Müammalı ölümdən keçən 40 gün ərzində istintaq nələri üzə çıxarıb?

Mandat alverində adı hallandırılan və İstanbulda müəammalı şəkildə dünyasını dəyişən Sevinc Babayevanın ölümündən 40 gün ötdü. Mərhumun oğlu Ayxan Məmmədov israrla anasının ölümündə keçmiş deputat Gülər Əhmədovanı günahlandırır.
İstintaq isə hələlik bu istiqamətdə hər hansı açıqlama vermir. Baş Prokurorluğun iş üzrə yaydığı son rəsmi məlumatda deyilirdi ki, S.Babayevanın ölkədən çıxmasında və Türkiyədə gizlənməsində G.Əhmədova və onun ailə üzvlərinin nə kimi iştirakının olması və digər xüsusatların araşdırılması istiqamətində zəruri istintaq tədbirləri davam etdirilir. Məlumatda o da qeyd olunmuşdu ki, Türkiyəyə ezam olunmuş Azərbaycan Prokurorluğu və Daxili Işlər Nazirliyinin əməkdaşları ölkəyə qayıtdıqdan və iş üzrə həyata keçirilmiş istintaq-əməliyyat tədbirlərinin nəticələri, həmçinin Türkiyə tərəfindən məhkəmə-tibbi ekspertizanın rəyi alındıqdan sonra ictimaiyyətə əlavə məlumat veriləcək. Əldə etdiyimiz məlumata görə, Türkiyəyə ezam olunmuş hüquq-mühafizə orqanlarının əməkdaşları artıq ölkəyə qayıdıblar.
Baş Prokurorluğun mətbuat xidmətinin rəhbəri Eldar Sultanova müraciət edib məsələ ilə bağlı hansı yeniliyin olduğunu öyrənməyə çalışdıq. E.Sultanov bildirdi ki, Bakı Şəhər Prokurorluğunda CM-nin 178.3.2-ci maddəsi ilə istintaq edilən cinayət işi üzrə barəsində axtarış elan olunmuş Sevinc Babayevanın Türkiyədə vəfatı ilə əlaqədar İstanbul şəhərinə ezam olunmuş Azərbaycan Prokurorluğu və Daxili İşlər Nazirliyinin əməkdaşları müvafiq istintaq hərəkətlərində iştirak etdikdən sonra ölkəyə qayıdıblar. Və hazırda cinayət işi üzrə digər zəruri istintaq hərəkətləri icra olunur: “Müvafiq ekspertizaların rəyləri alındıqdan və istintaq hərəkətləri yerinə yetirildikdən sonra istintaqın gedişatı barədə ictimaiyyətə əlavə məlumat veriləcək”.
Hüquqşünas Müzəffər Baxışov isə hesab edir ki, əsas məsələ istintaqın obyektiv və hərtərəfli aparılmasıdır: “Azərbaycanda istintaq tam və hərtərəfli aparılmır. Ona görə istintaq üzrə vaxtında qərarlar qəbul olunmur. Sevinc Babayeva Türkiyədə dünyasını dəyişib və orada da araşdırma gedir. Deyilənə görə burada da meyitin üzərində məhkəmə-tibbi ekspertizası aparılıb, bu barədə qərar qəbul olunub və araşdırma aparılır. Sevinc Babayeva Türkiyədə vəfat etdiyi üçün araşdırma orada aparılmalı və hüquqi qiymət verilməlidir. Əgər bu məsələ ilə bağlı Türkiyəyə Azərbaycan hökuməti tərəfindən müdaxilə olmasa, onlar ortaya obyektiv araşdırma qoymayacaqlar”
Elçin