Deputatın uzunmüddətli susmasının müdhiş sirri...

Nurçu qalmaqalına görə Ceyhun Osmanlı nəinki növbəti mandat şansını itirib, onun çıxışları da yasaqlanıb, siyasi səhnədən silinib, indiki mandatından da qeyri-rəsmi məhrum olunub

Azərbaycanda nurçu əməliyyatlarının məntiqi sonluğu bir deputatın müqəddəratını həll etdi. Artıq nurçu qalmaqalı başa çatsa da, deputat Ceyhun Osmanlı susdurulub. Onun rəsmi çıxışlarına belə rast gəlinmir. Uzun müddətdir ki, Sabirabaddan deputat olan gəncin tədbirlərdə, rəsmi toplantılarda fəallığını görmək olmur.

C.Osmanlıya qeyri-rəsmi yasağın sirri də məhz adını qara dəftərə yazdırması olub. Onunla birlikdə Elnur Aslanov və Elşad İsgəndərov vəzifəsini itirdi, deputat isə mandatdan məhrum oldu. Faktiki indiki deputatlığı də qeyri-rəsmi əlindən alınıb. Milli Məclisin iclaslarında da C.Osmanlının çıxışları yoxdur. Belə görünür ki, onun siyasi səhnədən birdəfəlik silinməsinə qərar verilib. Əks halda heç bir deputat bu dərəcədə susdurulmazdı. Hakim komanda onu öz siyahısından çıxarıb və indi iqtidara lazım olmayan kadra çevrilib.

Eyni zamanda ölkə rəhbərliyinin də gözündən düşdüyü və Fətullah Gülənin adamı kimi reputasiyasının zədələndiyi iddia olunur. Bu

mənada C.Osmanlı ilə bütün körpülər yandırılıb. Gənc deputatlar arasında perspektivi olanlardan yeniləri növbəti seçkilərə mandat ala bilər.

Nurçu siyahısında onun olması növbəti mandat şansını əldən verməklə yanaşı seçkilərə qədər danışmamaq qadağasını da şərtləndirib. Özəl qaynaqdan “Gündəm xəbər”ə verilən xəbərə görə, Ceyhun Osmanlı “İrəli” İctimai Birliyindən də tamamilə uzaqlaşıb. “İrəli”nin yeni sədri Mirhəsən Seyidovdan sonra təşkilat fəaliyyətində bəzi dəyişikliklər edib.

Gənclər təşkilatı əvvəlki qədər fəallıq nümayiş etdirmir, səs-küylü toplantılar təşkil etmir, C.Osmanlı ilə də yollarını açıq-aşkar ayırıb. Hətta gənc deputat “İrəli”nin tədbirlərinə dəvət olunmur. Deputatın adının bir müddət əvvəl “Xidmət hərəkatı”nda hallanması, nurçu qalmaqalı ərəfəsində bir sıra hadisələrdə rolunun olması haqda səslənən fikirlər onun öz hücrəsinə çəkilməsi ilə nəticələnib.

C.Osmanlı da “İrəli” ilə uzaqdan maraqlanmağa üstünlük verir. Məlumatlarda deyilir ki, "İrəli" C.Osmanlınn həmkarına həvalə olunub. Xatırladaq ki, onun təşkilatla əlaqələrinin kəsilməsi məhz nurçu qalmaqalından sonra baş verib. C.Osmanlı adı Fətullah Gülənə bağlı dini-siyasi cərəyanın Azərbaycanda aparıcı şəxslərindən biri olaraq hallanır.

Xatırladaq ki, tanınmış jurnalist Xədicə İsmayılın Prokurorluğun Ağır Cinayətlərə dair işlər üzrə İstintaq İdarəsinə çağırılması, dövlət sirrini yaymaqda ittiham edilməsi bu deputatın daha bir “qabiliyyət”ini üzə çıxarmışdı.

Sən demə, millət vəkili həm də Ceyms Bond rolunda fəaliyyət göstərirmiş. Deputat Ceyhun Osmanlı Xədicə İsmayılın Art Garden restoranındakı görüşünün audio yazısı olan şəxsi telefonunu prokurorluq orqanlarına təqdim etmişdi.

Qeyd edək ki, buna qədər də Ceyhun Osmanlının bir çox yanlışları olmuşdu və bu səbəbdən də gənc deputatın növbəti 5 illik üçün mandat almayacağı qətiləşmişdi. İndi isə bu qərar daha da möhkəmlənmiş olur. Ceyhun Osmanlı 30 yanvar 1982–ci ildə Bakı şəhərində anadan olub. 1993-cü ildən Bakı Özəl Türk liseyində təhsilini davam etdirib. 1999–cu ildə Bakı Dövlət Universitetinə daxil olub. 2007-ci ildə Varşava Universiteti və Polşa Təhlükəsizlik Akademiyası tərəfindən təşkil edilən "SENSE" Proqramının, 2008–ci ildə Harvard Universitetinin "Liderlər İnkişafda Proqramı"nın iştirakçısıdır. Hərbi xidmətdə olmamışdır. Ailəlidir, 3 övladı var.

Səhifəni hazırladı: Rafiq Qara