəyir

Gədəbəyin icra başçısı Ramiz Yediyarovun rayonda yaratdığı saysız-hesabsız problemlər, ölkə mətbuatında silsilə şəkilində işıqlandırılsa da, hələ də hakim dairələr sözügedən icra başçısına «dur» demirlər. Doğrudur, ölkə başçısının son müşavirədə çıxışından sonra bir sıra məmurlar kimi, bacarıqsız, səriştəsiz və ən əsası rayonda gərginlik yaradan Ramiz Yediyarovun da karyerasına son veriləcəyi aktuallaşıb.

Bu barədə «Gündəm Xəbər»ə verilən məlumata görə, icra başçısı təyinatından ötən üç il ərzində, özünün ağlasığmayan və gülüş doğuracaq əməlləri ilə, Gədəbəy əhalisini təngə gətirən məmur özbaşınalıqlarının dərəcəsini yüksəldir:
«İndisə rayonda daha bir təzadlı vəziyyət yaranıb. Bir aydan artıqdır ki, gədəbəylilər icra başçının üzünə həsrətdirlər. O, səlahiyyətlərini demək olar ki, icra etmir. Bizdə təəssürat yaranır ki, icra başçısının işə gəlməməyi, onun vəziyyətinin heç də yaxşı olmamağından xəbər verir. Əgər bu məmur öz səlahiyyətlərini icra edə bilsəydi, birinci növbədə Gədəbəy şəhər əhalisinin üzləşdiyi ən böyük problemlərdən olan su problemi həll olunardı. Ancaq Ramiz Yediyarov şəhər əhalisinin su problemini həll etmək əvəzinə, su hövzəsinin yerləşdiyi ərazini qeyri-qanuni olaraq şəhər meri Şahbaz Bayramova hədiyyə edib. Şahbaz Bayramov da həmin ərazinin üzərində özünə yaxşı mülk tikdirib. Görəsən, belə qanunsuz əməlləri törədəndə, bu məmurlar fikirləşmirlər ki, qanunları kobudcasına pozurlar? Görən düşünmürlər ki, etdikləri qanun pozuntularına görə mütləq cəzalarını alacaqlar?
Yəqin ki, düşünmürlər. Əgər düşünsəydilər, şəhər merinin düşüncəsiz addımlarının qarşısı dərhal alınar və müvafiq tədbirlər görülərdi».

Sakinlər deyirlər ki, Sovet İttifaqı qəhrəmanı Mehdi Quliyevin adını daşıyan böyük bir küçənin yolu da, şəhər meri Şahbaz Bayramovun təklifi ilə Ramiz Yediyarov tərəfindən bağlanıb: «Böyük bir massivin əhalisi bu gün də, həmin yolun bağlanmasından çox əziyyət çəkir. Aidiyyatı qurumlara müraciət edilsə də, heç bir müsbət cavab alınmayıb. Onsuz da böyük problemlər içərisində olan şəhər əhalisinin yolunun və suyunun kəsilməsi, əhalini daha dözülməz hala gətirir. Məmurlar isə öz alış-verişlərində davam edir».

Məlumatda o da bildirilir ki, Ramiz Yediyarov tərəfindən mülkləri dağıdılmış vətəndaşlar, bu günə qədər öz hüquqlarını bərpa edə bilməyiblər: «Onlara ayrılan yeni ərazi isə, prezidentin verdiyi müvafiq sərəncama görə qeyri-qanunidir. Bəs görəsən, sahibkarlara dəymiş ziyan nə vaxt və kimlər tərəfindən ödəniləcək?
Bununla bağlı çoxsaylı şikayət ərizələrinə baxanda, hər kəs də elə təəssürat yaranır ki, sankı bu məmur qəsdən, bilə-bilə xalqla prezident arasında dərin uçurum yaradır. Prezidentin yeritdiyi uğurlu və uzaqgörən siyasətə, sankı gölgə salmaq istəyir».

Yeri gəlmişkən, icra başçısı Ramiz Yediyarovun özbaşınalıqlarından Gədəbəy şəhər sakini, Yeni Azərbaycan Partiyasının üzvü Əliyeva Aybəniz Ramazan qızı da şikayətçidir. Onun Heydər Əliyev Fondunun prezidenti Mehriban Əliyevaya ürək ağrıdacaq məktubunda, icra başçısının ilginc qanunsuzluğundan söhbət açılır:

«Çox hörmətli Mehriban xanım! Mən bu müraciəti demək olar ki, bütün dövlət orqanlarına yazmışam. Amma Sizə yazdığım məktubu çox böyük ümidlərlə yazıram və sizdən kömək gözləyirəm.
Əzizim Mehriban xanım, mənim 65 yaşım var. 43 il şagirdlərin təlim-tərbiyəsi ilə məşğul olmuşam. 19 ildir Yeni Azərbaycan Partiyasının 80 nəfərlik üzvünə rəhbərlik edirəm. Həyat yoldaşım Səfərov Vaqif Qara oğlunun 75 yaşı var. 8 nəfər ailə üzvümüz var. Biri tələbə, biri əsgər, ikisi isə körpədir. Tək bir nəfər işləyənimiz var. Onun aldığı əmək haqqı 180 manatdır. Dolanışıq səviyyəmiz çox aşağı səviyyədədir. Ümid yerimiz həyat yoldaşım Səfərov Vaqif Qara oğlunun adına verilmiş 26 sot torpaq sahəsi idi. Həmin torpaq sahəsində tikdirdiyimiz tikintidən aldığımız pul hesabına dolanırıq. 2013-cü ilin oktyabırında heç bir əsas olmadan, həmin torpaq sahəsini bizdən aldılar və içərisində tikdirdiyimiz tikilini də sökdürdülər. Bizə heç bir köməklik etmədən, heç bir kompensasiya ödəmədən orada tikinti tikdirməyə başladılar. Düz bir ildir ki, mən bütün dövlət orqanlarına bu barədə yazıram. Lakin heç bir cavab ala bilmirəm. Nəhayət 11 aydan sonra bizə yazdılar ki, torpaq sahəmizlə bağlı qərar ləğv olunub. Əsasda qoydular ki, torpaq sahəsinin sənədləri və tikili yüksəkgərginlikli elektrik xətlərinin altında yerləşdiyinə görə ləğv olunub. Əgər həqiqətən də həmin torpaq sahəsi qeyd olunan problemə görə ləğv olunubsa, bəs indi həmin gərginliyin altında böyük bir ticarət mərkəzinin tikilməsinə necə izacə verilir? Demək, bizim rayonda hər bir işə icazə ancaq pulla verilir. Qanunlar tərəzinin bir tərəfində, pul isə digər tərəfindədir, pul da qanundan ağır gəlir.

Digər tərəfdən, əgər bizə verilən torpaq sahəsi 2002-ci ildə ləğv olunmuşdusa, biz 2004-cü ildə həmin torpaq sahəsinə 2,564,000 manat (iki milyon beş yüz altmış dörd min manat) pulu dövlətin hesabına necə keçırə bilərdik? Həmin torpaq sahəsində 2008-ci ildə tikinti apararkən, bəs bizə nə üçün icazə verilirdi? Çox uzun-uzadı yaza bilmirəm.
Sizdən artıq dərəcədə xahiş edirəm ki, bizim rayonda olan bu qanunsuzluqlara bir «dur!» dedirdəsiniz. Bizi bu çətinlikdən qurtarasınız. 8 nəfərlik ailə üzvümüz Sizin bu işə müdaxilə edib, tapdalanan hüquqlarımızın bərpa olunacağını səbirsizliklə gözləyirik. Bizim rayonda son üç ildə qanunsuzluq, rüşvətxorluq baş alıb gedir. Son ümidimiz Sizədir. Bizim rayonu bu bəladan xilas edin».

Cəfər