Ağalar Vəliyevin tikinti şirkətlərini aldadıb pullarını mənimsəməklə Novxanıda villa tikdirdiyi iddia edilir; oğlunun da barəsində narazılıq var

Deputat Ağalar Vəliyevin rəhbəri olduğu qurumdan şikayət var. “Gündəm xəbər”in əldə etdiyi məlumata görə, A.Vəliyevin rəhbərlik etdiyi “Azəraqrartikinti” ASC bəzi tikinti şirkətləri ilə halallaşmayıb.

Qurum MTK-lara verməli olduğu milyonların qaytarılmasından yayınır.

Sözügedən tikinti şirkətləri qurumun sifarişi ilə paytaxt ərazisində yaşayış binalarının təmirini reallaşdırıb. “Azəraqrartikinti” ASC davamlı olaraq Bakı Şəhər İcra Hakimiyyətinin və Nazirlər Kabinetinin tenderlərinin qalibi olması ilə diqqət çəkir.

Deputt Xəzərin bir neçə yüz metrliyində, Novxanı kəndində prezident sarayı ilə müqayisə edilə biləcək layihə reallaşdırıb. Mənbə deyir ki, Ağalar Vəliyev ölkədə analoqu olmayan çoxqübbəli villa tikdirib.

“Azəraqrartikinti” ASC son bir neçə ildə büdcə vəsaitləri hesabına daha çox təmir-tikinti işləri aparan təşkilatlardan biri kimi ölkənin ən iri vergi ödəyiciləri sırasında yer alır. Onun bu pullar hesabına villa tikdirdiyi iddia olunur.

Ağalar Vəliyevin ortaqlıq etdiyi tikinti şirkətlərindən bəziləri ilə hesablaşmaqdan imtina etdiyi barədə gəzən söz-söhbətləri də nəzərə alsaq, hörmətli millət vəkilinin çoxqübbəli villasının tikintisinə hansı mənbələrdən vəsait əldə etməsi barədə müəyyən qənaətə gəlmək olar.

Milli Məclisə ara-sıra şok hesabatları ilə gündəmdən düşməyən Hasablama Palatası deputat Ağalar Vəliyevin prezident sarayı ilə müqayisə edilə biləcək çoxmilyonluq mülkünün nəyin hesabına başa gəldiyini aşkarlaya bilər.

Bir müddət əvvəl deputat oğlunun qeyri-qanuni olaraq pul yığdığı xəbərləri də var idi. Mirəli Qaşqay 94 və Sabit Rəhman 53 ünvanında yaşayan sakinlər şikayət edirdilər.

Sakinlər hər iki ünvanın bir məhəlləni əhatə etdiyini və binaların birinci mərtəbəsində “Mələk” uşaq əyləncə mərkəzinin yerləşdiyini bildirirlər. Bu əyləncə mərkəzinin həyətində uşaq oyun aksesuarları quraşdırılması üçün MTK-nın bina sakinlərindən pul yığdığını deyiblər.

Sakinlər hər iki binanın və bağçanın Aqrar-Tikinti ASC-nin sədri Ağalar Vəliyevin oğlu Pərviz Vəliyevə məxsus MTK-ya aid olduğunu yazırdılar. Bağça rəhbərliyi bizdən hər iki binanın orta hissəsində bu müəssisəyə məxsus uşaq avadanlıqlarının quraşdırılması üçün pul tələb edir. Binada yaşayan ailələrin hər birindən 100 manat istənilir.

MTK sədri deyir ki, əgər 100 manat verilməsə, arayış da almayacaqsınız.

V çağırış Azərbaycan Parlamentinin fəaliyyətə başlamasından dörd ildən çox vaxt keçsə də, bu müddətdə bəzi deputatların ümumiyyətlə hər hansı fəaliyyəti hiss olunmadı.

İstər qanunvericilik təşəbbüslərinin irəli sürülməsi, istərsə də ictimaiyyətlə təmas baxımından heç bir fəaliyyəti olmayan deputatlar arasında parlamentə ilk dəfə mandat qazanan millət vəkilləri xüsusi yer alır.

Onlardan biri də 11 saylı Qaradağ seçki dairəsini təmsil edən deputat Ağalar Vəliyevdir. Tikinti sektorunda aparıcı paya malik “Azəraqrartikinti” şirkətinə rəhbərlik edən A.Vəliyev həm də mətbuata qapalı deputatlar sırasında yer alır. Hətta, xeyli vaxt əvvəl “Türkiyə Universitetləri Məzunları” İctimai Birliyi onun ucbatından qərargahsız qalıb. Bununla bərabər, ictimai birlik ona məxsus olan sənədlərdən belə istifadə edə bilmir.

Bunun səbəbi isə Ağalar Vəliyevdir. TUMİB uzun müddət müqavilə əsasında ASC-nin Şəfaət Mehtiyev küçəsində yerləşən binasında icarədə oturduğu 1 otaqlı qərargahdan çölə atılıb. İB-in maliyyə qaynaqları olmadığınıdan ASC-yə icarə borcları 2 min manata qədər artıb. Belə olduqda Ağalar Vəliyevin göstərişi ilə binadan bütün əmlakları müsadirə olunmaqla çıxarılıb.