Sabiq millət vəkilinin bu seçkilərdə iştirakına qadağa qoyulması haqda iddialar var; “Avropa qapıları” tərs üzünə açıla bilər

“Avropa qapıları”nın sahibi Baba Tağıyev bu seçkidə də mandatsız qala bilər. Sabiq millət vəkilinin növbəti parlament seçkilərində namizəd olacağı sual altındadır. Bu haqda etibarlı mənbənin “Gündəm xəbər”ə verdiyi məlumatda iddia olunur. Xəbərə görə, sabiq parlamentariyə seçkilərdə namizədliyini vermək yenə də yasaq edilib.

Buna səbəb isə Tağıyevlə onun bağlı olduğu dairənin yollarını ayırmasıdır. Onun tez-tez qalmaqallı açıqlamalar ilə gündəmə gəlməsi də yuxarı dairələrin xoşuna gəlməyib. Həmçinin, bir müddət öncə Ceyranbatan sakinlərinin sabiq deputatdan prezidentə şikayətlənməsi, biznesmenin sözügedən qəsəbədə qanunsuz torpaqlarda villa inşa etməsi yuxarı dairələrdə qəti fikir formalaşdırıb.

Ümumiyyətlə, B.Tağıyev xeyli müddətdir siyasi səhnədən silinib. Hər zaman gülərüz və maraqlı çıxışları ilə yadda qalan sabiq deputat nədənsə mətbuatda əvvəlki qədər görünmür. Bunu sirri təfərrüatı ilə bəlli olmasa da, komandadan uzaqlaşdırıldığı görünür.

Qeyd edək ki, az əvvəl Baba Tağıyevin başı böyük dərddə idi. Keçmiş millət vəkili və məşhur «Avropa qapıları» ASC-nin sahibi heç bir zaman rastlaşmadığı bir problemlə üzləşmişdi. Belə ki, «Avropa qapıları» iflas edirdi. Əslində edib də..

Qəzetimizə daxil olan məlumatda bildirilir ki, Baba Tağıyevin şirkəti Vergilər Nazirliyi tərəfindən möhürlənə və onun bütün əmlakı hərraca çıxarıla bilərdi. Məlumatda bildirilirdi ki, iş adamının dövlətə külli miqdarda vergi borcu yaranıb. Bildirilirdi ki, Milli Məclisin deputatı seçildikdən sonra Baba Tağıyevin «Avropa qapıları» ASC dövlətə bir qəpikdə vergi ödəməyib. Eyni vəziyyət Baba Tağıyev mandatını itirdikdən sonra davam edib. İş adamına bir neçə xəbərdarlıq edilsə də, o, xəbərdarlıqları göz ardına vurub. Mənbə bildirir ki, onun şirkətində Vergilər Nazirliyi total yoxlamalara başlayıb. Bu yoxlamaların nəticəsində isə «Avropa qapıları» ASC-nin bağlanması, ya da əl dəyişməsi qaçılmaz idi. Qeyd edək ki, Baba Tağıyev bir zamanlar Hüseyn Abdullayevi parlamentdə müdafiə etdiyinə görə 2010-cu ildə mandatdan məhrum edilmişdi.

“Avropa Qapıları” adı ilə qapı və mebel istehsal edən "Tağıyev" şirkəti tərəfindən istehlakçı hüquqlarının pozulması barədə bəzi vətəndaşların şikayətləri çoxaldıqca Baba Tağıyevin biznes imperiyası üçün hansı təhlükələrin mövcud olması üzə çıxır.

Qeyd edək ki, bir zamanlar Milli Məclisin deputatı olmuş Baba Tağıyev hələ 2009-cu ildə “Avropa qapıları” üçün yaranmış labüd təhlükəni aradan qaldıra bildi. Müvafiq orqanların vergi yoxlamaları, habelə digər monitorinqlər zamanı üzə çıxarılmış bir sıra çatışmazlıqlar aradan qaldırıldı.

Çünki onda Baba Tağıyev deputat idi və biznes imperiyasının toxunulmazlığını qoruyub saxlaya bilirdi. Amma bütün bunlara baxmayaraq, “Avropa qapıları” ilə bağlı şikayətlər səngimirdi. Şirkətinin çöküşündən sonra isə mətbuatda da gözə dəymədi. İndi isə parlamentə gedən yolda qapılar üzünə bağlanır. Belə desək, “Avropa qapıları” tərs üzünə açıla bilər.