Qardaşı öldürülən Salyan sakinindən müstəntiqə sərt ittiham

O, müstəntiqin cinayət işini səthi apardığını, cinayətin iştirakçılarının şahid qismində dindirildiyini iddia etdi

Şirvan Apellyasiya Məhkəməsində Salyan rayon sakini, 1970-ci il təvəllüdlü Şəmsəddin Əsədovun məhkəməsi başa çatıb. İttihama görə, Şəmsəddin Əsədov həmkəndlisi İlqar Nəzərovu bıçaqlayaraq öldürüb. Hadisə 19 fevral 2014-cü ildə Salyan rayonunun Alçalı kəndində qeydə alınıb.

Həmin gün gecə saat 1 radələrində Şəmsəddin Əsədov sərxoş vəziyyətdə kənddə yerləşən “Alçalı” restoranına gəlib. O, həmin vaxt restoranda həmkəndliləri Füzuli Quliyev və Nizami Kərimov ilə birlikdə çay içib. Bu zaman İlqar Nəzirov da restorana gəlib. İlqarı yanına çağıraraq 2007-ci ildə vəfat etmiş qaynı, həmçinin dostu olmuş Sədrəddin Zeynalovun arvadı Zərifə Zeynalova ilə intim münasibətdə olmasını iddia edib. Bu zəmində onunla mübahisə yaranıb. İlqar Zərifə Zeynalovanın və onun ünvanına kənar şəxslərin yanında ucadan söyüş söyüb.

İlqar onu qorxutmaq məqsədilə masanın üzərində olan stəkanlardan ikisini sındıraraq yeyib və Şəmsəddini döyməklə hədələyib. O, İlqar Nəzirovun təhqiredici sözlərindən bərk əsəbləşib və aralarında yaranmış mübahisədən

istifadə edərək sonuncudan qisas alaraq onu öldürmək qərarına gəlib.

Şəmsəddin restoranın bufetindən siqaret alarkən İlqar Nəzirovun restorandan bayıra çıxdığını görüb. O, bu niyyətini həyata keçirmək məqsədilə həmin vaxt masanın üzərində olan bıçağını götürərək restoranın qarşısına çıxıb.

Şəmsəddin Əsədov həmin vaxt orada Nizami Kərimovla söhbət edən İlqar Nəzirova yaxınlaşıb. Bu zaman İlqar Nəzərov onun ünvanına yenə də təhqiredici ifadələr işlədib. Bundan bərk əsəbləşən Şəmsəddin özündə olan bıçaqla İlqar Nəzərova bir neçə zərbə vurub. Zərbənin təsirindən İlqar Nəzərov ölüb.

“Stəkanın şüşəsini çeynəyərək uddu”

Şəmsəddin Əliyev Cinayət Məcəlləsinin 120.1-ci (qəsdən adam öldürmə) maddəsi ilə ittiham edilib və Lənkəran Ağır Cinayətlər Məhkəməsinin hökmü ilə Şəmsəddin Əsədov 10 il 6 ay müddətinə azadlıqdan məhrum edilib. Hökmdən narazı qalan Şəmsəddin Əsədov apelyasiya şikayəti verərək cəzasının yüngülləşdirilməsini istəyib. Həmçinin zərərçəkmiş tərəf də apelyasiya şikayəti verərək Şəmsəddin Əsədovun cəzasının ağırlaşdırılmasını tələb edib. Hər iki şikayət baxılması üçün Şirvan Apellyasiya Məhkəməsinə göndərilib.

Hakim Ələsgər Novruzovun sədrliyi ilə keçirilən prosesdə ifadə verən Şəmsəddin Əsədov elan olunmuş ittiham üzrə özünü təqsirli bilib. O, qeyd edib ki, İlqar Nəzirov həmkəndlisi olmaqla uzaq qohumu olub: “İlqar Nəzərovla əvvəllər aramızda ədavət və ya düşmənçilikləri olmayıb. Baş vermiş hadisədən təxminən 15 gün əvvəl Salyan rayonunun Alçalı kəndində yerləşən “Alçalı” restoranında çay içərkən digər masada əyləşmiş İlqar Nəzirov məni uca səslə yanına çağırdı. Hmin vaxt aramızda mübahisə yarandı. Mübahisə zamanı İlqar məni söyərək təhqir etdi və hədələdi. Orada olan uzaq qohumlarım Rövşən Cavadov və Füzuli Quliyev dava düşməsinə imkan vermədilər”.

Təqsirləndirilən şəxsin sözlərinə görə, 2014-cü ilin fevral ayının 18-də əmisinin yas mərasimində iştirak etdikdən sonra saat 21 radələrində yaşadığı kənddə yerləşən kafeyə gəlib və orada pivə və araq içib: “Daha sonra siqaret alaraq evə getmək istəmişəm.

Lakin kənddə olan mağazalar bağlı olduğundan siqaret almaq məqsədi ilə rayonun Alçalı kəndində yerləşən ”Alçalı” restoranına gəlmişəm. Həmkəndlilərim Füzuli Quliyev və Nizami Kərimovla oturaraq orada çay içən İlqar Nəzirov məni yanına çağırdı və söhbəti olmasını bildirdi. İlqar stolun üstündə olan stəkanları götürərək dişlərim ilə sındıraraq qırıntılarını çeynəyərək uddu”.

Şəmsəddin Əsədovb qeyd edib ki, İlqar Nəzərov həmin qırıntılardan birini Nizamiyə uzadaraq onu verməsini deyib: “İlqar Nəzərov dedi ki, həmin şüşə qırıntısını udmayacağım təqdirdə kişi olmağıma şübhə ilə yanaşacağını dedi. Füzuli İlqara acıqlanaraq əlindəki stəkanı alaraq yerə çırpdı. Bu zaman İlqar ayağa qalxaraq mənə söyüş söyərək təhqiredici sözlərlə hədələdi. Nizamidən İlqarın niyə belə etdiyini soruşmaq üçün onunla bayıra çıxdım. Bayıra çıxarkən İlqarla da mübahisə etdim. Nizami İlqarın sərxoş olmasını dedi. Bu söhbətdən sonra yenidən restorana qayıtdıq. Restorana qayıdarkən İlqar masadakı nəlbəkiləri yerə çırparaq sındırdı, kənar şəxslərin yanında qaynım arvadı Zərifə Zeynalovanın və onun ünvanına söyüş söyərək məni təhqir etdi”.

“Faiqə polisə zəng etməsini tapşırdım”

Təqsirləndirilən şəxs bildirib ki, İlqar Nəzərovla mübahisə edib, orada olan şəxslər onları ayırıb: Sonra restoranın bufetində işləyən Faiq Allahverdiyevdən siqaret aldım. Faiqin başı qarışıq olduğundan bufetdəkı masanın üstündə olan bıcağı götürərək cibimə qoydum və bayıra çıxdım. İlqar və Nizaminin restoranın yaxınlığındakı piyada yol keçidində, əl-üz yumaq üçün nəzərdə tutulmuş yerin qarşısında dayandığını gördüm. Onlara yaxınlaşaraq İlqardan mənə qarşı olan münasibətinin səbəbini soruşmaq istədim. İlqar yenidən söyüş söyərək məni

təhqir etdi. Buna görə əsəbiləşərək gödəkcəmin cibindən bıçağı çıxararaq İlqara iki zərbə vurdum. Füzuli qarşıma keçərək

əlimdən tutduğundan bıçaq yerə düşdü. İlqarın qışqıraraq yaxınlıqdakı avtoyuma məntəqəsi istiqamətinə, Nizami isə yaxınlıqda olan ağaclığa tərəf qaçdı. Faiqə polisə zəng etməsini tapşırdım. Bıçağı cibinm qoyaraq yaşadığım evə getdim. Hadisə barəsində ailəmə məlumat verdikdən sonra isə polis şöbəsinə yollandım. Cinayəti törədərkən istifadə etdiyim bıçağı polis əməkdaşlarına təqdim etdim”.

“Müstəntiq işi tamamilə səthi aparıb”

Zərərçəkmiş şəxsin hüquqi varisi Vüqar Nəzərovun vəkili Arif Allahverdiyev bildirib ki, həm ibtidai istintaq orqanı, həm də birinci instansiya məhkəməsi tərəfindən tam hərtərəfli araşdırma aparılmayıb. Onun sözlərinə görə, baş vermiş hadisəyə obyektiv hüquqi qiymət verilməyib: “Məhkum edilmiş şəxsin əməlinin hüquqi tövsifində səhvə yol verilib. Cinayət hadisəsi insanların çox yaşadığı yerdə Alçalı restoranında baş verib. Həmin vaxt ictimai qayda pozulub, insanlar narahat olub, restoranda olan digər şəxslər isə avtomaşınlarda hadisəyə tamaşa ediblər. Alçalı reatoranı Bakı Astara yolunun sağında yerləşdiyi üçün orada ictimai qayda kobul şəkildə pozulub. Bundan əlavə ibtidai istintaq aparan müstəntiq işi tamamilə səthi aparıb. Müstəntiq baş vermiş hadisə ilə bağlı kifayət qədər şahidləri dindirməyib, birbaşa hadisənin törədilməsinə şərait yaradan, həmçinin cinayət hadisəsinə şəxsi təhrik edən Nizami Kərimovun və Füzuli Quliyevin əməllərinə düzgün qiymət verməyib. Onların əməllərində Cinayət Məcəlləsinin 221.2.2-ci maddəsinin tərkibi olmasına baxmayaraq, onları təqsirləndirilən şəxs kimi cəlb etmək əvəzinə iş üzrə şahid kimi dindirib. Lənkəran Ağır

Cinayətlər Məhkəməsinin hökmü ləğv edilməlidir. Şəmsəddin Əsədovun əməlini Cinayət Məcəlləsinin 120.2.2-ci (xiluqanlıq niyyəti ilə adam öldürmə) maddəsinə tövsif edərək, onun barəsində ağır cəza təyin edilməsini xahiş edirik”.

Şəmsəddin Əsədovun vəkili Ruslan Mirzəyev müdafiə etdiyi şəxsin apelyasiya şikayətini müdafiə etdiyi və məhkəmə kollegiyasından apelyasiya şikayətinin təmin edilməsini istəyib. Prokuror Ədalət Əzimov apelyasiya şikayətinin dəlillərinin əsassız olduğunu bildirib. O, qeyd edib ki, Şəmsəddin Əsədovun əməlləri Cinayət Məcəlləsinin 120.1-ci maddəsi ilə düzgün tövsif olunub. Onun sözlərinə görə, məhkum edilmiş şəxsə cəza təyin edilərkən şəxsiyyəti, törətdiyi cinayətin xarakteri və ictimai təhlükəliliyi, birinci instansiya məhkəməsinin hökmünün ləğvi və ya dəyişdirilməsi üçün əsaslar yoxdur. Prokuror çıxışının sonunda apelyasiya şikayətlərinin təmin edilməməsini istəyib. Tərəfləri dinləyən hakim heyəti sonda apelyasiya şikayətlərinin təmin edilməməsi barədə qərar açıqlayıb.