“Üç aydır onsuz da az olan əmək haqlarımızı vermirlər. İşçilərin böyük bir hissəsi işdən çıxardılıb”. Bu barədə Sumqayıt Boru Prokatı zavodu - “Azərboru” ASC-nin işçilərinin mətbuata müraciətində bildirilir.

“Azerboru” zavodunun fəhlələri adından Yunis "Marja"ya yazır ki, zavod 3 aydır maaş vermir:

“Bu Ramazan bayramında əziyyət çəkdik. Maaşımızı ala bilmədiyimizdən banklara da borcumuzu ödəyə bilmirik”.

O iddia edir ki, zavodun rəhbərliyi inkişaf üçün ayrılmış pulları təyinatı üzrə xərcləməyib:

“Bütün işçilər mərhələli şəkildə 67%-nən evə buraxılırlar. Aldığımız pul 120-167 manatdır. Çox vaxt pulu yarı-yarı verirlər. Artıq 3 aydır zavodda yemək də verilmir”.

Şikayətçi qeyd edib ki, “Baku Steel Company”nin sifarişlərinin yerinə yetirilməsi üçün zavodun işçilərinin 5%-nin saxlanılması nəzərdə tutulur.

“Artıq bir qisim işçilər işdən çıxardılıblar. Əgər işləyə biliriksə, bizi nə üçün işdən çıxardırlar? Zavodu işlədə bilməyənlər işdən çıxardılsınlar”.

2013-cü ilin yayında dövlət “Azərboru” ASC-nin səhmlərinin 97,39%-i özəlləşdirib və onları “Baku Steel Company” MMC alıb. Şirkət müəssisəyə 5 mln 267 min manat investisiya qoymaq öhdəliyi götürüb.

Maydan fəaliyyəti dayanan zavodda 1100 işçi var.

“Baku Steel Company” MMC-nin mətbuat katibi Namiq Əhmədov bildirib ki, şirkətin maliyyə çətinlikləri var. Amma Sumqayıt Boru Prokatı zavodunun işçilərinə əmək haqqı ödəmək üçün yollar axtarılır.