Bir-birlərini döyən əsgərlərə şərti cəza təyin edilib

Gəncə Hərbi Məhkəməsinin Hərbi Kollegiyasında hərbi hissədə əsgərlərə işgəncə verməkdə ittiham olunan Müdafiə Nazirliyinin “N” saylı Hərbi Hissəsinin hərbi əsgərləri Elşən Əliyev və Seymur Cabbarovun cinayət işi üzrə məhkəmə prosesi başa çatıb.

İttihama görə, Elşən Əliyev 8 avqust 2014-cü il tarixdə saat 21.00-da axşam yoxlanışı zamanı sıranın arxasında dayanarkən soyuqladığı üçün burnu sulanıb. O dəsmalla burnunu silməyib. Bu səbəbdən də o, burnunu çəkməyə başlayıb. Bu zaman digər əsgər Seymur Cabbarov Elşən Əliyevi itələyərək aralı durmasını tələb edib.

Lakin Elşən Əliyev kənara çəkilməyərək yenidən burnunu çəkib. Buna görə də onların arasında mübahisə yaranıb. Mübahisə zamanı Seymur Cabbarov onun ağız nahiyəsinə əlinin arxası ilə bir zərbə vurub. Elşən Əliyev də əsəbiləşərək hərbi qulluqçular arasında qarşılıqlı münasibətlərin nizamnamə qaydalarını pozaraq Seymur Cabbarovun gözünün altında yumruq zərbəsi vurub.

Hər iki təqsirləndirilən şəxsə Cinayət Məcəlləsinin 332.1-ci (tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma, zərərçəkmiş şəxsin şərəf və ləyaqətini alçaltmaqla və ya ona qarşı zor tətbiq etmək) maddəsi ilə ittiham edilib. Məhkəmənin hökmü ilə təqsirləndirilən şəxslərin hər birinə intizam xarakterli hərbi hissədə saxlanılması cəzası təyin edilib.

Təqsirləndirilən şəxslər məhkəmənin hökmündən apelyasiya şikayəti verərək, cəzalarının yüngülləşdirilməsini xahiş ediblər. Onlar barələrində Cinayət Məcəlləsinin 70-ci (şərti məhkum etmə) maddəsinin tətbiq edilməsini istəyiblər. Onların şikayətləri Gəncə Apelyasiya Məhkəməsinə göndərilib.

Hakim Teyyub Muxtarovun sədrliyi ilə keçirilən prosesdə çıxış edən Elşən Əliyevin vəkili Nadim Heydərov bildirib ki, hadisə baş verərkən cəmi səkkiz günün əsgəri olan Elşən Əliyev həm ibtidai, həm də məhkəmə istintaqı zamanı törətdiyi cinayət əməli ilə bağlı özünü təqsirli bilib, əməlindən səmimi peşman olub: “Müdafiə etdiyim şəxs əsgər Seymur Cabbarova qarşı zor tətbiq etməsinə səbəb sıra düzülüşündə nasazlıq üzündən burnunu çəkdiyinə görə olub. Elşən əsgər yoldaşını itələyərək kənarda durmasını tələb edib. Həmçinin Elşən Əliyev xidmət yeri üzrə müsbət xarakterizə olunub və hadisədən sonra əsgər Seymur Cabbarovla razılıq əldə edərək barışıb. Məhkəmə Elşən Əliyevə cəza təyin edərkən onun ilk dəfə məhkum olunmasını, əməlindən səmimi peşman olmasını, hadisədən sonra bir-birindən üzr istəyərək barışmalarını, bir-birinə qarşı heç şikayət və tələblərinin olmamasını, eləcə də cinayəti gənc əsgər olarkən torətməsini, xidmət müddətində müsbət xasiyyətləndirilməsini

cəzanı yüngülləşdirən hal kimi qiymətləndirməyib. Ağırlaşdıran halların isə müəyyən edilmədiyini hökmdə qeyd edilsə də, cəza təyini zamanı onları kifayət qədər nəzərə alınmayıb. Müdafiə tərəfi hesab edir ki, məhkəmə böyük ictimai təhlükə törətməyən

cinayət əməli işlətmiş Elşən Əliyevə ittiham olunduğu Cinayət Məcəlləsinin 332.1-ci maddəsinin sanksiyası daxilində cəza təyin etsə də, onun cinayət hadisəsindən sonrakı davranışını kifayət qədər nəzərə almayıb”.

Digər təqsirləndirilən şəxs Seymur Cabbarovun vəkili Sarı Süleymanov bildirib ki, müdafiə etdiyi əsgər hadisədən sonra Elşən Əliyevdən üzr istəyib və onlar barışıblar: “Seymur Cabbarov hazırda əməlindən peşmandır və məhkəmədən bağışlanmasını xahiş edib. İş materiallarından görünür ki, Seymur Cabbarov gəncdir, böyük ictimai təhlükə törətməyən cinayət əməli törətməyib və ilk dəfə olaraq cinayət məsuliyyətinə cəlb olunub. Onun atası və anası heç bir yerdə işləmir, ailəsi 8 nəfərdən ibarətdir. Seymur Cabbarovun ailə vəziyyətləri olduqca ağırdır, törətdiyi cinayət əməlini etiraf edib və əməlinə görə səmimi peşman olub. O, cinayəti gənc əsgər olarkən törədib. Seymur Cabbarov xidməti yerindən müsbət xarakterizə olunub. Hadisədən sonra Seymur Cabbarov Elşən Əliyevdən üzr istəyib. Onun şikayəti yoxdur”.

Hər iki təqsirləndirilən şəxs apelyasiya şikayətlərini müdafiə edəndən sonra hökm elan edilib. Məhkəmə onların barəsində Cinayət Məcəlləsinin 70-ci maddəsini tətbiq edib və cəzalarını şərti hesab edib. Onlar məhkəmə zalından azadlığa buraxılıb.