Partiyalar arasındakı fikir ayrılığı dərinləşib, qarşıdakı görüşdə formatın dəyişəcəyi gözlənilmir

Prezident köməkçisi Əli Həsənovla bir sıra müxalifət qüvvələrinin görüşü ilə bağlı siyasi dairələrdə yenidən müzakirələr başlayıb. Görüşdə iştirak edənlərlə imtina edənlər arasında qarşıdakı müzakirələrlə bağlı ciddi fikir ayrılıqları da yaranıb.

Bu və ya digər məqamlarla bağlı «Gündəm Xəbər»i məlumatlandıran mənbə deyir ki, iqtidar növbəti görüşlərə AXCP və Müsavat Partiyasının da qatılmasına nail olmaq istəyir. Və bu halda dialoqla bağlı bəzi beynəlxalq qurumların mənfi yönlü fikirlərinin əngəllənəcəyi düşünülür. Lakin görünən odur ki, dialoqda iştirak edən partiyalarla iştirak etməyənlər arasında da ziddiyyətlər həddən artıq dərindir.

Məsələn, strateq.az-a açıqlama verən ADP sədrinin müavini Taliyət Əliyev deyib ki, dialoq ölkədəki ictimai-siyasi proseslərin inkişafı üçün zəruri prosesdir. Onun sözlərinə görə, bütün siyasi qüvvələrin bu prosesə qoşulması müsbət nəticə verə bilər:

«Bildiyiniz kimi, uzun müddətdir ki, iqtidar-müxalifət dialoqunun vacibliyi barədə çoxlu mövqelər olub. ADP olaraq biz hələ 2007-ci ildə iqtidarla müxalifət arasında siyasi dialoqun vacibliyi barədə mövqe ortaya qoymuşduq və bununla bağlı partiya

olaraq siyasi dialoqa hazır olduğumuzu bildirmişdik, eyni zamanda hakimiyyətə rəsmi qaydada müraciət yollamışdıq. O zaman bizim bu mövqeyimiz cəmiyyət və hətta müttəfiqlərimiz tərəfindən birmənalı qarşılanmadı. Hətta bizi satqınçılıqda da ittiham edirdilər. Zaman keçdi, dünən siyasi dialoqa görə bizi satqınçılıqda ittiham edənlər, bu gün dialoqun vacibliyi barədə danışmağa başladılar. Görünən odur ki, biz zamanında doğru mövqedə olmuşuq. İndi artıq iqtidarla müxalifətin böyük əksəriyyəti arasında iki dəfə təmas baş tutub. Bu təmaslarda iştirak edən liderlərin əksəriyyətinin verdiyi açıqlamalardan da sezilir ki, onlar bu təmaslardan məmnundurlar və cəmiyyət üçün bunu vacib hesab edirlər. Lakin, AXCP və Müsavat Partiyası bu prosesdə iştirak etmirlər və əlavə şərtlər irəli sürürlər. Hesab edirəm ki, dialoq üçün qabaqcadan hər hansı bir şərtin irəli sürülməsi başadüşülən deyil. Çünki, dialoq demokratik bir prosedurdur. Bunun əleyhinə olmaq və ya hər hansı bir formada bundan yayınmaq demokratiyanın əleyhinə olmaq anlamını verir.

Hesab edirəm ki, indiki situasiyada müxalifət bütün imkanlardan istifadə etməlidir. İqtidar-müxalifət münasibətlərinin düşmənçilik müstəvisində olması, nə müxalifətin, nə iqtidarın, nə də bütövlükdə xalqın xeyrinə deyil. İqtidar-müxalifət arasında siyasi dialoqun olması siyasi mədəniyyət nümunəsidir. Siyasi mədəniyyət olmayan cəmiyyətlərdə heç bir siyasi inkişafdan söhbət gedə bilməz. Bunun acı nəticəsidir ki, biz cəmiyyət olaraq siyasi inkişafdan geri qalırıq. Bunu sıravi vətəndaşlar anlamaya bilər, amma siyasi institutların bunu anlamaması faciəlidir».

ADP rəsmisindən fərqli olaraq isə AXCP sədrinin müavini Nurəddin Məmmədli fərqli düşünür. O, deyib ki, hər bir partiyanın öz xətti var, kim dialoqda iştirak etmək istəyirsə, gedib dialoqa apara bilər: «Əgər doğrudan da bu dialoqun arxasında hakimiyyət dayanıbsa, niyə hakimiyyət bir tərəfdə qalıb, bunlar özlərinə əl qatıblar. Təşəbbüs hakimiyyətdən gəlirsə, bunun narahatlığını da hakimiyyət yaşamalıdır. Hakimiyyət bizi dəvət eləsin, şərtlərini açıqlasın, biz də müzakirə edək və qərarımızı bildirək. Bizi dialoqda iştirak etmədiyimizə görə nədəsə ittiham edənlər gedib öz işləri ilə məşğul olsalar, yaxşıdır. Biz mübarizə xəttimizi özümüzü seçirik və bu hakimiyyətə rəqibik. Nə vaxt ki, hakimiyyət dialoq anlayışına demokratiyanın bütün dünyada inkişafı baxımından səmərəli olan rakursda yanaşsa, biz həmin dilaloqda olacağıq. Çalışacağıq ki, Azərbaycanın problemlərini meydanlarda yox, parlamentdə müzakirə masalarının arxasında həll edək. Biz heç vaxt konfliktə getməkdə maraqlı olmamışıq. Sadəcə olaraq, hakimiyyət bu dialoq adı ilə özünə demokratiklik donu geyindirmək, imitasiya vasitəsilə dünyanın qınağından xilas olmaq istəyir. Bizim də davamız bununla bağlıdır».

Müsavat Partiyasının başqan müavini Gülağa Aslanlı bizimlə söhbətində deyib ki, Müsavat Partiyası bu günə qədər həmin görüşdə iştirak etməməsinin səbəbləri barədə bəyanat verib və mövqeyini açıqlayıb. Onun sözlərinə görə, Müsavat Partiyası həmin görüşləri müxalifət-iqtidar dialoqu kimi qələmə verilməsini düzgün hesab etmir: «Əgər müzakirə olunan mövzu qabaqcadan məlum olacaqsa, iştirakçılar da Müsavat Partiyası ilə razılaşdırılacaqsa, Müsavat Partiyası həmin tədbirdə iştirak etmək haqqında qərar verə bilər. Hazırda dialoq məsələsi ilə partiyada hakim fikir bundan ibarətdir».

Göründüyü kimi, müxaliflər arasındakı ziddiyyətlər kifayət qədər təzadlıdır. Məhz buna görə də, qarşıdakı görüşdə iştirak edəcək partiyaların formatının dəyişəcəyinə inam çox azdır.

Cəfər