Abdulla Abdullayev qan salan açıqlamalar verəcəyi barədə anons etdi

Bakı Ağır Cinayətlər Məhkəməsində “AMAY” ticarət mərkəzinin həbsdə olan rəhbəri Abdulla Abdullayev, eləcə də mərkəzin işçiləri Heydər Rzayev, Mehman Məmmədxanlı, Elşən Novruzov, Vidadi Qurbanov və Nadejda İlyasovanın məhkəməsi davam etdirilib.

Hakim Əfqan Hacıyevin sədrlik etdiyi prosesin əvvəlində Abdulla Abdullayevin vəkili Osman Kazımov zərərçəkənlərin məhkəməyə gəlməməsinin səbəbləri ilə maraqlanıb. Böyük məbləğdə ittihamın olduğunu deyən vəkil zərərçəkənlərin məhkəməyə gətirilməsini istəyib. Hakim bildirib ki, hər məhkəmə iclasında zərərçəknələrin iştirak etməsi üçün məktub ünvanlayırlar: “Amma onlar məhkəmə iclasına gəlmirlər”.

Daha sonra ifadəsini davam etdirən Abdulla Abdullayev bildirib ki, Sahibkarlığa Kömək Milli Fondunun Baş Prokuror yanında Korrupsiyaya qarşı Mübarizə İdarəsinə ünvanlandığı müraciət əsasında cinayət işi başlanıb: “Fondla “Birlik bank” arasında müqavilə var. Həmin müqaviləyə əsasən, öhdəlik də bankın üzərinə düşür. Öhdəlik yerinə yetirilmədiyi halda bank öz hesabına kreditləri ödəməyə məcburdur. Həmçinin bank dəymiş ziyanı da ödəyə bilər. Amma burada əksinə olaraq, cinayət işi başlanıb. Burada fondla Korrupsiya İdarəsi arasında danışıqlar olub. Onlar aralarında razılığa gəliblər ki, cinayət işi başlaması üçün qondarma sübutlar toplasınlar. Bundan sonra fond Korrupsiya İdarəsinə müraciət edərək kreditlərin verilməsini araşdırmağı istəyir. Amma bu iş mülki qaydada həll olunmalı

idi. Lakin qanunsuz olaraq cinayət işi başlanır. Bu da həm fondun, həm də korrupsiya idarəsinin özbaşınalığıdır”.

Abdulla Abdullayev deyib ki, “Birlik Bank”da müşahidə şurasının sədri olub: “Müşahidə şurası nəzarət edici orqandır. Mənim də vəzifəm nəzarət etmək olub. Çünki orada məsuliyyətim olmayıb. 4 il əvvəl bankda kreditlərin verilməsi ilə bağlı cinayət işi başlanıb. Qanunsuz olaraq bankın 3 əməkdaşı həmin vaxt cəzalandırılıb. 4 il əvvəl başlanan cinayət işi üzrə mən məsuliyyətə cəlb edilməmişəm. 4 ildən sonra fond yenidən korrupsiya idarəsinə müraciət edir və məni məsuliyyətə cəlb edirlər. Belə olan halda mənə mənimsəmə ittihamının verilməsi düzgün deyil. Milli Bankın və Beynəlxalq bankın müşahidə şurasının sədri maliyyə naziridir. Demək həmin bankların rəhbər şəxsləri qanunsuz iş gördüyü halda maliyyə naziri məsuliyyətə cəlb edilməlidir. Bu əsassızdır. Çünki müşahidə şurasının funksiyası nəzarət edib, tədbir görməsindən ibarətdir. Hesab edirəm ki, bankla bağlı mənə verilən mənimsəmə, dələduzluq ittihamlarının əsası yoxdur”.

Təqsirləndirilən şəxs daha sonra qeyd edib ki, Ali Məhkəmə banklardan götürülən kreditlərin vaxtının bitmədiyi halda mülki qaydada belə işə baxılmasının mümkün olmaması ilə bağlı şərhi var: “Ali Məhkəmə şərh edir ki, kreditin ödəniş vaxtı bitmədiyi halda məhkəmə işə baxa bilməz”.

Abdulla Abdullayev həmçinin “Birlik Bank”ın lisenziyasının ləğv edilməsindən danışıb: “2011-ci ildə bankın lisenziyasını ləğv etdilər. Guya belə əsaslandırdılar ki, həmin bankda İranın çirkli pulları yuyulur. Araşdırma aparılandan sonra bu fakt təsdiqini tapmadı. Amma yenə də bankın lisenziyası bərpa edilmədi. Bankın kapitalı 10 milyon olduğu halda bağlanması,

lisenziyasının ləğv edilməsi mümkün deyil. Amma bizim bankın kapitalı 16 milyon olub. Belə olan halda lisenziyasının ləğv edilməsi üçün də hər hansı bir əsas olmayıb. Bankın lisenziyasını bərpa etmirlər. Bərpa edilməsi üçün də bizim müdaxilə etməyimizə imkan vermirlər. Guya qanunla nəzərdə tutulmuş qaydada iş görürlər, işə də ədalətlə baxırlar. Amma bu ölkədə ədalət, qanun yoxdur. Qanunlar Baş prokurorluqda istədikləri formada müəyyən edirlər. Eyni işə iki dəfə baxılması mümkün deyil. Amma burada eyni iş üzrə iki dəfə cinayət işi başlayıblar. “Birlik Bank”la bağlı 2011-ci ildə cinayət işi başlayıblar və qanunsuz olaraq hökm qəbul ediblər. 4 ildən sonra eyni iş üzrə yenidən cinayət işi açırlar. Mən qanunlara söykənərək danışıram. Qanunda birbaşa göstərilib ki, bank özü məsuliyyəti üzərinə götürməklə girovsuz yüksək məblğədə kredit verə bilər. Amma bizim işimizdə müstəntiq yazır ki, bank girovsuz kredit verə bilməz”.

“AMAY”ın sahibi daha sonra qeyd edib ki, “Birlik Bank” bağlanandan sonra İran Milli Bankı və “Atabank” onları məhkəməyə verib və girov olan əmlakların müsadirə edilməsi üçün məhkəmə tərəfindən qərar çıxarılıb. “AMAY”ın təmiri başa çatması üçün yuxarılardan göstəriş aldıqlarını deyən Abdulla Abdullayev deyib ki, Heydər Əliyevin ad günündə binanın açılışnın edilməsi istənilib: “Həmin vaxt dedim ki, təmir işlərini başa çatdırmaq üçün imkanları yoxdur. Fonda müraciət edildi ki, əlavə kredit verilsin. Mən də razılaşdım. Sonra fondun rəhbəri Elçin Zeynalov məni çağırdı. Onun yanına gedərək nə məsələ olduğunu bildirdim. O, dedi ki, fonddan böyük məbləğdə pul ayrılıb, həmin pulu bötüvlükdə köçürmək mümkün deyil. O, həmin pulu hissə-hissə köçürməyin lazım olduğunu dedi. Ona bildirdim ki, bununla bağlı məni narahat etməyə dəyməzdi, bu

məsələni bankın rəhbəri ilə həll edə bilərdilər. Həmin vaxt fonddan 3 milyon manat ayrılmışdı. Bu pulun ayrılması üçün yuxarı dairələrdən göstəriş verilmişdi. İndi həmin göstərişin kimin tərəfindən gəldiyini açıqlamıram. Burada sual işarəsi qoyuram. Nə vaxtsa bununla bağlı da danışacam. Məni bir az qaşındırsalar, o qədər danışacam. Qaşıyıb qanımı çıxartsalar, qan salacam”.

Məhkəmə iclası martın 19-da davam etdiriləcək.