Faktla bağlı hüquq-mühafizə orqanlarına dəfələrlə müraciətlər ünvanlasaq da, son anda onlar da müraciətlərimizi tədbir görülməsi üçün Nəqliyyat Nazirliyinə göndərirlər və bununla da haqq səsimizi eşitmədiklərini ortaya qoymuş olurlar.

Ölkəmizin dəmiryolu sahəsində yaşananlar zaman-zaman müzakirə olduğundan, bu gün də müzakirə olunmaqdadır. Çünki, bu sahə dövlətimiz üçün olduqca strateji əhəmiyyət kəsb edən bir sahədir. Bəs bu gün nələr baş verir ki, “Dövlət Dəmiryolu” QSC-də baş verənlər, yenə də müzakirə mövzusuna çevrilir.

Son günlər redaksiyamıza daxil olan şikayət məktubları içərisində, daha çox bu sahədə yaşanan problemlər qabardıldıqca, o halda baş verənlərdən biz də az-çox xəbər tuta bilirik. Məsələn, redaksiyamıza “Dövlət Dəmiryolu” QSC-i, Bakı Vaqon Deposunun 25 nəfər sabiq əməkdaşının imzası ilə daxil olan şikayət məktubunda bildirilir ki, “biz müxtəlif vaxtlarda Dövlət Dəmiryolu İdarəsinin Bakı Vaqon Deposunda bələdçi vəzifəsində işləmişik. Bəzilərimiz bu gün də Bakı Vaqon Deposunda çalışmaqdayıq. Bəzilərimiz işdən çıxarıldıqdan sonra, idarədə vəzifə sahibi olanlar alacağımız vəsaitlərin çoxunu bizə vermədilər. Onu da bildiririk ki, uzun illər Bakı Vaqon Deposunda əmək haqları düzgün hesablanmamış, nəticədə hər kəs almalı olduğu məbləğdən az miqdarda əmək haqqı almışdır.

Əslində bələdçilərə əmək haqları Nazirlər Kabinetinin 16 mart 2001-ci il tarixli 66 saylı və 25 yanvar 2008-ci il tarixli qərarlarından irəli gələn göstərişlər əsasında verilməli olduğu halda, vəzifə sahibi olanlar bunlara heç cür halda məhəl qoymamış və açıq-aydın şəkildə qulaqardına da vurmuşlar. Bundan əlavə, 13-cü əmək haqlarımız da verilməmiş, 2007-ci ildən isə əmək haqlarımız ayrıseçkiliyə yol vermək şərtilə hesablandığından, nəticədə məlum qərarların tələbləri kobud şəkildə pozulmuşdur. Baş verənlərlə bağlı dəfələrlə Bakı Vaqon Deposunun rəhbərliyinə müraciətlər etsək də, müraciətlərimizin heç bir nəticəsi olmamışdır. Nəticədə sadalanan qanun pozuntuları bir dövlət qurumu olaraq “Dövlət Dəmiryolu” QSC-nin nüfuzuna xələl gətirmiş və vəzifə sahibi olanların ictimai qınağa tuş gəlmələrinə də səbəb olmuşdur.

Biz dəmiryolçuların Konstitusiya ilə qorunan hüquqları, dəmiryolu idarəsində vəzifə sahibi olan bəzi şəxslər tərəfindən kobud şəkildə pozulmuşdur. Qurumun yuxarı instansiyalarına ünvanladığımız müraciətlərdə, baş alıb gedən korrupsiya hallarının tüğyan etməsindən, əmək müqavilələrinin pozulmasından, saat normalarının düzgün hesablanıb verilməməsindən, uzun illər məlum qərarlara JV266 saylı 2001-ci il tarixli, N-14 saylı 2008-ci il və sonuncu olaraq JVkl-14 saylı 2011-ci il tarixli ölkə rəhbərinin məlum sərəncamına əsasən, bələdçilərə səyyar xarakterli işə görə hesablanıb verilməli olan çörək pullarının verilməməsindən, vəzifə sahiblərinin qol qoyduqları cinayətlərə şahid olduğumuzdan və səsimizin çıxmasına imkan verilməməsindən və.s bəhs etmişik. Düzdür, əvvəllər baş verənlər nadir hallarda baş verirdi, amma 1997-1998-ci illərdən sonra isə, daha kütləvi hal almağa başladı.

Ümumiyyətlə, 1997-ci ildən başlayaraq bu günə kimi “Dövlət Dəmiryolu” QSC-nin Sərnişindaşıma Departamentinə rəhbərlik edən Elyar Muradov, depoda mühüm vəzifə daşıyan Rəhman Əbişov, onun iş icraçısı, müavini Hikmət Məmmədov və onlarla bəzi mühəndislər, sex rəisləri, təlimatçılar və digər vəzifə sahibləri elə bir rüşvət şəbəkəsi qurublar ki, gəl görəsən. Deponun bütün sahələrinə də öz adamlarını yerləşdiriblər. Daha çox gəlir əldə etmək üçün, çox zaman bizi əlavə işlər görməyə vadar edirlər. Elə ki, həmin işləri görmək istəmədiyimizi bildiririk, bu zaman bizi işdən çıxarmaqla hədələyirlər. Ailəmizə bir tikə çörək aparmaq üçün, son anda onların dediklərinə əməl etməyə məcbur oluruq.

Əgər bəldçilərdən kiminsə vaqonu yoxdursa, o halda 4 nəfər 200 dollardan pul toplayıb təmir sexinin baş ustası R.Abdullaya verməlidir ki, hələ sovetlər dönəmindən fəaliyyət göstərən Güzdək “vaqon ölüxanası”ndan bir vaqon gətirib, onu da öz xərcinlə depoda təmir etdirə biləsən. Təmir üçün hər kəsdən 800 dollardan rüşvət almaq qalsın bir yana, zəruri ehtiyat hissələrini də biz almağa məcbur edilirik. Elə ki, vaqon təmir olunub hazır olur, bu zaman hansı istiqamətə hərəkət edəcəyindən asılı olaraq (Moskva, Kiyev, Rostov, Tümen, Sankt-Peterburq, Brest və.s) 400-800 arası dollar rüşvət verməyə məcbur edilirsən ki, vaqonu qatara qoşdura biləsən. Belə bir qaydaları yuxarıda adları çəkilən vəzifə sahibləri tətbiq etmişlər ki, bunun da əziyyətini biz çəkirdik.

Ümumiyyətlə, Dövlət Dəmiryolu” QSC-nin Sərnişindaşıma Departamentinə rəhbərlik edən Elyar Muradov, belə bir qaydaların müəllifi olaraq xüsusi ad-san da çıxarıb. Bütün bunlardan əlavə o, Bakıdan Moskvaya, Xarkova və digər istiqamətlərə hərəkət edən qatar bələdçilərinin hər birindən, 100 dollar pul aldıqdan sonra reysə yazılmalarına icazə verir. Bələdçilərə forma almaq məqsədilə ayrılan pullar da mənimsənildiyindən, formaları bələdçilərin özləri almağa məcbur olurlar. Elyar Muradov ölkə daxilindən xaricə çıxan hər qatardan haqq alır. Məsələn, Bakı-Moskva reysindən 700 dollar, Bakı-Kiyev reysindən 700 dollar, Bakı-Tümen reysindən 600 dollar, Bakı-Rostov reysindən isə 400 dollar rüşvət tələb edir. Hələ bunlar azmış kimi, qatarın illik təmiri üçün də haqq alınır. Vaqonu içəridən yudurtmaq üçün 20 manat, bayırdan yudurtmaq üçün isə 10 manat pul tələb olunur. Sabun, tualet kağızı, yuyucu tozlar, antisanitariya dərmanları, süpürgə və digər zəruri əşyaları da, bələdçilər öz pulları ilə alırlar. Belə bir ləvazimatları almaq məqsədilə ayrılan pullar isə silinir və adları çəkilən şəxslər tərəfindən də mənimsənilir. Qatar yerindən tərpənməmiş, rəislərin haqqı 100-200 manat arası dəyişir. Ötən illər ərzində heç bir vaqon alınmadığından, təzə ehtiyat hissələri də gətirilmir. İşsiz qalan insanların sayı ildən-ilə çoxalır və nəticədə Nazirlər Kabinetinin qərarları, Azərbaycan Respublikası Prezidentinin məlum sərəncamları, Bakı Vaqon Deposunun vəzifə sahibləri tərəfindən saya salınmır. Biz sabiq dəmiryoçular faktla bağlı dəfələrlə hüquq-mühafizə orqanlarına müraciətlər ünvanlasaq da, son anda onlar tədbir görülməsi üçün müraciətlərimizi Nəqliyyat Nazirliyinə göndərirlər və bunula da haqq səsimizi eşitmədiklərini ortaya qoymuş olurlar.

Artıq üzləşdiyimiz haqsızlıqlara dözə bilmədiyimizdən və aidiyyəti qurumlar da haqq səsimizi eşitmək istəmədiklərindən, 26 avqust 2015-ci il tarixdə Prezident Administrasiyasının önündə oturaq aksiya keçirməyi nəzərdə tutmuşuq. Bəlkə belə bir addımımızdan sonra bir kimsə bizi eşitdi, üzləşdiyimiz problemlə maraqlanan oldu”.

Sözsüz ki, yuxarıda sadalananlar, adlarını çəkdiyimiz vəzifə sahiblərinin əməlləri haqda verilən məlumatlar, redaksiyamıza şikayət məktubu ünvanlayan 25 nəfər sabiq dəmiryolçunun fikirləridir. Düzdür, yaşanan problemlərin varlığı barədə kifayət qədər məlumatlı olmasaq da, ümumi atmosferdən o da bəlli olur ki, həqiqətən “Dövlət Dəmiryolu” QSC-nin Bakı Vaqon Deposunda anarxiya, həddi-hüdudu bilinməyən haqsızlıq hökm sürməkdədir.

Qarşı tərəfin də mövqeyini dinləməyə hazırıq. Yaşanan problemlərin varlığını diqqətdə saxlayacağıq.

Kamal