“Azəriqaz”ın mətbuat xidmətinin rəhbəri İbrahim Kərbəlayev virtualaz.org saytına açıqlamasında bildirdi ki, “Azəriqaz” əməkdaşları hazırda “Metropark” ticarət mərkəzində araşdırma aparırlar.

İbrahim Kərbəlayevin sözlərinə görə, “Azəriqaz”ın mütəxəssisləri ticarət mərkəzinə ümumiyyətlə qaz verilmədiyini müəyyən ediblər. Mətbuat katibi dedi ki, mütəxəssislər insanların zəhərlənməsinin digər mümkün səbəblərini araşdırmaqla məşğuldur.

Beləliklə, “Azəriqaz”ın mtbuat katibinin bu açıqlaması sensasion sayıla bilər.

* * *17:10

Virtualaz.org saytının hazırda “Metropark”da olan müxbiri xəbər verir ki, ticarət mərkəzindəki bütün adamlar - müştərilər və xidmət personalı binadan təxliyyə olunub.

Bina FHN əməkdaşları tərəfindən hərtərəfli yoxlanır. Ora heç kim buraxılmır.

“Metropark” əməkdaşlarının müxbirimizə dediyinə görə, ticarət və əyləncə mərkəzi bu gün işləməyəcək. Onun fəaliyyəti təhlükəsizlik tədbirləri ilə əlaqədar yalnız sabah bərpa olunacaq.

İlkin Muradov

Fotolar müəllifindir






* * *16:39

Bakının “Metropark” ticarət mərkəzində fövqəladə hadisə baş verib.

Blogger B.Hacıyevin virtualaz.org saytına verdiyi məlumata görə, "Nərimanov" metrosunun yaxınlığında yerləşən ticarət mərkəzinin binasında qaz sızması müşahidə edilib, nəticədə bura əylənməyə və alış-verişə gələnlər arasında zəhərlənənlər olub. Hadisə yerinə təcili yardım briqadaları çağırılıb. FHN əməkdaşları da oradadır.

Nərimanov Rayon Polis İdarəsindən APA-ya verilən məlumata görə, ticarət mərkəzinin qarajında qonşu binalardan birinə məxsus havalandırma xəttindən dəm qazının sızması nəticəsində qarajda olan 20-dən artıq şəxs zəhərlənib.

15-dən çox şəxs təcili yardım maşınları ilə xəstəxanalara aparılıb. Digər şəxslərə yerində yardım göstərilib.

Bakı Şəhər Təcili Təxirəsalınmaz Yardım Stansiyasının baş həkimi Rauf Nağıyev APA-ya açıqlamasında əraziyə təcili yardım briqadaları göndərdiklərini deyib. Onun sözlərinə görə, zərərçəkənlərdən bəziləri xəstəxanalara yerləşdirilib, bəzilərinə isə yerində tibbi yardım göstərilib. Baş həkim prosesin hələlik davam etdiyini, zərərçəkənlərin sayı barədə dəqiq rəqəm söyləməyin tez olduğunu bildirib.

Kliniki Tibbi Mərkəzin (KTM) Toksikologiya şöbəsinin müdiri, respublikanın baş toksikoloqu Azər Maqsudov isə APA-ya bildirib ki, KTM-yə 7 nəfər yerləşdirilib.

“Onlar başgicəllənməsi və ürək bulanmasından şikayətlənirlər. Vəziyyətləri orta ağırdır. İlkin məlumata görə, zəhərlənmə qaz sızmasından baş verib. Lakin dəqiq səbəblər araşdırılır. Zəhərlənənlər arasında ticarət mərkəzinin işçiləri və ticarət mərkəzinə gələn vətəndaşlar var” - deyə baş toksikoloq qeyd edib.