Müzəffər Baxış:
«Hakimiyyətdəki mafioz qruplar məhv edilməsə, prokurorluğun
onun barəsində həbs-qətimkan tədbirini seçməsi inandırıcı deyil»

Sevinc Babayeva ilə bağlı prokurorluğun açıqlamasında onun ölkəni sabiq deputat Gülər Əhmədovanın təklifi ilə tərk etdiyini bildirilir. Açıqlamada S.Babayevanın ölkədən çıxmasında və Türkiyədə gizlənməsində G.Əhmədova və ailə üzvlərinin nə kimi iştirakının olması və digər xüsusatların araşdırılması istiqamətində zəruri istintaq tədbirlərinin davam etdirildiyi deyilir.
Məlumatda bildirilir ki, Türkiyəyə ezam olunmuş hüquq-mühafizə orqanlarının əməkdaşları ölkəyə qayıdandan, istintaq-əməliyyat tədbirlərinin nəticələri, Türkiyədən məhkəmə-tibbi ekspertizanın rəyi alınandan sonra ictimaiyyətə əlavə məlumat veriləcək. Buna qədər Sevinc Babayevanın oğlu da anasının ölkədən Gülər Əhmədovanın köməkliyi ilə çıxdığını və zəhərlənərək öldürüldüyünü açıqlamışdı. Artıq prokurorluğunun da Gülər Əhmədovanın bu məsələdə iştirakını araşdırması keçmiş deputatın həbsinə hazırlıq kimi qiymətləndirilə bilərmi?
Hüquqşünas Müzəffər Baxış hesab edir ki, Gülər Əhmədovanın müdafiə edən dövlətin tərkibindəki mafioz qruplar məhv olmasa, prokurorluğun onun barəsində həbs-qətimkan tədbirini seçməsi inandırıcı deyil. Azərbaycan ictimaiyyətinə də məlumdur ki, ağır cinayətlərdə əli olan hakimiyyətdə təmsil olunan insanları hüquq-mühafizə orqanları cinayət məsuliyyətinə cəlb etməkdən çəkinir. Bununla belə ekspert Gülər Əhmədova barəsində həbs-qətimkan tədbirinin seçilməsini də istisna etmir: “Elşad Abdullayevlə bağlı dələduzluq cinayəti törətmiş və Gülər Əhmədovadan daha az pul almış şəxslər barəsində artıq həbs-qətimkan tədbiri seçilib. Gülər Əhmədova barəsində də həbs-qətimkan tədbiri seçilə bilər. Amma bu, əvvəl dediklərimi heç də inkar etmir”.
M.Baxışın sözlərinə görə, artıq Azərbaycanda ictimai siyasi vəziyyət gərginləşib. Hakimiyyətin baş prokuror Zakir Qaralov vasitəsilə ağır cinayətləri ört-basdır etmək cəhdləri artıq ictimai təsirə gətirib çıxarıb. Azərbaycan ictimaiyyəti dərk edir ki, hüquq-mühafizə orqanlarında yüksək vəzifələrdə təmsil olunan şəxslər, xüusilə baş prokuror əslində cinayətə meyilli şəxslərdir, xüsusilə baş prokuror. Ola bilsin bunlar da öz vəziyyətlərinin ağırlaşdığını görürlər: “Ancaq Gülər Əhmədovanı müdafiə edən şəxslər hələ hakimiyyətin ən yüksək eşelonunda təmsil olunurlar. O qüvvələrin təsir imkanları azalsa, onun həbs-qətimkan tədbirinin seçilməsi reallaşa bilər”.
Arzu