Yeni nazirin dövründə məktəblərdə şagirdlərin müəllimlər tərəfindən döyülməsi və işgəncəyə məruz qalması halları artıb, Hövsanda qovulan direktor həbs edilə bilər; şok statistika “Gündəm xəbər”də

Mikayıl Cabbarovun təhsil naziri təyinatından sonra işgəncə tendensiyası müşahidə olunmaqdadır. Misir Mərdanovun dönəmində də məktəblərdə şagirdlərin döyülməsi halları var idisə, indiki qədər ictimailəşmirdi, şikayətlər olmurdu. Ancaq M.Cabbarovun dövründə bu neqativ hallar çoxalmaqdadır.

Hər halda müşahidələr və faktlar belə deməyə əsas verir. Görünən budur ki, təhsil naziri prosesin qarşısını ala bilmir. Sadəcə, həmin məktəb direktorunu cəzalandırmaqla iş bitir. Halbuki, müəllimlərə və direktorlara əmr verilə bilər. Təhsil naziri isə qeyri-rəsmi xəbərdarlıq etsə də, nəticə yoxdur.

“Gündəm xəbər”in hazırladığı statistika tükürpədici faktlarla əhatə olunub. Belə ki, orta məktəblərdə şagirdlərin təhqir və işgəncə ilə üzləşməsi normaya çevrilməkdədir. Dünənə qədər müəllimlərin şagirdləri döyməsi, saçını qoparması, təhqir etməsi faktları olurdusa, ictimailəşmirdi. Son aylar isə bu cür neqativ hallar mətbuata sızmaqdadır. Növbəti belə bir fakt Cəlilabadda qeydə alınıb.

Rayonun 7 nömrəli orta məktəbində 6-cı sinif şagirdi 2-ci mərtəbədən aşağı düşüb. Ziya adlı sinif rəhbəri 12 yaşlı Əminə Əsədovanı təhqir edib. Qızın təhqir edilməsinə səbəb isə məktəbin dəhlizində bir oğlanın ondan siniflərinin yerini soruşması olub. Bunu görən sinif rəhbəri isə qızı təhdid edərək bildirib ki, sənin atana məktəbdə oğlanla söhbət etdiyini deyəcəyəm.

Ə.Əsədova isə deyib ki, o, sadəcə dərsin hansı otaqda keçiriləcəyini soruşub. Lakin müəllim qızı təhqir etməyə davam edib. 12 yaşlı qız isə pəncərəyə söykənərək ağlamağa başlayıb. Ziya müəllim qəfildən qızın üstünə qışqıraraq yerində oturmağı tələb edib.

Səsdən diksinən Ə.Əsədova pəncərədən aşağı düşüb. Qızı dərhal xəstəxanaya yerləşdiriblər. Ə.Əsədova 4 saata yaxın komada qalıb və

onu təcili Bakıya göndəriblər. Qızın ayaqları, qolları, çənəsi sınıb, başından travma alıb. Hadisə ilə bağlı məktəb direktoru heç bir açıqlama verməyib.

Cəlilabadda baş verən bu hadisənin xəbəri yayılan tarixdə isə Bakı şəhəri üzrə Təhsil İdarəsi Hövsandakı 118 nömrəli orta məktəbin direktorunu işindən azad etdi. Məlumata görə, məktəbin tarix müəllimi uzun müddət dərsə gəlməyib.

Məktəbin IX sinif şagirdi direktordan müəllimin dərsə gəlməməsinin səbəbini soruşub və onun başqa müəllimlə əvəz olunmasını istəyib. Məktəb direktorunun şagirdə cavabı isə belə olub: “Sənin atan evdən gedəndə yerində əvəzedici qoyur?”.

Direktorun cavabı valideynləri hiddətləndirib. Və nəticədə etiraz aksiyası keçirilib. Aksiya zamanı Əliyev Elmar Rəcəbəli oğlu ad-soyadlı Hövsan sakininin halının pisləşdiyindən o, dünyasını dəyişib. Məktəbin direktoru Qardaşxan Səlimov Təhsil Nazirliyi tərəfindən vəzifəsinin icrasından kənarlaşdırılıb.

Hövsandakı 118 saylı orta məktəbin qalmaqallı direktoru artıq həbs edilə bilər. Bu barədə məlumatı “Gündəm xəbər”ə verən kənd sakinləri deyib. Onların sözlərinə görə, bir gəncin ölümünə səbəb olan Qardaşxan Səlimovun işi araşdırılır və vaxtaşırı polis bölməsinə çağırılır. Araşdırma sonucunda isə direktor həbs olunacağı istisna deyil.

Onun şəhərdən kənara çıxması da istintaqla qadağan olunub. Xatırladaq ki, ötən ayın 19-da Q.Səlimov şagirdləri təhqir edib. Bundan sonra sakinlər etiraz aksiyası keçirərək onun işdən çıxarılmasını tələb ediblər.

Aksiya keçirilərkən Q.Səlimov öz şəxsi avtomobilində oraya gəldi. Adamlar maşının üzərinə hücum çəkiblər. Bu vaxt maşının qarşısında 21 yaşlı Hövsan sakini, yenicə ailə həyatı qurmuş Elmar Əliyev yerə yıxılıb. Daha sonra onun ürəktutmasından vəfat etdiyi aydınlaşıb. Yasamalın 53 saylı məktəbində isə müəllimənin birinci sinif şagirdinin saçını dibindən qopartması ciddi rezonans doğurmuşdu.

Belə ki, ibtidai sinif müəlliməsi Zülfiyyə Hacıyeva birinci sinifdə oxuyan balaca məktəbli qıza qarşı zorakılıq və vəhşilik edərək, yazısını düzgün yaza bilmədiyi üçün onun saçını dibindən qoparmışdı. Təhsil

Nazirliyindən 53 saylı məktəbə komissiya gəlib və bu da ciddi həyəcana səbəb olmuşdu.

Fevralın 14-da Sabunçu rayonundakı 90 saylı orta məktəbin 7-ci sinfində təhsil alan Orxan Həsənovun bədən tərbiyəsi müəllimi Emil Cəbrayılov tərəfindən döyülməsi ölkənin təhsil ocaqlarında şagirdlərə qarşı törədilən zorakılıq hallarının son həddi sayılırdı. Qeyd edək ki, müəllim Emil Cəbrayılov məktəbdən uzaqlaşdırılıb. Görünür ki, bu xoşagəlməz hallar səngiməyib.