Kamil Sədrəddinovun Avropa Məhkəməsinə ünvanladığı şikayətə hələ də baxılmayıb

Sifarişli qətlə törətməkdə, adam oğurluğu və digər ağır cinayətlərdə ittiham olunaraq ömürlük azadlıqdan məhrum olan, Daxili İşlər Nazirliyinin Baş Cinayət Axtarış İdarəsinin keçmiş şöbə rəisi Kamil Sədrəddinov günahsız olmasını sübut etməyə çalışır. O, cəzasını Qobustan Həbsxanasında çəkir.

Kamil Sədrəddinovun vəkili Oqtay Gərəkməzli bildirib ki, Kamil Sədrəddinov Ağır Cinayətlər Məhkəməsinin hökmü ilə ömürlük azadlıqdan məhrum edilib: “Məhkəmənin hökmü qanuni qüvvəsinə minib və onun cəzasının yüngülləşdirilməsi üçün, məhkəmələrə müraciət etməsinə qanun yol vermir. Bu cinayət işi bir qədər qəlizdir və siyasi maraqlara xidmət edir. Bu səbəbdən də, müdafiə hüququnun bərpa edilməsindən söhbət gedə bilməz. Amma Kamil Sədrəddinov günahsızdır və onun Hacı Məmmədovun törətdiyi cinayətlərdən xəbəri olmayıb. Həmçinin Kamil Sədrəddinovun müdafiə hüququ da pozulub. Bununla bağlı Kamil Sədrəddinov müvafiq qurumlara müraciət etsə də, hələ ki, bir nəticəsi yoxdur”.

Vəkilin sözlərinə görə, Kamil Sədrəddinov Hacı Məmmədovun rəisi olsa da, cinayətlərindən xəbərsiz olub: “Hacı Məmmədovun pulu çox olub və Kamil Sədrəddinova da “hörmət” edib. Kamil Sədrəddinov da həmin “hörmət”in müqabilində, Hacı Məmmədovun işə gəlməməsinə göz yumub. Hacı Məmmədov işdə olmadığı müddətdə ağır cinayətləri törədib. Ən azından Kamil Sədrəddinova ağır cinayəti bilib gizlətmək ittihamı verilməli idi. Çünki, Hacı Məmmədovun əməllərindən Kamil Sədrəddinov xəbərsiz olub. Yalnız onun işdə olmamasını, tez-tez işə gəlməməsini bilib və bununla bağlı da tədbir görməyib”.

Oqtay Gərəkməzli daha sonra qeyd edib ki, Kamil Sədrəddinov barəsində bəraət hökmünün çıxarılması ilə bağlı şikayət etsə də, Azərbaycan məhkəmələrində müsbət nəticə əldə edilməyib. Onun sözlərinə görə, Ağır Cinayətlər Məhkəməsinin Kamil Sədrəddinovla bağlı hökmün hissəsindən, Avropa İnsan Haqları Məhkəməsinə müraciət edib. Vəkil qeyd edib ki, müvafiq məhkəmədən də hələ bir nəticə əldə edilməyib: “Avropa Məhkəməsində hələ də işə baxılması mümkün olmayıb. Şikayətimizlə bağlı məhkəmədən cavab gözləyirik və Kamil Sədrəddinov həmin məhkəməyə ümidini bağlayıb”.

Vəkil onu da bildirib ki, Ağır Cinayətlər Məhkəməsinin hökmündə Oqtay Gərəkməzlinin əmlakının müsadirə edilməsi ilə bağlı qərar olmayıb. Onun sözlərinə görə, Kamil Sədrəddinovun adına olan əmlaklar müsadirə edilməyib.

Vəkil hazırda Qobsutan Həbsxanasında cəza çəkən Kamil Sədrəddinovun səhhətində hər hansı bir problem olmadığını deyib: “Hərə ümidini bir şeyə bağlayır. Eyni zamanda Kamil Sədrəddinov da, azadlığa çıxmaq arzusu ilə yaşayır. Onun səhhətində problem yoxdur, idmanla məşğuldur”.

Qeyd edək ki, Kamil Sədrəddinov Daxili işlər Nazirliyi Baş Cinayət Axtarış İdarəsinin keçmiş baş əməliyyat müvəkkili Hacı Məmmədov və onun başçılıq etdiyi 25 nəfərdən ibarət dəstənin üzvü olub.