Sərhəd kəndi olan Köhnəqışlaqlılar toxumluq kartof tələb edir

“Gündəm Xəbər”-in elektron poçtuna ölkənin qərb-sərhəd bölgəsi, Ağstafa rayon Köhnəqışlaq kənd sakinləri tərəfindən çoxsaylı imzalarla məktub göndərib. Məktubda bildirilir ki, Köhnəqışlaqlılar 1992-ci ildən əzəli torpaqlarını çoxsaylı itkiləri hesabına yağı düşməndən öz gücləri hesabına, azad ediblər.

Ermənistanın Berd rayonu ilə həmsərhəd olan kənd sakinlərinin hər biri qəhrəmanlığa layiqdir. Vətən Köhnəqışlaqdan başlayır.

Xatırladaq ki, Köhnəqışlaqlılar qonşu kənd olan Tatlıdan öz kəndlərinə getmək üçün 7 km məsafəni düşmənə aid ərazidən keçməli olurdular. Şükürlər olsun ki, düşmən sıxışdırılaraq ərazidən çıxarılıb. Həmin ildən də ərazidə qalan üzüm və meyvə bağları susuzluqdan məhv olub. Hal-hazırda kənd əhalisi həmin torpaqdan səmərəli istifadə edə bilmir.

Gileyli soydaşlarımız problemləri həll olunmayacağı təqdirdə fəaliyyətsiz Kənd Təsərrüfatı Nazirliyinin ölkə başçısı tərəfindən ləğvini tələb edəcəklər. Kənd Təsərrüfatı Nazirliyi normal fəaliyyət göstərsəydi bazarlarda kartofun kiloqramı 1 manat olmazdı.

Köhnəqışlaqlılar Kənd Təsərrüfatı Naziri Heydər Əsədova ünvanladıqları müraciəti olduğu kimi dərc edirik.

“Hörmətli cənab nazir, əgər oturduğunuz kabinetdə Azərbaycan xəritəsi varsa baxın, görün Ağstafa rayon Köhnəqışlaq kəndi harada yerləşir? Biz quduz düşmənlə elə məsafədə yaşayırıq ki, bir-birimizi söyəndə hər iki tərəf eşidir. Sözümüzün canı odur ki, ötən il biz həmkəndlilər rəhbərlik etdiyiniz nazirliyə müraciət edərək toxumluq kartof istəmişdik.

Nazirliyin şöbə müdiri Seyfəddin Talıbovdan lokanik cavab aldıq. Seyfəddin müəllim cavab məktubunda bildirirdi ki, nazirliyin ehtiyyat fondunda cücərdiləsi toxum yoxdur (heç cücərməyəni də yoxdur). Təkrar məktubda bildirilirdi ki, xahişinizin mümkünsüz olduğunu nəzərə alaraq sizlərin (təkrar olaraq) Tovuz rayon kənd təsərrüfatı idarəsinə müraciət etməyinizi məsləhət bilirik. Tovuz regional Kənd Təsərrüfatı İdarəsinin rəisi Canpolad Qəhrəmanov bizə telefon vasitəsi ilə bildirdi ki, “biz özümüz toxumluq kartofu, öz şəxsi hesabımıza Gədəbəy rayonundan alırıq”. Deməli sərhəd kənd əhalisi problemləri ilə taleyin ümidinə buraxılıb.

Hörmətli Cənab Nazir, ölkə başçısı İlham Əliyevin toxum fondunun yaradılması haqqında sərəncamından sonra sözün həqiqi mənasında hərəkətə keçmisiniz. Aldığımız məlumata görə KTN Rusiyadan, Belarusiyadan dava gedən Ukraynadan külli miqdarda ölkəyə kartofçuluğun və taxılçılığın inkişafı üçün toxumluq gətirilmişdir. Təəccüblənsək də bu təqdirəlayiq fəaliyyətinizi alqışlayırıq.

Biz həmkəndlilər sizi vətənimizin bir parçası olan Qələmçə meşəsinin ətəyində yerləşən Köhnəqışlaq kəndinə dəvət edirik. Heç nədən çəkinməyin, təhlükəsizliyinizə təminat veririk. Gəlişiniz möcüzə olardı. Gəlib öz gözlərinizlə istifadəsiz torpaqlarımızı görərdiniz.

Xatırladaq ki, rayonun iri çaplı məmurları nə qədər israr etsək də qorxularından kəndə ayaq basmırlar.

Torpaqlarımız yiyəsizlikdən istifadəsiz qalıb. Zəhmət adamları dövlət qayğısına möhtacdır. Yəqin ki, kartofun bazat qiymətini bilməmiş deyilsiniz. KTN hərəkətə keçməsə bu il kartofun 1 kiloqramı ət qiymətinə olacaq.

130 təsərrüfatı olan Köhnəqışlaq kənd sakinlərinə, yağı düşməndən azad etdikləri 10.000 hektarlarla istifadəsiz torpaqlarda kartifçuluğun və taxılçılığın inkişafı üçün toxumluq ayırmanızı xahiş edirik.”

Şakir Həsənsu