Mərkəzi xəstəxananın həkimi isə, üzərinə düşən vəzifə borcunu yerinə yetirmək əvəzinə, deyəsən münəccimlik etməyi daha üstün tutub

Ölkəmizin strateji sahələrindən biri də, “Azərbaycan Dövlət Dəmiryolu” QSC-dir. Bu sahədə əmələ gələn problemlər, mənimsənilən vəsaitlər, qol qoyulan saysız-hesabsız qanunsuzluqlar və.s barədə məlumatlar, daim mətbuatın gündəmini zəbt etməkdədir. Bir neçə gün bundan əvvəl, QSC-in rəhbərliyinin dəyişdirilməsi də, bu sahənin yenidən gündəmə gəlməsinə səbəb oldu. Cavid Qurbanovun rəhbərlik etydiyi“ Azərbaycan Dövlət Dəmiryolu”nda bundan sonra nə kimi problemlərin, yaxud da yeniliklərin əmələ gələcəyini, yəqin ki, zaman göstərəcək.

Bu dəfə isə redaksiyamızın ünvanına şikayət ərizəsi ünvanlayan, beş nəfər qatar bələdçisidir. Onlar yazdıqları şikayət ərizəsində bildirirlər ki, “biz 5 mart 2015-ci il tarixdə Bakı-Astara qatarında Astaraya getdik. Səhər saat 9 radələrində rayona çatdıqdan sonra, bir qədər vaqonun təmizlik işləri ilə məşğul olub yemək yedik. Həmin gün Bakı şəhərinə qayıdacağımızdan məcbur idik ki, günorta saatlarında bir qədər istirahət edək. Elə ki, günorta saatlarında istirahət etməyə başladıq, çox keçmədi ki, Astara dəmiryolu vağzalının polis əməkdaşları vaqona daxil olub bizi düşürməyə başladılar. Və bildirdilər ki, “siz burada spirtli içki içib sərxoşluq edirsiniz” deyərək, üç vaqonun bələdçisini (17, 18, 19 saylı vaqonların bələdçilərini) məcburi qaydada Astara rayon Mərkəzi Xəstəxanasına apardılar. Hansı ki, polis əməkdaşlarının özbaşına vaqona daxil olmaları və bizi məcburi qaydada vaqondan düşürmələri qanunla qadağandır. Xəstəxanada isə həkim bizə baxıb bildirdi ki, “mən bunların sifətinə baxdıqda bilirəm ki, sərxoşdurlar”. Maraqlı hal o olur ki, həkim bələdçilərdən analiz alıb onların sərxoş olub-olmadıqlarını dəqiqləşdirmək əvəzinə, sanki münəccimlik etməyə üstünlük verir.

Bələdçilər onu da vurğulayırlar ki, “həkimin mövqeyini gördükdə dərhal təkid etdik ki, analiz götür və bizim sərxoş olub-olmadığımızı dəqiqləşdir. Etdiyimiz təkidi görən polis əməkdaşları çox keçmədi ki, aranı qatdılar və bizə hədə-qorxu gələrək “siz könüllü izahat yazın ki, biz spirtli içki qəbul etmişik. Yoxsa, sizi Astara rayon Polis Şöbəsinə aparıb saxlayacağıq” dedilər. Polisdən qurtulmaq məqsədilə, məcburiyyət qarşısında qalıb həmin ifadəni yazdıqda, Ramin adlı polis əməkdaşı Tağıyev Nəriman Əlsahib oğluna (bələdçiyə) yaxınlaşaraq bildirdi, “hər biriniz 500 manat verin, sizin işinizi polis rəisi Fikrət müəllimlə danışıb yoluna qoyum”. İstənilən rüşvəti verə bilməyəcəyimizi bildirərkən, onlar saxta sənədləri rəsmləşdirib iş yermizə göndərdilər”.

Sağ olsun rəhbərliyi də, ilin axırıncı çərşənbə günü ünvanlanan saxta sənədlər əsasında bələdçiləri işdən azad edirlər. Hansı ki, həmin gün ölkə rəhbəri ona verilmiş səlahiyyətdən istifadə edərək, ağır cinayət törətmiş şəxsləri belə bağışlaya bildi. Amma, rəhbərlikdə təmsil olunan Əlyar Muradov, Rəhman Əbişov kimi vəzifə sahibləri isə, heç nəyə məhəl belə qoymadan, bələdçilərin bayram gününü qara edirlər.

Bu gün işsizlikdən, əlacsızlıqdan zinhara gələn bələdçilər redaksiyamıza üz tuturlar ki, üzləşdikləri problemin ictimailəşməsinə və həllinə nail ola bilsinlər. Və ona da ümid bəsləyirlər ki, QSC-in yeni rəhbərliyi problemin varlığını diqqət mərkəzində saxlayacaq.

Araşdirmamiz davam edəcək.

Mirzə